Read Sangir 2 KORINTUS 3 Bible Online

2 KORINTUS 3 - Sangir bible

2 KORINTUS 3

¹Kụ měnsang ini kěllaěng e saụewe mẹ̌sul᷊ungu i kami e měmpẹ̌dẹ̌dalo watangeng i kami e ngae? Arau kai měgẹ̌gausewe suratu makịdarumalo si kamene arau wọʼi kamene kerẹewe ghẹ̌gausangu taumata wal᷊ine?

²I kamene hala e kai suratẹ̌ daralo waugʼi kami e, kụ kạbawohẹ su ral᷊ungu naung i kami kụ kẹ̌kasingkateng dingangu ikẹ̌kawasang kěbị taumata.

³ I sire hala e seng nakasilo u i kamene al᷊ingkai suratẹ̌ nịbawohẹ i Kristus, kụ seng niringọ limiung kami. Suratẹ̌ ene wal᷊inewe niwohẹ u tinta, kaiso kawe ringangu Rohkẹ̌ u Ruata kụ biahẹ̌; bal᷊inewe lai su watulei, kaiso su ral᷊ungu naungu taumata.

⁴I kami e nẹ̌bera kerene ual᷊ingu kal᷊aiaking i kami e su Mawu Ruata su ral᷊ung i Kristus.

⁵I kami e tawẹu pamanggilange sarang kadodọ baugu mapakal᷊ahẹu i kami e makaumal᷊ẹ̌ mẹ̌koạ munara ini, kaiso kai Ruata e něgěllịu katoghasẹ̌ ene si kami e.

⁶ Kai i Sie nakaual᷊i si kami e wotonge makoạ mẹ̌tatangkiangu sěmbaụ pẹ̌dariandi wuhu kụ ilẹ̌umbala su Rohkẹ̌ u Ruata, bal᷊inewe su atorang kụ mạbawohẹ. U apang mạbawohẹ e kai makạual᷊i papate, arawe Rohkẹ̌ u Ruata e kai makạual᷊i pẹ̌bawiahẹ̌.

⁷ Su tempon pẹ̌dariandi makạpate e nikoạ dingangu nipakang su watu, kawantugu Ruata e siměnnang mạtuahẹ̌ su ghating Musa. SěnnangʼE měngkate apa kụkerong hakịu kawanuang Israelẹ̌ e tawe makatohạ tumingang gating Musa, manilaing sěnnange su ghatine e su orasẹ̌ ene seng mạnětạ kakạparunge su tempo ene. Tangu kereu pẹ̌tataingu pẹ̌dariandi kụ makạbunạu papate ene niaku ringangu niapakawantugẹ̌ kereng kasariane,

⁸nal᷊ahẹ, u pẹ̌tataingu pẹ̌dariandi kụ nionggọu Rohkẹ̌ u Ruata e, nighuanting demben lai limembong kawantuge.

⁹Kereu pẹ̌dariandi kụ měhukungu taumata ene apạe kụkuhenabẹ̌, ute dumakelengke lai něngalembong kawantuge pẹ̌dariandi kụ makạual᷊i taumata e měsẹ̌sěngkapian Duata e.

¹⁰Botonge ikawera u apang kụ nạung mawantugẹ̌ e, ute sen tawẹ kawantuge lai ual᷊ingu kawawantugu orasẹ̌ ini e.

¹¹Kereu mangạ e apa kụ kědang e kětạeng sěngkatempo, seng kerene kawantuge, nal᷊ahẹ u manga apạeweng kakalẹ̌ e mal᷊aing nangělembong kawantuge.

¹²Ual᷊ingu i kami e kawe piạ pangangiaking kerene, tangu i kami e wahani mahumbera kerene.

¹³ I kami e wal᷊inewe kere i Musa kawe mělẹ̌hěmbung gatine ringangu tatimbuhung tadeạu tau Israel tawe makasilo tualagu Mawu e kạkapurạ e ringangu mapuạ bọu ghatine.

¹⁴Naung i sire e seng natimbuhung. Kutẹu sarang orasẹ̌ ini naung i sire wědang kạtatimbuhung su tempong i sire kapěbẹ̌basane manga bukẹ̌ u Pẹ̌dariandi Těbe e. Tatimbuhung ene hědong mal᷊ekesẹ̌ kereu taumata e masěmbaụ dingang i Kristus.

¹⁵Orasẹ̌ ini lai, kereu i sire měmpẹ̌basa manga bukẹ̌ i Musa, tangu tatimbuhung ene mal᷊aing bědang mělẹ̌hěmbung tiněnnan sire.

¹⁶Kai kereu pẹ̌sěngkatau e ruměnta mẹ̌těngon Mawu e, tatimbuhung ene mal᷊aing lekesang bọu ghatin taumata ene.[3]

¹⁷Tangu, Mawu kụ iwẹ̌bera sini e ute kai Rohkẹ̌ u Ruata e. Kụ suapang Rohkẹ̌ u Ruata e ene, ute sene mal᷊aing piạ karal᷊iwirẹ̌.

¹⁸Orasẹ̌ ini e ghating kitẹ kěbị e tawe nitimbuhungang, hakịu i kitẹ e kai mạpasěnnangu kakerong u Mawu Yesus. Kụ ual᷊ingu ene i kitẹ e měngkai hanesẹ̌ tẹ̌tal᷊imbuhuang pakạkoạ mẹ̌sul᷊ung i Sie; kụ kakạděngụe i kitẹ e mangkeng kakạtualage. Kụ katatualagẹ̌ ene tangu kai wọu Rohkẹ̌, mase Rohkẹ̌ ene ute kai Mawu e.