Read Sangir GALATIA 1 Bible Online

GALATIA 1 - Sangir bible

GALATIA 1

¹Manga anạ u sěmbaụ apan jamaatẹ̌ su kạguwạu Galatia; Iạ Paulus dingangu kěbị anạ u sěmbaụ Sahani apan dingangku, mělẹ̌harapẹ̌ milombọko Mawu Ruata i Amang i kitẹ dingangu Mawu Yesus Kristus mangonggọ u al᷊amatẹ̌ dingangu karal᷊unsemahẹ̌ si kamene. Iạ nakoạ rasulẹ̌ e bal᷊inewe ual᷊ingu taumata arau ual᷊ing nihengkẹ u taumata, kaiso kai ual᷊ingu i Yesus Kristus dingangu Mawu Ruata i Amang i kitẹ kụ seng niapẹ̌biahʼi Sie kapia wọu kapapohongʼE.

⁴Tumol᷊e kapulun Duata i Amang i kitẹ, i Kristus e nanarakang u watangenge nakoạ sasal᷊iung kal᷊awọu rosang kitẹ, tadeạu i kitẹ ipakasal᷊amatẹ̌ bọu tempong karal᷊aị ini e.

⁵Dalo su Ruata sarang marěngụ-děngụ. Aming!

⁶Iạ dụdal᷊inaụ u manga anạ u sěmbaụ! I kamene nịkakuin Duata ual᷊ingu tatal᷊ěntụ i Kristus,[1] arawe ini i kamene kawe kal᷊ighạe měmpẹ̌bilingu Ruata kụ tumol᷊e, ”injilẹ̌” bal᷊ine, su l᷊ikudu Injilẹ̌ bọu anun Duata.

⁷Tumuhụ dal᷊enge ute, tawẹ, ”injilẹ̌ bal᷊ine”. Kětạeng piạu mělẹ̌habaru ”injilẹ̌” mạanun Kristus si kamene ipẹ̌kẹ̌kakal᷊iu hakịewen makạkoạ ganohạ si kamene.

⁸Taumata kụ mělẹ̌habarʼu ”injilẹ̌” su l᷊ikudu Injilẹ̌ ilẹ̌habari kami e, ute walạe kere i sie pakihukung u Ruata, maningbe lai tau ene kawe i kami hala arau kawe malaekatẹ̌ bọu sorga.

⁹I kami seng bọu nẹ̌bera kal᷊imona, kụ ini e tangu sěnsul᷊eko l᷊ai iạ mẹ̌bera: taumata mělẹ̌habaru, ”injilẹ̌” bal᷊ine, su l᷊ikudu Injilẹ̌ kụ seng kinatarimạ i kamene wọi kami e ute taumata ene mạpiangbe nịlahukungu Ruata.

¹⁰Kụ kiwụau ual᷊ingu ene tangú kai iạ mangạ e mělẹ̌harapẹ̌ ilẹ̌akun taumata? Mambeng tala! Iạ kětạeng mělẹ̌harapẹ̌ pěngangakun Duata. Apa měnsang iạ kai kạpẹ̌ngẹ̌ngal᷊ạ e naungu taumata tadeạu makal᷊uasẹ̌ naungu taumata? Kereu iạ bẹ̌dang mẹ̌kẹ̌kọa kerene ute, wal᷊inewe ěllang i Kristus.

¹¹Manga anạ u sěmbaụ harusẹ̌ masingkạ u Injilẹ̌ takụ nihabarẹ̌ e wal᷊inewe wọu taumata.

¹²Iạ e tawe manarimạ u habarẹ̌ ene wọu taumata, ringangu tawẹ u sarang sěngkatau l᷊ai kụ naněntiro si siạ. I Yesus Kristus sẹ̌sane e nělahẹ u ral᷊ohon Injilẹ̌ ene si siạ.

¹³ Tantu i kamene seng nakaringihẹ̌ mạanung pẹ̌bawiahẹ̌ku nạung kal᷊imona kere sěngkatau tumatol᷊e agaman Yahudi. I kamene masingkạu kereapa kahẹ̌gise iạ mẹ̌koạ jamạatʼu Mawu ringangu kereapa kasẹ̌gade iạ mẹ̌deạu makapěminasa.

¹⁴ Su hal᷊ẹ̌ u měndal᷊engu agaman Yahudi, iạ nangělembo wue wọu kal᷊awọu taumatan Yahudi apạewen sěntinuwo ringangku. Iạ e makěhagẹ̌ bue su hal᷊ẹ̌ u manga tundung i upung gaghurang i kami.

¹⁵ Kai ual᷊ingu kapian naungu Mawu Ruata, i Sie namile si siạ kal᷊imonan iạ niwantelẹ̌ dingangu nẹ̌kui si siạ tadeạu mẹ̌tangkiang si Sie.

¹⁶Mawu Ruata nělahẹ u AhusʼE si siạ tadeạu Wal᷊o Mapia mạanung AhusʼE botonge takụ ihabarẹ̌ su apam bal᷊ine tau Yahudi. Su tempo ene iạ tawe nakoạ sol᷊ong anun sarang sěngkatau mědeạu makitěgu.

¹⁷Iạ e tawe lai nakoạ sarang anun sai-sai su Yerusalem apan seng kal᷊imona wọu iạ nakoạ rasulẹ̌. Kai iạ e rimal᷊eng sarang banuang Arabẹ̌, mase wọu ene nẹ̌sul᷊e kapia sol᷊ong Damsyik lai.

¹⁸ Těllu taung tuhụ e, iạ nakoạ sarang Yerusalem mẹ̌deạu mẹ̌sombang dingangi Petrus. Iạ nẹ̌tanạ dingange kětạu mapul᷊o l᷊ima su ěllone karěngụe.

¹⁹Iạ tawe nẹ̌sombang dingangu manga rasul bal᷊ine, kětạewen i Yakobus[2] anạ u sěmbaụ u Mawu.

²⁰Apang kụ takụ niwohẹ ini e kai těngadẹ̌. Ruata e masingkạ u iạ tawe mẹ̌konti!

²¹Bọu ene iạ nakoạ sarang manga wanuan Siria ringangu Kilikia.

²²Sarang tempo ene manga jamạat Sahani su Yudea e wẹ̌dang tawe apidu nakakiral᷊a.

²³I sire kětạeng makạdingihẹ̌ taumata němpẹ̌bera, ”Taumata kụ nạung kạngerẹ mạnumbiagẹ̌ si kami, ini e mẹ̌lẹ̌habaru pangangimang kụ kạngerẹ nạung kapulune kawe winasaěng.”

²⁴Tangu i sire němpẹ̌dalo Ruata ual᷊ingu iạ.