Read Sangir GALATIA 6 Bible Online

GALATIA 6 - Sangir bible

GALATIA 6

¹Manga anạ u sěmbaụ kereu pẹ̌sěngkatau ikẹ̌katangkạ měkẹ̌koạ dosa ute kěnangko, i kamene apan mẹ̌bẹ̌biahẹ̌ tụtuhụ Rohkẹ̌ u Ruata, mamihing tau ene pẹ̌sul᷊e su ral᷊eng mapia. Kụ i kamene harusẹ̌ mẹ̌koạ ene ringangu kasasikome kụ diagate kumbahang sarang i kamene hala mal᷊aing kasal᷊ukateng.

²Kěnangko i kamene měmpẹ̌sasumbala měmamasaěng bawawaěngu tau, tadeạu[8] ual᷊ingu ene ute i kamene tụtuhụbe laorong Kristus.

³Kereu pẹ̌sěngkatau mạngěnna u watangenge kawe kapiange, sěmbal᷊iau tala wue, ute tau ene mạngakal᷊ẹ̌ batangenge hala.

⁴Sěngkatau-sěngkatau pasịbanikạ batangenge hala měnsang kakanoạ e mapia arau ral᷊aị. Kereu mapia, i sie wotonge makapěndang lumesạ u hal᷊ẹ̌ ene. Kai semben tawahal᷊uasu isihinge su apang kẹ̌koatengu taumata wal᷊ine.

⁵Batụu sěngkatau-sěngkatau hinong masịpasaěng bawawaěnge hala.

⁶I saing manarimạ u těntirong Kristus, kěnang pamahiạ dingangu mananěntirone kěbị apan mapia si sie.

⁷Kumbahang be kaakal᷊eng. Duata e tawe ikapẹ̌tataghunalang! Apan niasị e ene lai ikapěnsạ e.

⁸Kamageng i sain měngasị tuhụ kakanoạ u taumatane, i sie sarung maměnsạ u papate wọu kakanoạ e ene. Arawe kereu i sie měngasị tuhụ l᷊aahạ u Rohkẹ̌ u Ruata, i sie sarung maměnsạu pẹ̌bawiahẹ̌ tutune wọu Rohkẹ̌ u Ruata.

⁹Ual᷊ingu ene, kumbahang i kitẹ masahe mẹ̌koạ manga hal᷊ẹ̌ mapia; u kamagengu i kitẹ tawe měngẹ̌do mẹ̌koạ manga hal᷊ẹ̌ ene, sěnsul᷊e tempo i kitẹ sarung maměnsạ buane.

¹⁰Kụ, karěngụewem piạ loahe si kitẹ, ute kěnangko i kitẹ mẹ̌koạ mapia su kěbị taumata, napal᷊iụ e su manga anạ u sěmbaụ i kitẹ tamba pangangimang.

¹¹Kakěllako pakapia-pia bageang ini takụ niwohẹ sẹ̌saku ringangu hurupe gaghaghuwạ.

¹²Manga taumata kụ makịdarumalo ringangu manga hal᷊ẹ̌ u ghěsi, i sire e mẹ̌tẹ̌tatẹ̌tehẹ̌ manihasa si kamene tumuhụ atoru pẹ̌sasasunatẹ̌. Arawe i sire měmpẹ̌kẹ̌koạ ene kẹ̌taeng tadeạu i sire tawe tumbiagengu tau Yahudi ual᷊ingu kuruisi Kristus.

¹³I sire apan tụtuhụ pělatorangu sunatẹ̌ mal᷊aing tawe měndal᷊engu toratẹ̌. Kai i sire mapulu i kamene ipakisunatẹ̌, tadeạu i sire makal᷊esạ u i sire matuhụ su pělatorang ene.

¹⁴Kai iạ měngkatewe mạdiri lumesạ u apa, tumbạewen Mawung kitẹ Yesus Kristus seng napohong nikuruisẹ̌. U watụ u i Sie kawe seng napohong nikuruisẹ̌ ute dunia e tawẹ lai mangal᷊ene apa-apa si siạ. Dingangu sutěngon dunia ini, iạ mal᷊aing tabidạu seng nate.

¹⁵Nisunatẹ̌ arau tawe nisasunatẹ̌ ene wal᷊inewe kahumotongange. Kahumotongange ute kai makoạ taumata wuhu.

¹⁶Su taumata apan mẹ̌bẹ̌biahẹ̌ dingangu sipirange ene, kụ kerene lai waugu patikụ umatʼu Mawu, iạ mělẹ̌harapẹ̌ Duata sarung mangonggọ u pẹ̌darame ringangu tatal᷊ẹ̌ntụʼE.

¹⁷Mase, kumbahang delaing piạ u sarang sěngkatau makasusa si siạ, batụu su wadangku piạ manga tatialan iạ kai tumatol᷊e si Kristus.

¹⁸Milumbạko Mawung kitẹ i Yesus Kristus měngal᷊amatẹ̌ manga anạ u sěmbaụ. Aming. Adatʼi kami, Paulus