Read Sangir 2 KORINTUS 1 Bible Online

2 KORINTUS 1 - Sangir bible

2 KORINTUS 1

¹ Manga anạ u sěmbaụ jamạatʼu Mawu su Korintus dingangu kal᷊awọu kawanuan Duata su kaguwạu Akaya. Iạ e, i Paulus, darolohang i Kristus Yesus, nihengkẹ ual᷊ingu kapulum Mawu ringangu anạ u sěmbaụ i kitẹ i Timotius,

²mělẹ̌harapẹ̌ u mal᷊owọko Ruata i Amang i kitẹ e ringangu Mawung kitẹ i Yesus Kristus mangonggọu al᷊amatẹ̌ dingangu karal᷊unsemahẹ̌ si kamene.

³Dalo su Mawu Ruata, i Amang u Mawung kitẹ i Yesus Kristus. I Sie kai i Amang naunge mapia kahěngang, dingangu i Sie kai Ruata kụ nangonggọu kuatu pangangimang su taumata.

⁴I Sie mạnoghasẹ̌ naung i kami suapan tempon sigěsạ kụ lụhombang si kami, tadeạu ringangu toghasẹ̌ kụ nikahombangeng i kami wọu Ruata e, i kami e mal᷊aing makapěnoghasẹ̌ naungu kěbị taumata apang su ral᷊ungu sigěsạ e.

⁵Haghin sigěsạ kụ lụhombang si Kristus e seng mal᷊awọ lai kinahombangeng i kami. Kụ mal᷊aing su ral᷊ung i Kristus e naung i kami nipakatoghasẹ̌.

⁶Kamagengu i kami e hombangenge, ute ene kai waugu kal᷊aiakingu, waugu kasasal᷊amatu. Kereu kal᷊aiaking i kami e nitoghaseng, tangu i kamene e mal᷊aing natoghasẹ̌ dingang hakịu i kamene makapẹ̌dẹ̌dararagẹ̌ su haghin sigěsạ kerẹewe seng lụhombang si kami e.

⁷I kami e mang mạngiaking dingangu tawe ghiměgoẹ̌ mihino su manga anạ u sěmbaụ, batụu i kami masingkạu i kamene mal᷊aing měngkasigěsạ dingang i kami. Kụ ual᷊ingu ene tangu i kamene mal᷊aing niapakatoghasẹ̌ dingang i kami.

⁸ Manga anạ u sěmbaụ! I kami e mapulu tadeạu i kamene e masingkạ u sunsara kinahombangeng i kami e su Asia. Sigěsạ tẹ̌tal᷊udang i kami e mawěhạ tạ sihinge manědạ si kami, hakịu i kami e seng tawẹ harapu wědang lai mẹ̌biahẹ̌;

⁹pěndange ute mẹ̌sul᷊ungu seng ninawoěng u ponesẹ̌ pateěng. Kaiso hal᷊ẹ̌ ene nariadi kai tadeạu kumbahangbe i kamene mangumbala su kuatu watangeng hala, kaiso kawe su Mawu Ruata kụ mạmiahẹ̌ taumata nate.

¹⁰Kụ seng i Sie něliwiri kami e wọu ghěnggang masaria makapate e.[1] Kụ mal᷊aing i Sie sarung mapakasal᷊amatʼi kami e su ěllo samuri, u kai i Sie e pẹ̌ngumbal᷊erang i kami e.

¹¹I kami e mal᷊aing mạngimang ual᷊ingu pẹ̌kakal᷊iomaneng i kamene si kami e tangu Ruata e sarung mangambang i kami e kapia wọu silakạ. Kụ Mawu Ruata e sadia měngal᷊amatẹ̌ si kami e kere sasimbang bọu kal᷊awọu kakal᷊iomaneng baugʼi kami, kụ ual᷊ingu ene sarung mal᷊awọ taumata mẹ̌tahimokoin tatarimakasẹ su Mawu Ruata e.

¹²I kami e lụl᷊esạ, batụu ral᷊ungu naung i kami e makạpangiaking si kami u pẹ̌bawiahi kami e su dunia ini — kahumotongange ute kai pẹ̌dal᷊ahěmpukang i kami e ringang i kamene e seng kinoạ i kami e ringangu karaki matul᷊idẹ̌[2] dingangu kawawurěsi e. I kami měkẹ̌koạ ene, bal᷊inewe ual᷊ingu kapelesan taumata e, kaiso kawe ual᷊ingu katoghasẹ̌ nionggọu Mawu Ruata.

¹³Apang nịbawohẹ i kami e si kamene ute kai kětạeng mạanung apang ikawasa ringangu kaěnnaěng i kamene. Orasẹ̌ ini e i kamene tawe makaěnna kahěngang, kai iạ e mělẹ̌harapẹ̌ u i kamene sarungbe makaěnna mapia-pia si kami. Ual᷊ingu kawe kerene, tangu su tempong Mawu Yesus sarung duměnta ute, i kamene rụl᷊iagi kami, kerẹewe lai i kami e mal᷊aing rụl᷊iagi kamene.

¹⁵Ual᷊ingu pangangiaking ene e tangu su tětạ e iạ měkẹ̌karaki mapulu mẹ̌tiwo si kamene tadeạu i kamene makahombang al᷊amatẹ̌ duan sul᷊e.

¹⁶ Iạ e kai měkẹ̌karaki u mẹ̌tiwo si kamene mạeng u iạ sol᷊ong Makedonia kụ saụ motong mạeng seng mẹ̌sul᷊e tadeạu i kamene makatonda wue si siạ maněpasu raral᷊eng sol᷊ong Yudea.

¹⁷Kaiso iạ e kai seng němal᷊ui kědoku e; kụ měnsang ene ute mělẹ̌lahẹ u kapuluku nasal᷊unsuhẹ̌ e arau? Kụ piạ e iạ kapẹ̌lẹ̌hingide tangu, měnsang pělal᷊ahingidẹ̌ku e kai ual᷊ingu kapuluku hala, kụ sal᷊ạ e měběra u, ”Ore”, tawe nararěnnạ sembengkewe nẹ̌bera u, ”Tala”?

¹⁸Baugu Mawu Ruata e kụ pangimangeng e, diandiku si kamene tangu wal᷊inewe, ”Ore”, ringangu, ”Tala”.

¹⁹ Batụu i Yesus Kristus, Ahusu Ruata e kụ seng nihabarẹ̌ si kamene kahian Silas, Timotius, ringangkeweng iạ sẹ̌saku e wal᷊inewe taumata ”Ore” ringangu ”Tala”. Kaiso kawe i Sie nakoạ sasimbang u ”Ore” wọu anun Duata.

²⁰Kụ kai limiun Sie Ruata e seng něhengetang u, ”Ore” su patikụ apang nikědonʼE. Kai wọu ene pinamanggilangu wawerang kitẹ, ”Aming” su Mawu Ruata ual᷊ingu i Yesus Kristus. I kami e měkẹ̌koạ kerene tadeạu Ruata e iapakawantugẹ̌.

²¹Duata sẹ̌sane seng niapakakauhi kitẹ e matoghasẹ̌ dingang i Kristus; kụ seng i Sie lai němile si kitẹ e samatang baugʼi Sie.

²²Baugu ene tangu, Ruata e seng něnarimạ i kitẹ e nakoạ tataghuanenge ringangu nangonggọu Rohkẹ̌ e su ral᷊ungu naung i kitẹ, nakoạ kere papaiang u i Sie mang sarung mangonggọ u kěbị apan nikědonʼE si kitẹ e.

²³Duata e sahidiku — watụ u i Sie kai masingkạ u ral᷊ohon naungku — u iạ e tawe nisěhụ sol᷊ong Korintus, u iạ e tawe mapulu mapakasusan naung i kamene.

²⁴Iạ e tawe manihasa si kamene su hal᷊ẹ̌ u apan ilẹ̌iaking i kamene, batụu i kamene mambeng mạngimang matoghasẹ̌ si Kristus. Iạ tumbạ u mapulu sěngkapěmunara ringang i kamene tadeạu i kamene mangkeng kakạl᷊unsemahe.