Read Sangir 2 KORINTUS 4 Bible Online

2 KORINTUS 4 - Sangir bible

2 KORINTUS 4

¹I kami e měkẹ̌koạ munara ini kai ual᷊ingu karal᷊ondon naungu Mawu Ruata. Kai ual᷊ingu ene hakịu i kami e tawe ikasasuen tiněnna.

²I kami e tawe tumatol᷊e kakakoạ u munarang kararěndung kụ makạmamea. I kami e mạdiri měmunara kụ mẹ̌pakẹu kapande ipangakal᷊ẹ̌ arau měmaleleng hengetangu Mawu. I kami e mẹ̌tangkiang Mawu ringangu naung burěsi kerẹewe kapulunʼE. Ual᷊ingu ene, i kami mělẹ̌harapẹ̌ u kěbị taumata e měngẹ̌ngarěgangbeng i kami e mapia su ral᷊ungu kawawurẹ̌sin naunge.

³Kereu Injilẹ̌ kụ ilẹ̌habarʼi kami e wědang l᷊aing ta kinahěnganeng, ute kate i sire apang mětẹ̌timona kawawinasa e tawe nakạhěngang.

⁴Mahang duata měngẹ̌ngawasa dunia ini e něhěmbung tiněnnan sire apan tawe měmpangangimang. Kai i sie měnẹ̌nahaghe si sire tadeạu i sire tawe makasilo tualagu Injilẹ̌ e mạanung kasěllahʼi Kristus, nakoạ kere awẹ u Ruata.

⁵Habarẹ̌ kụ ilẹ̌humpạ i kami e wal᷊inewe wěke mạanung kami hala e. Habarẹ̌ ene kai mạanung Yesus Kristus; u i Sie kawe Mawu; kụ i kami e kai mẹ̌tatangkiang si kamene ual᷊ingu i Sie.

⁶ Mawu Ruata e kawe něhengetang, ”Apasarangko tualagẹ̌ e wọu marěndung e,” Duata ene lai napasěpụ u tualagẹ̌ e su ral᷊ungu naung i kitẹ e tadeạu tiněnnang kitẹ e matualagẹ̌ sarang makahěngang kawawantugu Ruata kụ suměnnang su ghating Kristus.

⁷Kaiso arětạ marohkẹ̌ e kereng kawantuge ene, kai mạdal᷊uhe su watangeng i kami tạ arěgane ini kụ asal᷊e wọu ěntana. Ual᷊ingu ene nal᷊ahẹ e u kasěllahu kawasa ene kai su Mawu Ruata, wal᷊inewe si kami.

⁸I kami e lẹ̌aloěng bọu patikụ beọ e, kaiso i kami e tawe nasěsẹ. I kami e niwingọ e, kaiso tawe kinasueěngu tiněnna.

⁹Lawọ dụdokạ si kami e kai tawe mawawala i kami hala. Dingangu manilaing i kami taghal᷊ẹ̌ pẹ̌pahangeng sarang i kami pakaěnsu, kaiso i kami e tawe mate.

¹⁰Sěntiniạ i kami makạpěndang kapapohongu Mawu Yesus su watangeng i kami, tadeạu pẹ̌bawiahʼE mal᷊aing mariadi mal᷊ahẹ su watangeng i kami.

¹¹Karěngụeweng i kami měbẹ̌biahẹ̌ e, i kami měngkate hanesẹ̌ gụgěnggangu pateěng ual᷊ingu i Yesus, tadeạu ual᷊ingu kawe kerene ute pẹ̌bawiahʼi Yesus mal᷊aing iapakal᷊ahẹ su watangeng i kami e mẹ̌tate ini.

¹²Ini e mělẹ̌lahẹu su watangeng i kami papate e kai kapẹ̌kẹ̌karadiahange, kaiso i kami e kai lụluasẹ̌ batụu pẹ̌bawiahẹ̌ e kai kapěkẹ̌karadiahange su watangeng i kamene.

¹³ Su ral᷊ungu Winohẹ Susi e kẹ̌kaěbakeng bawera kere ini, ”Iạ e mạngimang, kụ kai ual᷊ingu ene iạ měbẹ̌bisara.” Kụ, mal᷊aing ual᷊ingu pěngangansang u pangangimang kerene, i kami e měbẹ̌bisara watụ u i kami e mạngimang.

¹⁴I kami e mẹ̌ngiaking u Ruata kụ seng napẹ̌biahu Mawu Yesus kạpia, mal᷊aing sarung mapẹ̌biahʼi kami e ringang i Yesus, kụ mẹ̌bawa si kitẹ e sol᷊ong těngonʼE.

¹⁵Patikụ ene ute kai waugʼi kamene. Batụu kakạl᷊awọe taumata makapěndang kakěndagu Ruata, mal᷊aing kakạl᷊awọe kal᷊iomanengu tatarimakasẹ ilẹ̌humpạ su Ruata; ual᷊ingu kerene tangu Mawu Ruata e niapakawantugẹ̌.

¹⁶Kai ual᷊ingu ene hakịu i kami e tawe lumaěnsu. Manilaing tuhụ mạbadang seng kakạsalobare, kai wọu sěmběkang pangangimang, i kami e hanesẹ̌ tẹ̌tal᷊imbuhuang apang kal᷊aěllo.

¹⁷Dingangu kasasusawe tawe sěngapa kawěhạ e ini kinahombangeng i kami, kětạengbeng pẹ̌kadodọ tempo, kai sarung makaual᷊i karal᷊unsemahẹ̌ tạ sihinge ringangu kakalẹ̌ si kami. Karal᷊unsemahẹ̌ ene limemboweng kasěllahe marau kereu isukạ su kasasusa ene.

¹⁸U i kami e tawe mẹ̌sasasěmpị apang ikẹ̌kasilo e, kaiso kai apan ta ikasilo. Apang ikẹ̌kasilo e kětạengbeng sěngkatempo e rarage, arawe apan ta ikasilo e kai kakalẹ̌ sarang karěngụe.