Read Sangir 1 KORINTUS 9 Bible Online

1 KORINTUS 9 - Sangir bible

1 KORINTUS 9

¹Lẹ̌ěnaěng, iạ e wal᷊inewe taumatan karal᷊iwirẹ̌ ngae? Arau ěnnaěng iạ e kai wal᷊inewe rarolohang? Iạ e kai tawe nakasilo ho tangu! Si Yesus, Mawung kitẹ? Unụ e i kamene kai wal᷊inewe lěnnạu munaraku e waugu Mawu tangu?

²Kamagengbeng i sire wal᷊ine e kawe tawe mangakung iạ e kai rarolohang, ute mẹ̌těngkakadọdọ i kamene mangaku wue ene! U pẹ̌bawiahʼi kamene tau Sahani e ute kai tatialang iạ e kai sěngkatau rarolohang.

³Kereu taumata e měmpaněngkul᷊ẹ̌ si siạ, ute iạ kai sumimbang kere ini:

⁴Iạ e kai tạ hinone makatarimạ u kakaěng dingangu lainung ual᷊ingu munaraku?

⁵Iạ e kai ta hinone mẹ̌bawa sěngkatau wawine kawingu taumatan Sahani e sěngkaral᷊eng dingangku kere su manga tuarin Mawu Yesus dingangu manga rarolohang bal᷊ine e, kere i Petrus?

⁶Arau kai i kanduan Barnabas kapapianẹ e mědeạ biahẹ̌ hala e tangu?

⁷Tawẹ bẹ̌ke sordado e mangongkosẹ̌ batangenge sẹ̌sane su ral᷊ungu wuntuangu mẹ̌sasekẹ e! Tawẹ apa mělahěnsinuange mẹ̌suang anggorẹ̌ e su waele kụ tamakakaěng buane! Tawẹ apa mělal᷊ukadu domba e, kụ tawe měnganginung susu wọu manga dombane!

⁸Iạ e maul᷊ị u ini e wal᷊inewe kětạu itẹ̌tuhụ tundu ěllo-ěllo, kaiso kawe lai ual᷊ingu pẹ̌paul᷊ikangu Winohẹ Susi e.

⁹ Su ral᷊ungu bukẹ̌ i Musa e kạbawohẹ u, ”Kereu sapi e kapẹ̌dal᷊indane gandung pạnontongang buane wọu wul᷊ihe ute, kumbahangbe hakutang mohonge.” Kai mẹ̌sẹ̌mpị sapi e tangu Mawu Ruata?

¹⁰Arau kai ene ngae timonane si kitẹ? Těngadẹ̌ bue ene e niwohẹ baụgi kitẹ. U taumata mẹ̌bawaele ringangu měmamurẹ̌sine gandung e sembeng hinone mẹ̌karadiahang dingangu pělaharapẹ̌ mědeạu makatarimạu sěngkamonaěng bọu něnggạ u hal᷊ẹ̌ e.

¹¹ I kami e seng něnawuhu wineng marohkẹ̌ si kamene. Tangu kamageng i kami e makapaměnsạ, bọu rarotong i kamene, ute měnsang i kami e mạnuntụ něngalembong kal᷊awọe wọʼi kamene?

¹²Kamageng taumata wal᷊ine e nakapẹ̌tambaweng kawasa ini e si kamene, ute kai wal᷊inewe i kami e něngalembo l᷊ai piạ hakẹ̌ e wọu i sire tangu? Kai iạ e wẹ̌dawen tawẹ nẹ̌pakẹu kawasa ene. Kaiso iạ e maěndokangbe měnal᷊udẹ̌ patikụ e sul᷊ungkeng iạ e makakoạ sasahaghe su pělahabaru Injili Kristus e.

¹³ I kamene tantu masingkạ bue u isain měmunara su ghaheda něnarimạ u pẹ̌bawiahʼi sire wọu ghaheda. Dingangu i sain měngangurusẹ̌ sasěmba e, makareạbe wahageange wọu sasěmba nisarakang sene.

¹⁴ Kerene lai Mawu e seng něnilakehẹ̌ u taumata apam měmpělẹ̌habaru hengetang e hinong makaěbạ biahe wọu pělahabarẹ̌ ene.

¹⁵Kaiho iạ mamben tawẹ nẹ̌pẹ̌pakẹ u tamai ene sarang kadidị. Dingangu iạ e namohẹ u ini e wal᷊inewe lai iạ piạ kapulu tadeạu kěbị-kěbị ene e koateng si siạ e. U iạ ěndobem mate, sul᷊ungu kailangeng u apan makạl᷊ahimpulu si siạ e.

¹⁶U, kereu měhabaru Injilẹ̌ e, ute iạ tawe hinone lumesạ u watangeng batụu Mawu Ruata e seng něngoro pẹ̌kẹ̌koạ ene. Kụ kaěngkěhang iạ e, kereu iạ tawe měhabaru Injilẹ̌ e!

¹⁷Andene kapuluwen naungku e měkoạbe ene ute iạ e makaěbạbe tatendenge. Kai iạ něhabaru Injilẹ̌ e watụ u kai pẹ̌tatangkiang niumbala si siạ. Iạ e piněnarakanengu Mawu Ruata e pěděndal᷊engu ene.

¹⁸Kamageng kerene ute, apa wue tangu tatendenge si siạ? Kai ini e tatendenge: U iạ e makapěluntingihu Injilẹ̌ e tawe makakawěhạ si sai-sai kụ hinong měmaehẹ̌ si siạ, u iạ e tawe manuntụ apa-apa kere sěngkatau mělahabaru Injilẹ̌ e.

¹⁹Iạ ini e wal᷊inewe ěllang i sai-sai; watụ u iạ e kai taumata měngkate kere ěllangu kěbị. Iạ e měkẹ̌koạ kere tadeạu iạ e makauntuwe sěngapang kakěpal᷊e waugʼi Kristus.

²⁰Baugu tau Yahudi e, iạ e mẹ̌těngkakoạ kere tau Yahudi e, tadeạu iạ makawitaugẹ̌ tau Yahudi baugʼi Kristus. Baugu taumata mẹ̌bẹ̌biahẹ̌ tutuhụ toratʼi Musa e, iạ e nẹ̌těngkasul᷊ung i sire al᷊ingkai wẹ̌dang mạsasěllung su toratẹ̌ maningbe sěmbal᷊iau iạ e wal᷊inewe mạsasěllung su toratẹ̌. Iạ měkẹ̌koạ kerene e tadeạu iạ e wotonge makawol᷊eng si sire makoạ tumatuhụ si Kristus.

²¹Baugʼi sire wal᷊ine Yahudi e, iạ e mẹ̌těngkasul᷊ung kere sěngkatau wal᷊ine Yahudi e, kụ tạ torati Musa. Iạ mẹ̌kẹ̌koạ kerene e tadeạu iạ makakawol᷊eng si sire makoạ tumatuhụ si Kristus. Kaiso ene e wal᷊inewe mạanun iạ e ta tumatuhụ su manga titan Duata; kaiso kai ual᷊ingu kakanoạ u kawasang hengetangi Kristus.

²²Sutal᷊oaran taumata pangangimange lome e, iạ e mal᷊aing mẹ̌tẹ̌těngkakoạ kere tau lome pěngangimange tadeạu iạ makawol᷊eng si sire makoạ tumatuhụ si Yesus Kristus. Hatede, iạ e měngkatewe mẹ̌tẹ̌těngkasul᷊ungu kěbị e mẹ̌deạu kěbị taumata e manimbeng sural᷊enge kereapa tadeạu iạ e makapangambangbe sěmbahageange woʼi sire.

²³Kěbị ene e takụ kẹ̌koatenge waugu Injilẹ̌ bọu Mawu Ruata e, tadeạu iạ e makatarimạ u al᷊amatẹ̌.

²⁴I kamene tantu masingkạ u su ral᷊ungu pẹ̌tatandungu mahuntal᷊ange ute kěbị e mạhuntal᷊ang bue, kaiso kẹ̌tạeweng sěngkatau makapanarimạu pěreisẹ̌. Ual᷊ingu ene ute tal᷊angko pakatoghasẹ̌ sarang i kau makahombangbe pěreisẹ̌ e.

²⁵I saing kụ makěhagẹ̌ mẹ̌nẹ̌naungu tandunge, kụ mẹ̌tẹ̌tingkědang su kěbị haghi e. Ute i sie mẹ̌kẹ̌koạ ene e ual᷊ingu i sie kai mapulu makisangẹ u bungangʼi sain makauntung, kai kawe bungang mal᷊ighạ malolang. Arawe i kitẹ e kawe mẹ̌pẹ̌puhẹ̌dangu patikụ sạbarange u i kitẹ e kawe mapulu makisangẹ u bungang tamalalolang.

²⁶Kai ene hakịu iạ e tumal᷊angbe piạ timonane matuntụ. Mẹ̌sul᷊ungu su tandingu koka, iạ e abe měngkai mạngoka winangaeng.

²⁷Iạ e měngkai mạnarakangkeng badangku e suahạ e matoghasẹ̌ sarạeng iạ e makatal᷊udẹ̌ e. Iạ mẹ̌kẹ̌koạ kerene e watụ u iạ e tawe mapulu sarang mariadi u sarangke iạ e wọuten němaringang taumata wal᷊ine e apatol᷊e pětandungange, kai iạ sẹ̌saku e kawe suhudang.