Read Sangir 2 KORINTUS 10 Bible Online

2 KORINTUS 10 - Sangir bible

2 KORINTUS 10

¹Orasẹ̌ ini e iạ, i Paulus e kai piạu takụ ipaul᷊ị si kamene. Iạ ini e, angkuěng i sire e, kai masikome naungku e kereu mẹ̌těngong kamene, arawe mạeng mararau e wahani. Kụ ual᷊ingu kasasikome ringangu kapian naung i Kristus,

²ute iạ mẹ̌dorong sěngapam botonge kumbahang kawe sarang makasihasang iạ mẹ̌koạ matětogẹ̌ si kamene kamagengu iạ marěnta. Batụu iạ e měkẹ̌karaki mědeạu mẹ̌koạ mahasa si sire apang měmpẹ̌bẹ̌bera u pělahal᷊ẹ̌ i kami e kai piạ timonane mạdunia.

³I kami e těngadẹ̌ bue wědaweng měbẹ̌biahẹ̌ su dunia e, kaiso i kami e tawe mẹ̌kakaradiahang kụ mẹ̌ngumbala su timonang mạdunia.

⁴Manga aghidẹ̌ ipẹ̌kẹ̌karadiahang i kami e wal᷊inewe aghidu dunia ini, kaiso kai manga aghidu Ruata makawasa. Kụ dingangu manga aghidẹ̌ ene i kami e měgěnggoghahẹ̌ manga těndạ; ipěnẹ̌nighe kal᷊awọu pẹ̌dararendehẹ̌,

⁵dingangu ipạněnehẹ̌ kal᷊awọu těndạu kal᷊aobotẹ̌ nịbawětị baugu ipẹ̌děndokạ kasingkạu mạanun Duata. I kami e měnẹ̌naweng tiněnnan sire e ringangu měmẹ̌matạ si sire tadeạu mẹ̌samal᷊ẹ̌ si Kristus.

⁶Kụ kamageng u i kamene sembeng tụtuhụ dingangu kạguwạu naung ute i kami e seng sadia měhukungu apan tawe tumatuhụ.

⁷I kamene e kai hinong makahěngang mapia-pia kakakoạ e tutune. Kereu piạu pẹ̌sěngkatau maiaking u i sie kai tataghuaneng i Kristus, ute i sie kai hinong měnal᷊ěntihọ batangenge ringangu masingkạ u i kami e mal᷊aing tataghuaneng i Kristus kerẹewe i sie.

⁸Iạ e tawe mamea kamageng iạ hinong limembong kasaune lumesạ u kawasa kụ seng nionggọ u Mawu e si kami, u kawasa ene nionggọe kai waugu ipạmětị si kamene, kai wal᷊inewe tadeạu ipěnggoghahẹ̌.

⁹Iạ mạdiri wue i kamene kawe mạngěnnau suratẹ̌ku e kawe ipẹ̌matakụ si kamene.

¹⁰Taumata e měmpẹ̌bẹ̌bera u, ”Apan suratʼi Paulus e mal᷊ahoto, ringangu mananěnggạ, arawe kereu i sie ene sutal᷊oarang kitẹ, i sie masikome ringangu wisarane tawẹ mangal᷊ene apa!”

¹¹I sire apang kerene hinong masingkạ u kereu i kami e ene sutal᷊oarang kamene, pẹ̌kakoạ i kami e sěndal᷊eng dingangu apan nịbawohẹ i kami su apan suratʼi kami e.

¹²Sembeng nal᷊ahẹ u i kami e tawe wahani manul᷊ung arau mẹ̌těngkahengkẹ u watangeng i kami e sěntara ringangu apang kụ mẹ̌pẹ̌pěndang batangenge marangẹ. Kai apạ e kal᷊ongong i sire! I sire mẹ̌kẹ̌koạ sasukạ hala kụ mạngukurẹ̌ batangeng i sire ringangu sasukạ i sire.

¹³I kami e wal᷊inewe kerene. Kereu i kami e mahul᷊esạ, i kami e tawe rumal᷊iu kětakenge. I kami e mạngětạewe su kětakengu munara seng nipoěngu Mawu Ruata waugʼi kami e. Kụ i kamene mal᷊aing nataho su ral᷊ungu pẹ̌saraěng ene.

¹⁴Kụ kamagengu i kami mẹ̌tiwong Injilʼi Kristus si kamene ute i kami e tawe lumiu wọu pẹ̌kẹ̌takengu pělahal᷊ẹ̌kang i kami e.

¹⁵I kami e tawe mẹ̌dalo watangeng i kami ual᷊ingu saghedu taumata wal᷊ine kụ sul᷊ikudu kẹ̌takenge tuhụ nipoěngu Mawu Ruata e si kami. Kaiso i kami e kawe mang su ral᷊ungu pẹ̌kẹ̌takenge kerẹewe seng nipoěngu Mawu Ruata e waugʼi kami, ringangu mạngiaking u i kamene mangkeng mạngumbala si Kristus, tadeạu i kami e wotonge makakoạ munara limembong kasěllahe sutal᷊oarang kamene.

¹⁶Ual᷊ingu kerene ute i kami e mal᷊aing makạpělẹ̌habaru Injilẹ̌ e su manga soa wal᷊ine kụ tawahal᷊uasu harusẹ̌ lumesạu watangeng ual᷊ingu hal᷊ẹ̌ kụ seng nauadipẹ̌ su pělahal᷊ěkang u tau.

¹⁷ Su ral᷊ungu Winohẹ Susi e kạbawohẹ, ”I saing kụ mapulu piạu ilesạ ute kěnangko lẹ̌lesạu apang seng nikoạ u Mawu e.”

¹⁸U taumata rẹ̌daloěnge ute kai taumata kụ dẹ̌daloěngu Mawu, wal᷊inewe taumata kụ mědẹ̌dalo watangenge.