Read Sangir EFESUS 2 Bible Online

EFESUS 2 - Sangir bible

EFESUS 2

¹ Nạung kạngerẹ i kamene nate tuhụ marohkẹ̌ ual᷊ingu i kamene marosa ringangu lụlawang titan Duata.

²Su tempo ene i kamene tụtol᷊e manga tundun dunia ini; mangal᷊ene i kamene tụtuhụ těmbonang u kawasam binangaeng mal᷊oahẹ̌, kụ kai rohkẹ̌ ete ini mang bědang měkẹ̌karadiahang su taumata lụlawang Duata.

³Kal᷊amona i kitẹ kěbị e měngkai mẹ̌sul᷊ung i sire; i kitẹ e měbẹ̌biahẹ̌ tụtuhụ kapulung kitẹ taumata, ringangu měbẹ̌batụ e patikụ kapulung gěsi ringangu tiněnnang kitẹ. Su tempo ene i kitẹ e kai taumata hinong makahombang dal᷊angehu Ruata lai kerẹewe lai i sire wal᷊ine.

⁴Kaiso apạe kasariane karal᷊ondoʼn naungu Ruata! I Sie kerẹeng kakěndage si kitẹ,

⁵hakịu su tempong i kitẹ nạung bẹ̌dang kinapateěng u rohkẹ̌ e kahiạen pẹ̌sasal᷊ang kitẹ e, ute i Sie napẹ̌biahʼi kitẹ e kapia ringang i Kristus. Kụ kẹ̌tabeng ual᷊ingu kapian naungu Ruata e i kamene apakasal᷊amatʼi Sie.

⁶Ual᷊ingu i kitẹ e nasěmbaụ dingang i Kristus Yesus, Duata e měmiahʼi kitẹ kapia ringangʼE, tadeạu mapakaiang i kitẹ sěngkakaiang dingangʼE su ral᷊ungu sorga.

⁷Duata e mẹ̌koạ kerene tadeạu su tempọ e ramahi kạděntane taumata e makasilo u kereapa kasěllahe kakěndagu Ruata. Kakěndagẹ̌ ene nilahẹu Ruata su kapian naungʼE si kitẹ nilahẹ e si Kristus Yesus.

⁸Mawu Ruata e kụkěndagʼi kamene, hakịu ene i Sie měngambang si kamene, watụ u i kamene mạngimang si Yesus. Kasasal᷊amatʼi kamene e wal᷊inewe ual᷊ingu ěnạu munaranu sěmatang. Kaiso ual᷊ingu al᷊amatu Mawu. Kụ tawẹu sarang sěngkatau makal᷊esạu ene.

¹⁰I kitẹ e kai riadikang u Mawu, niriadine su ral᷊ung i Yesus Kristus, Mawu e něluhudẹ̌ si kitẹ tadeạu i kitẹ mẹ̌koạbe hal᷊ẹ̌ mapapia nisadianʼE waugʼi kitẹ.

¹¹Manga anạ u sěmbaụ bal᷊ine tau Yahudi! Pẹ̌tahěndungko kakakoạ i kamene nạung kangerẹ: I kamene nisěbạ, ”taumata ta sasunateng”, kahian tau Yahudi mẹ̌ngakum batangeng i sire taumatan sunatẹ̌ (timonane ute i sain seng piạ tatialane nikoạ u taumata su wadang i sire).

¹²Su tempo ene i kamene mamben tawe nasěmbaụ dingang i Kristus, i kamene e kai taumata raghị tawe nasowa pinilen Duata. I kamene tawe nasowa su ral᷊ungu kal᷊ahěmpukangu pẹ̌dariandi kinoạ u Ruata ringangu umatʼE. I kamene nẹ̌biahẹ̌ su ral᷊ungu dunia ini e tawẹ harapʼi kamene ringangu tawẹ Duatang kamene.

¹³Arawe ini ute, ual᷊ingu i kamene seng nasěmbaụ dingang i Kristus Yesus, i kamene nạungbe marau e seng niapakarani ual᷊ingu kapapohong i Kristus.

¹⁴U i Kristus sẹ̌sane e kai pẹ̌darameng kitẹ. I Sie napakasěmbaụ u tau Yahudi ringangu wal᷊ine Yahudi nakoạ bansa sěmbaụ. Darěndung nakasara si sire e, kai pẹ̌sasitori e seng nitěnehi Kristus su pananarakangu watangengʼE.

¹⁵ Toratʼu agamang Yahudi ringangu titane lawọ ringangu manga haghing tundu e seng nirẹ̌dasi Kristus tadeạu bansa rarua e makoạ sěmbaụ bansaʼn taumata wuhu, niapakasěmbaụ dingangʼE. Kerene ral᷊eng i Kristus nẹ̌koạ pẹ̌darame.

¹⁶ Ual᷊ingu kapapohongʼE sukalu pinẹ̌kěhusẹ̌, i Kristus napakasěmbaụ u bansa rarua e ringangu napẹ̌damen sire ringangu Mawu, hakịu nailangke pẹ̌sasědụ e.

¹⁷ Kai ene hakịu i Kristus diměnta měhabaru Injilẹ̌ mạanun pẹ̌darame ene si kamene; baẹ si kamene wal᷊ine tau Yahudi kụ nạung kal᷊imona maraun Duata, baewe su tau Yahudi maranin Duata.

¹⁸Ual᷊ingu i Kristus e i kitẹ kěbị — baẹ tau Yahudi baewe lai wal᷊ine Yahudi e — ual᷊ingu Rohkẹ̌ u Ruata e man sěmbaụ e nakakaranin Duata i Amang.

¹⁹Batụu ene ute i kamene semben bal᷊inewe tau raghị arau taumatan likude. I kamene ini e kěbị seng lawọ kawanuan Duata. I kamene e kai ral᷊ohom bal᷊em Mawu Ruata e.

²⁰I kamene lai nipararisị su wowon pondasi piněllọu manga rarolohange ringangu manga nabi,[4] kụ i Kristus Yesus nakoạ batu pinẹ̌bukuange.

²¹U kai i Sie nělanging bal᷊e ene kụ nakoạ Bal᷊en Duata nitani waugu Mawu.

²²U pẹ̌bawiahẹ̌ e nasěmbaụ dingang i Kristus, i kamene mal᷊aing pẹ̌pětikang sěngkapětị dingangu wal᷊ine, makoạ bal᷊e sěmbaụ baugu Ruata; kụ sene Ruata ringangu Rohkẹ̌ʼE mẹ̌tumanạ.