Read Sangir 2 KORINTUS 9 Bible Online

2 KORINTUS 9 - Sangir bible

2 KORINTUS 9

¹Tumuhụ hinone seng tawahal᷊uasu iạ saụ měnuratẹ̌ si kamene hal᷊ẹ̌ u tatongka kụ seng kạdingọe sol᷊ong jamaatẹ̌ su Yudea.

²Iạ masingkạ u i kamene mambeng mapulu mẹ̌tul᷊ung, dingangu iạ seng lụl᷊esạ i kamene su tau Makedonia. Iạ e nẹ̌bera si sire u seng dokeng taung tamai nal᷊iu manga anạ u sěmbaụ su Akaya e seng sadia mangonggọu tatongka. Dingangu kaghaghising i kamene selaing makạbal᷊insahẹ̌ igasu sěmbahageang kasariang e wọu i sire.

³Kụ orasẹ̌ ini iạ měndolohi Titus dingangu irědua anạ u sěngkatau ene sol᷊ong anung kamene tadeạu apang ilẹ̌lesạ i kami mạanung kamene ute wal᷊inewe rụdato tawẹ gẹ̌sine. Kụ i kamene harusẹ̌be seng sadia, batụu iạ e nẹ̌bera si sire u i kamene mang seng sadia waugu ene.

⁴Iạ e ghụgěnggang u kamageng piạ i sire wọu Makedonia kụ tumol᷊e si siạ kereu iạ sol᷊ong anung kamene. Kụ kereu i sire makaěbạ u i kamene kai tawe nạsadia, ute hal᷊ẹ̌be makamea si kami sarung, u kawe seng naul᷊ị u i kami seng mạngumbalawe kahěngang si kamene. Dingangu i kamene hala e mal᷊aing sarung měngkamea.

⁵Kai ual᷊ingu ene hakịu iạ makạpěndangu hinong dumolohi sire ene anung kamene e kal᷊imona waugu ipangurusẹ̌ tatongka nạung seng nikědong kamene. Iạ e nẹ̌koạ ene tadeạu kereu iạ e seng marěnta, tatongkang kamene e seng mạdariahi. Ual᷊ingu kawe kerene ute, nal᷊ahẹ e nạung laonggọ i kamene nionggọben naung i kamene mal᷊uasẹ̌ wal᷊inewe ual᷊ingu nasihasa.

⁶Pẹ̌tahěndungko! I saing makěkidẹ̌ měnawon bine, mal᷊aing mahal᷊i ikapěnsạ e. Arawe maral᷊awọ měnawon bine tangu mal᷊aing maral᷊awọ ikapěnsạ e.

⁷Sěngkatau-sěngkatau e hinong měmpěngonggọ dingangu haěngu naunge. Kumbahangbe mangonggọ dingangu ria-ria arau ual᷊ingu nasihasa, u Mawu Ruata e kụkěndagu taumata kụ měmpạngonggọbe ringangu haěngu naungʼE.

⁸Mawu Ruata e kai kawasa mangonggọu al᷊amatẹ̌ ipědẹ̌dal᷊embo, tadeạu i kamene sěntiniạ makạhombang bue apang gausang i kamene; kụ i kamene sarungbe mạhěmpal᷊iu měmpẹ̌koạ mapia ringangu mẹ̌kakěndagẹ̌ e.

⁹ Su ral᷊ungu Winohẹ Susi e mạbawohẹ kere ini mạanun Mawu Ruata e: ”I Sie měnẹ̌nawuhẹ̌ baugu taumata kasiang; karal᷊ondon naungʼE kakalẹ̌ sol᷊ong karěngụe.”

¹⁰ Mawu e něndiahing bine waugu měnanawuhẹ̌ dingangkewen něndiahing kaěng baugʼi kitẹ. I Sie lai sarung měndiahi ringangu mapẹ̌dal᷊embong apang sẹ̌sawuhang i kamene, tadeạu kal᷊ondon naungu e mal᷊aing mahuntinamba.

¹¹Ual᷊ingu kerene ute i kamene sarungbe mẹ̌dal᷊embo su ral᷊ungu patikụ sabarang hakịeweng i kamene hanesẹ̌be makaonggọ dingangu kal᷊aěludẹ̌. Dingangu kal᷊awọu laonggọ i kamene seng pinẹ̌papahiạ i kami, kụ taumata l᷊awọ e měngkai makịtarimakasẹ su Mawu Ruata e.

¹²Batụu kakanoạ mapia kinoạ i kamene bal᷊inewe tumbạu sarung makatongka kakakawusu ral᷊ohon jamaatu Mawu samatang, kaiso mal᷊aing sarung makaual᷊i tatarimakasẹ u taumata l᷊awọ e su Mawu Ruata e.

¹³Kụ ual᷊ingu tul᷊umang kụ seng tinodẹ i kamene e, mal᷊awọ tau Sahani su Yudea e sarung mẹ̌dalo Mawu Ruata batụu i sire nakasilo kal᷊aiaking i kamene su Injilẹ̌ mạanung Kristus kụ tẹ̌tol᷊eěng i kamene e. Dingangu, i sire mẹ̌dẹ̌dalo Ruata e, ual᷊ingu i kamene e mal᷊aěludẹ̌ měmpạmahiạ si sire ringangu su kěbịewe lai wal᷊ine e apạewen piạ i kamene e.

¹⁴Tangu i sire sarung mẹ̌kal᷊iomaneng i kamene ringangu naung i sire makěndagẹ̌ si kamene watụ u kapian naungu Mawu Kasěllahenge si kamene.

¹⁵Karimạko i kitẹ e maněmbang tarimakasẹ su Ruata bọu pẹ̌daral᷊embon patikụ kakěndagʼE!