Read Sangir EFESUS 1 Bible Online

EFESUS 1 - Sangir bible

EFESUS 1

¹ Kawanuang Duata su Efesus,[1] apan matuhụ su Mawu Yesus Kristus!

²Iạ e kai i Paulus, darolohang i Kristus Yesus ual᷊ingu kapulun Duata, mělẹ̌harapʼu mal᷊owọko Ruata i Amang i kitẹ dingangu Mawung kitẹ i Yesus Kristus měngonggọu al᷊amatẹ̌ dingangu karal᷊unsemahẹ̌ si kitẹ kěbị.

³Dalo su Ruata, i Amang u Mawung kitẹ i Yesus Kristus! I Sie něngal᷊amatẹ̌ mararohkẹ̌ apạewen piạ su sorga e si kitẹ, ual᷊ingu nasěmbaụ dingang i Kristus.

⁴Kal᷊amonan dunia ini niriadi, Mawu Ruata e seng němile si kitẹ bọʼi Kristus ringangu timonane tadeạu i kitẹ makoạ tataghuanengʼE ringangu tawẹ turạe sarung su těngonʼE. Ual᷊ingu kakěndagu Ruata,

⁵tangu i Sie[2] seng nisahẹ e reng kal᷊amona u wọʼi Yesus Kristus, i Sie sarung měhengkẹ i kitẹ makoạ manga anạʼE sěsane. Ringangu sembeng kerene kapulune kẹ̌koatengʼE.

⁶Dalo su Ruata karangetange, u wọu AhusʼE ikẹ̌kěndagẹ e i Sie mamben těngadẹ̌ kụkěndagʼi kitẹ.

⁷ Batụu kapapohong i Kristus, i kitẹ e nịlaambang u Ruata, mangal᷊ene i Sie seng nẹ̌gěllịu ampung si kitẹ, bọu kal᷊awọu rosang kitẹ e.

⁸I Sie nẹ̌koạ kerene ual᷊ingu i Sie mamben těngadẹ̌ kụkěndagʼi kitẹ, dingangu kakěndagẹ̌ ene nipẹ̌dal᷊embone si kitẹ něpakẹeng kapelẹesa ringangu katatahuěnna.

⁹Tumuhụ kapulunʼE sẹ̌sane, Duata e kai měhabaru ral᷊irung u kapulunʼE si kitẹ; batụu i Sie seng němutusẹ̌ u kapulunʼE ene sarungbe ipakaghanape si Yesus Kristus.

¹⁰KapulunʼE ene ute tadeạu patikụ sạbarange baẹ su sorga ringangu waẹbe lai su dunia, makoạ sěmbaụ dingang i Kristus tabidạu těmbonange. Kụ hal᷊ẹ̌ ini e tangu sarungbe ipakaghanapu Ruata e kereu semben nịdatingu tempone.

¹¹Duata e mẹ̌koạ patikụ sạbarang e tumuhụbe sukapulunʼE ringangu putusangʼE sẹ̌sane. Dokeng bọu tětạe i Sie seng němile si kitẹ, u i Sie mapulu tadeạu i kitẹ mariadiwe umatʼE ual᷊ingu nasěmbaụ dingang i Kristus.

¹²Mal᷊owọko i kitẹ e makoạ kakal᷊imonaěngu mělěharapẹ̌ su Mawu Yesus Kristus, mědalo Ruata ual᷊ingu kawawantugʼE tạ sihinge.

¹³I kamene mal᷊aing seng nakoạ umatʼu Mawu su tempong kamene nakaringihẹ̌ bawerang katěngadẹ̌ e, kai Injilẹ̌ mapakasal᷊amatʼi kamene. I kamene mangimang su Mawu Yesus Kristus, ual᷊ingu ene Ruata e něngonggọu tatialan tataghuanenge si kamene ute kai Rohkẹ̌ʼE kụ seng nikẹ̌donʼE.

¹⁴Rohkẹ̌ ene e kai papaiang tadeạu i kitẹ sarung měnarimạ apan seng kinẹ̌don Duata su manga umatʼE. Ini e makatambam pěngangiaking i kitẹ u Ruata e sarung měngambang umatʼE. Dalo su Ruata ual᷊ingu kawawantugʼE.

¹⁵Ual᷊ingu ene, nạung iạ deng nakaringihẹ̌ u i kamene mạngimang su Mawu Yesus, dingangu i kamene kụkěndagu patikụ umatu Ruata,

¹⁶iạ e tawẹ umpade mapatarimakasẹ su Mawu Ruata mạanung kamene. Iạ e mang hanesẹ̌ měsẹ̌sẹ̌bạ arengu kereu iạ mẹ̌kal᷊iomaneng.

¹⁷Iạ měkẹ̌kal᷊iomaneng tadeạu Ruata Mawung kitẹ i Yesus Kristus, i Amang mawantugẹ̌ e, měngonggọu Rohkẹ̌ʼE si kamene. Rohkẹ̌ ene e sarung mapakariading kamene pelesa ringangu sarung mapakal᷊ahẹu Ruata si kamene hakịu i kamene makakiral᷊a si Sie.

¹⁸Iạ mẹ̌kal᷊iomaneng tadeạu Ruata e mamuka ral᷊ungu naungu mapakatualagẹ̌; tadeạu i kamene makaěnna u kai apa hinong kapěharapeng i kamene wọu Ruata e kimui si kamene. Tadeạu l᷊ai i kamene masingkạu kereapa kakěpal᷊e al᷊amatẹ̌ mapapia iapẹ̌dẹ̌dal᷊embo seng nisadian Duata e waugu umatʼE,

¹⁹dingangu kereapa kasěllahu kuate Ruata němunara mạhěmpal᷊iung kawasane su ral᷊ung i kitẹ taumata apam mạngimang. Kawasan Duata e tabidạeng kawasa tawẹ sihinge,

²⁰ kụ pinẹ̌karadiahangʼE supiạ i Kristus niapẹ̌biahẹ̌ kapia wọu kapapohonge ringangu nangonggọu kal᷊aianengʼE karangetange ringangu Ruata e su sorga.

²¹Kal᷊aianeng i Kristus e něngalembong karangetange wọu patikụ kal᷊aianeng u těmbonangu kawanua, patikụ měngangawasa, patikụ měnaněllange, patikụ manga mawu ringangu walạewe i saim piạ pangkate mararangẹ; baẹ i sire apan nẹ̌biahẹ̌ su orasẹ̌ ini, baewelai apan nẹ̌biahẹ̌ su tempo ramahi kạděntane.

²² Duata e napakawatạu kěbị sạbarang su al᷊ungu kawasang Kristus, dingangu něngonggọi Kristus su jamaatẹ̌ e niapakakoạ bọu patikụ sạbarang.

²³Jamaatẹ̌ e kai wadang i Kristus, niapakasukụ i Sie kụ něnukụ haghim patikụ su ral᷊ungu kěbị.[3]