Read Sangir 2 KORINTUS 6 Bible Online

2 KORINTUS 6 - Sangir bible

2 KORINTUS 6

¹Ual᷊ingu i kami e kai měsẹ̌sasumbala su hal᷊ẹ̌ u Mawu Ruata e, ute i kami mělẹ̌harapẹ̌be sěngapam botonge si kamene, piawe i kamene mẹ̌gagholọ u kapian naungu Ruata e.

² Su ral᷊ungu Winohẹ Susi, Mawu Ruata e kai něhengetang, ”Su tempon niapakawala e, Iạ seng nakaringihẹ̌ si kau, kụ su ěllọeng kasasal᷊amatẹ̌ e, Iạ seng nẹ̌tul᷊ungi kau.” Pẹ̌tahěndungko pakapia, seng ini e tempone kụ niapakawala e. Kụ seng ěllo ini e ipakasal᷊amatẹ̌!

³I kami e tawe mapulu pẹ̌tatangkiang i kami e kawe ipẹ̌sal᷊a. Ual᷊ingu ene i kami e mẹ̌tawakal᷊i tawe mẹ̌gěllịu alasange apa si sai-sai waugu mẹ̌koạ ene.

⁴Ral᷊iune su patikụ sạbarang, i kami e měnẹ̌nodẹu i kami e kai manga ěllangu Mawu Ruata. Batụu Patikụ haghin sigěsạ e seng kinapěndangeng i kami e ringangu pẹ̌sasabarẹ̌,

⁵ i kami e lẹ̌limareng, tẹ̌tahungkutang, dingangu pẹ̌tẹ̌tatibuluang; i kami e mělẹ̌hal᷊ẹ̌ masěgadẹ̌, pẹ̌sěngkakuhuang e mạl᷊otahẹ̌ dingangu mạl᷊unusẹ̌.

⁶Kaiso měngkate ringangu naung burěsi, pelesa, naung manandu, ringangu kapian naung, manodẹu i kami e kawe manga ěllangu Mawu. I kami e mạngumpaedẹ̌be kahěnga-hěngang su tatal᷊ěntụ u Rohkẹ̌ u Ruata, ringangu pẹ̌kakakěndagẹ̌ tutune,

⁷dingangu su pělahabaru hengetang u Mawu ore lai kawasan Duata e i kami kai manga ěllangu Mawu Ruata. I kami e mẹ̌tẹ̌tumpaedẹ̌be su kapulun Duata nakoạ kere aghidʼi kami e baugu ipěnagheghe ringangu ipẹ̌tahutěndạ u watangeng.

⁸I kami e lẹ̌adateng, kaiso mal᷊aing lẹ̌hinakaneng, dẹ̌daloěng kaiso mal᷊aing tẹ̌tungkeaneng. Maningbe i kami e matul᷊idẹ̌ kaiso lẹ̌ěnsilangu tahapěngakal᷊ẹ̌.

⁹I kami e ikẹ̌koạ kere kẹ̌kawěgaěng kaiso kawe kẹ̌kasingkateng u kěbị taumata, tabidạu mẹ̌tate kaiso wědangbeng biahẹ̌. Maningbe i kami e tẹ̌tingkaitang, kaiso tawe mate.

¹⁰Maningbe naung i kami e iapakạsusa e kaiso měngkawe maral᷊uasẹ̌ lai. Kakěllaěngbe kasiang, kaiso i kami e kawe makạkalạ taumata l᷊awọ. Kakěllaěng i kami e tawẹ manga apa-apa, kaiso tuhụ hinone kawe nạung mạnaghuang patikụ sabarang.

¹¹Manga anạ u sěmbaụ ikẹ̌kěndagẹ̌ su Korintusẹ̌! I kami e mangukahu pěndang pakatualagẹ̌ si kamene. Patikụ dal᷊ungu naung i kami e seng nasueng ukahe.

¹²I kami e tawẹ naung i kami e kạbawuni si kamene, kětạbeng i kamene e mạnuhěsẹ u ral᷊ungu naung i kamene e si kami.

¹³Tangu iạ mẹ̌bisarạe kere su manga anạku e hala. Kụ naung i kamene e apakal᷊oahẹ̌ko waugi kami e.

¹⁴Kumbahangbe mẹ̌papuhehghẹ u taumata apan tawe mangangimang su Mawu Yesus; u kai tawe hinone. Kereapa wue mapia e mẹ̌tatambang dal᷊aị! Tawe nariadi tualagẹ̌ e mẹ̌dal᷊aụ u kararěndung.

¹⁵Tawe mariadi i Kristus mẹ̌sěngkanaung u setang. Kai apa tangú sul᷊unge wọu taumatan Sahani ringangu wal᷊ine Sahani?

¹⁶ Kai apa pěral᷊ahěmpukangu Wal᷊em Mawu ringangu wal᷊en mahan duata? I kitẹ e kai Wal᷊em Mawu, kụ kai Mawu Ruata wiahẹ̌. Mawu Ruata sẹ̌sane něhengetang, ”Iạ e sarung mẹ̌tanạ sutal᷊oaran sire, dingangu mẹ̌biahẹ̌ sěngkapẹ̌biahẹ̌ dingang i sire, Iạ e sarung makoạ Duatan sire, kụ i sire e sarung makoạ umatẹ̌-Ku.

¹⁷ Ual᷊ingu ene, těntangke i sire apam běgang Mawu e, kụ pěnggeangkong batangengu e wọu i sire. Kụ kumbahang-bahang mẹ̌dal᷊aụ u karal᷊amuhụ, tadeạu Iạ e sarungbe měnarimạ i kamene.

¹⁸ Iạ e sarung makoạ i Amang i kamene ringangu i kamene sarungbe mariadi manga anạ-Ku, kerene angkuěng u Mawu Kasěllahenge.”