Read Sangir 2 KORINTUS 2 Bible Online

2 KORINTUS 2 - Sangir bible

2 KORINTUS 2

¹Ual᷊ingu ene iạ e sen namutusẹ̌ u seng tawe saụ duměnta su ral᷊ungu pẹ̌tatiwo kụ makạkěndung naung i kamene.

²U kamageng u iạ e kawe mapakasusan naung i kamene, ute i sai wue makakahiborẹ̌ naungku, kereu wal᷊inewe naung i sire kụ naunge seng bọu takụ niapakasusa tangu?

³Kai ual᷊ingu ene hakịu iạ nakapěmohẹ u suratẹ̌ ene si kamene. Iạ e tawe mapulu mẹ̌tiwo si kamene, kụ bọu ene kawe ipakasusang kamene, sěmbal᷊iau kawe i kamene hinong mapakal᷊uasu naungku e. Batụu iạ mạngiakingu kamageng u iạ e mal᷊uasẹ̌, tangu kerene lai i kamene mal᷊aing mal᷊uasẹ̌ kěbị.

⁴Iạ e něnuratẹ̌ si kamene e, naungku e masusa ringangu mawěhạ, mase ringangu tatědọ u ěllo mata mal᷊awọ. Kapuluku e tangu wal᷊inewe mapakasusan naung i kamene, kaiso kawe tadeạu i kamene makahěngangu iạ kawe kụkěndagʼi kamene.

⁵Kereu piạu napakasusan naung, tangu hal᷊ẹ̌ nikoạ e ene tawe nihino su watangengku, kaiso kawe nihino su manga anạ u sěmbaụ kěbị arau mẹ̌těngkakadodọ su sěmbahageang bọu i kamene. U iạ e tawe mapulu tumanị e mahasa su těngone.

⁶Baugu taumata kerene, hukumang piněllọu kal᷊awokang e wọʼi kamene e, seng kapapiane.

⁷Orasẹ̌ ini e i kamene hinong mẹ̌gěllịu ampung si sie ore lai hinong bahansangeng tadeạu i sie tawe tumanịe masusa kụ sarang měnsu naunge.

⁸Ual᷊ingu ene iạ e mědẹ̌dorong, tadeạu i kamene saụko pěmpěnodẹ u i kamene mamben těnga-těngadẹ̌ kụkěndagʼi sie.

⁹Iạ e nakapanuratẹ̌ si kamene mědeạu měmẹ̌manikạ si kamene, měnsang i kamene hanesẹ̌be tutuhụ apan takụ ilẹ̌ahạ e.

¹⁰Kereu i kamene mẹ̌gěllịu ampung su taumata apan seng nẹ̌sal᷊a si kamene ute, iạ e mal᷊aing mẹ̌gěllịu ampung su taumata ene. U apan seng takụ niampungang kereu mambeng piạu hinong ampungang — ene seng takụ niampungang — su těngon Kristus baugu kapiang kamene.

¹¹Takụ kẹ̌koateng ene tadeạu setang e kumbahangbe makareạ loahe mědeạu mẹ̌kawasa si kitẹ; batụu i kitẹ e masingkạbeng kal᷊awọu karakine.

¹² Su tempon iạ nahumpạ su Troas, mědeạu makapěhabaru Injilẹ̌ mạanung Kristus e, Mawu e seng nanope ral᷊eng baugu iạ tadeạu makapěmunara sene.

¹³Arawe iạ e kai taghiawahẹ̌ batụu tawe nẹ̌sombang u anạ u sěmbaụ i kitẹ i Titus paị sene. Tangu iạ e kai nẹ̌katạ u manga anạ u sěmbaụ sene mase nakoạ sol᷊ong Makedonia.

¹⁴Tarimakasẹ su Mawu Ruata! I Sie hanesẹ̌ mạngahạ i kami tadeạu apatol᷊e ghapaěngu kal᷊auntung i Kristus batụu i kami nẹ̌biahẹ̌ nasěmbaụ dingangʼE. Duata e nẹ̌pakẹ i kami tadeạu wal᷊on habarʼi Kristus e makeke kere ral᷊uru mawěngi kụ lumiwung su kạguwạu weọ e.

¹⁵Batụu i kami e kai tabidạu ral᷊urung kamania mawěngi, kụ nitutung i Kristus baugu Ruata. Suapan taumata kụ kapẹ̌tẹ̌timonane kawawinasa e, i kami e mẹ̌sul᷊ungu ral᷊urung papate kụ mamihua; kai arawe waugu taumata apang mětẹ̌timona kasasal᷊amatẹ̌ e, i kami ini e kai mẹ̌sul᷊ungu ral᷊uru mawěngi kụ makạděntang pẹ̌bawiahẹ̌. Tangu i saị e ngae makaitụ parenta ini e?

¹⁷I kami e wal᷊inewe kere taumata l᷊awọ o kawe měkẹ̌koạ hengetang u Mawu e kere apal᷊iwụ ipạhumbal᷊ụ. Timonang kami e kai matul᷊idẹ̌, batụu i kami e kai nioron Duata. Kụ Duata sẹ̌sane e makạsilo u i kami e mạngekeng habarẹ̌ ene mẹ̌sul᷊ungu manga ěllang i Kristus e.