Read Sangir 1 KORINTUS 8 Bible Online

1 KORINTUS 8 - Sangir bible

1 KORINTUS 8

¹Su hal᷊ẹ̌ewen manga kaěng kụ ighẹ̌gěllị pạněmba mahaʼn duata e. Kahěngang bue nạung kere nipẹ̌beran taumata u, ”I kitẹ kẹ̌bị e seng něngkapande.” Kaiso kapande nakariadi taumata e naobotẹ̌, arawe kai kakěndagẹ̌ e mạmangung pẹ̌sěngkatau.

²Taumata kụ mạul᷊ịu i sie lawọ kasingkạe, ute tumuhụ hinone ute kai kasingkạ e tawẹ kararal᷊unge.

³Arawe kai taumata kụ těnga-těngadẹ̌ kụ kěndagu Mawu Ruata e, ute i sie su kasingkạben Duata.

⁴Su hal᷊ẹ̌ u kumaěng kaěng kụ seng nisěmba su mahan duata e, kai mělẹ̌lahẹ u barang tala. Dingangu i kitẹ mambeng lai masingkạ u Ruata e mang sěmbaụ; tawẹ u wal᷊ine.

⁵Těngadẹ̌ bue mal᷊aing lawọ isẹ̌sẹ̌bạ duata ringangu mawu; baẹ su l᷊angị arau su wowon dunia.

⁶Kai arawe si kitẹ e, Ruata e mang sěmbaụ. I Sie kai i Amang něndiadi patikụ. Kai waugʼi Sie i kitẹ e mẹ̌bẹ̌biahẹ̌. Dingangu Mawu e kẹ̌tạbenlai sěmbaụ, kụ kai Yesus Kristus. Kai woʼi Sie patikụ sạbarange niriadi, ringangu kai ual᷊ingʼi Sie tangu i kitẹ e nakapẹ̌biahẹ̌ e.

⁷Maningbe kerene e, wal᷊inewe kěbị makakasingkạ u ene. Piạben nạung kal᷊amona e nanarangbe mạněmba mahan duata. Kụ ual᷊ingu ene ute sarạeweng orasẹ̌ ini e ute i sire wědawen makạpěndangu kaěng, kụ seng nisěmba su mahan duata e, kai kaěngu mahan duata. Tangu mạengu i sire kumaěng kaěng ene ute i sire makapěndangu kai limawang; batụu pěngangimang i sire e wědang ta nạtoghasẹ̌.

⁸U tumuhụ hinone laidopẹ̌ hala e wědawen tawe makakasěgadẹ̌ pẹ̌dal᷊ahěmpukang i kitẹ e ringangu Mawu Ruata e. Kereu i kitẹ e kumaěng kaěng ene e i kitẹ tawe makahombang be kal᷊auntung apa-apa. Susěmbẹ̌kane e kereu i kitẹ e tawe kumaěng kaěng ene e i kitẹ mamben tawe marugi.

⁹Kaiso, pakaingatẹ̌ bue! Kumbahang bue sarang taumata wal᷊ine e manawo surosa — ual᷊ingu pěngangimange wědawen ta nạtoghasẹ̌ — u watụ u i kamene e měngkawe walạewe apa koateng.

¹⁰Sutimonakue kai kere ini: Andene i kamene apan matoghasẹ̌ supěngangimang e, kutẹu kawe mạhungkaěng su ral᷊ungu wal᷊en pananěmbaěng su mahan duata e. Bọu ene pẹ̌sengkatau piạu makạsilo si kamene mạiang kụkaěng sene. Kereu pangangimang e tạ toghase, bal᷊inewe makawahani taumata ene kumaěng kaěng seng nisěmba su mahan duata ngae?

¹¹Kụ ual᷊ingu ene, tangu pěngangimang i kamene e makapanoghasẹ̌be si saing apan pěngangimange lome kụ napal᷊idẹ̌. Sumbal᷊iu i Kristus e kawe napohong mal᷊aing baugu taumata kerene.

¹²Dingangu kereu i kamene měkoạ pẹ̌sasal᷊a su manga anạ u sěmbaụ Sahani e — ute i kamene e kai něnggolang pěngangimang i sire e kụ seng těbe lome — tangu i kamene ute nẹ̌sal᷊a su těngong Kristus.

¹³Kai ene hakịu, kamageng laidopẹ̌ e kawe makakatanggan anạ u sěmbaụ e, ute iạ e semben tawe kuminạ gěsi e sarang sěnsul᷊e. Madiriweng iạ makoạ katatanggaěng su anạ u sěmbaụku.