Read Sangir EFESUS 3 Bible Online

EFESUS 3 - Sangir bible

EFESUS 3

¹Kai ual᷊ingu ene iạ, i Paulus nitahungkụ ual᷊ingu i Kristus Yesus baugu pandungang i kamene wal᷊ine Yahudi.

²Mamben těngadẹ̌ i kamene semben nakaringihẹ̌ u Ruata e ual᷊ingu kapian naungʼE, seng něngonggọu munara ini si siạ baugu pandungang i kamene.

³Duata e napakal᷊ahẹu ral᷊irung u timonane mase nịlahabare si siạ. (Mạanung hal᷊ẹ̌ ene sen takụ niwohẹ dasị suwowone ringangu manimbụ

⁴ kụ kereu i kamene mẹ̌basa ute sarung kapangěnnaěngbeng kamene ral᷊irung mạanung Kristus kerẹewe sen takụ kinaěnnaěng.)

⁵Nạung kạngerẹ e ral᷊irung ene e tawe nipẹ̌pakasingkạ su taumata, arawe orasẹ̌ ini ute Rohkẹ̌ u Ruata e seng napakal᷊ahẹ su manga rarolohange ringangu manga nabinʼE.

⁶Rahasia ene ute kai ini: Bọu Injilẹ̌ ene, i sire wal᷊ine tau Yahudi mal᷊aing nakapěndang manga al᷊amatʼu Mawu kụ nạung kal᷊imona nisadia kẹ̌tạbeng baugu tau Yahudi. Taumata apam bal᷊ine tau Yahudi e seng nakoạ laesu wadang sěmbaụ dingangu měnẹ̌narimạ sěngkapěnarimạ apan nikẹ̌don Duata e si Kristus Yesus.

⁷Mawu Ruata e něngonggọu al᷊amatẹ̌ si siạ kụ kai nakoạ mělahabaru Injilẹ̌. Iạ e nakatarimạ al᷊amatẹ̌ e ual᷊ingkeng kawasan Duata pinẹ̌karadiahange si siạ.

⁸Sutal᷊oaran patikụ umatʼu Mawu e iạ kakạdodokange. Kaiso kahian tatal᷊ěntụ u Ruata e, iạ e nighěllirang u hal᷊ẹ̌ku měhabarʼu Injilẹ̌ si sire wal᷊ine tau Yahudi e mạanungkeng kakalạ i Kristus e tawẹ kahěpusange;

⁹dingangu l᷊ai tadeạu ual᷊ingu iạ e tangu kěbị taumata e makakasingkạu kereapa Mawu Ruata, Něndiadi dunia ini patikụ e, seng napakariading karakinʼE reng kal᷊amona-mona ilẹ̌l᷊irung su dunia.

¹⁰Timonan Duata e ute kai tempo ini e bọetewen jamaatẹ̌ kěbị apan mạngumpaedẹ̌ kawasa su wowon langị e masingkạben sipirang u Ruata mapapia su patikụ haghine.

¹¹Mawu Ruata e měkẹ̌koạ kerene tụtuhụ karakinʼE kakalẹ̌, kẹ̌koateng e ringangi Kristus Yesus Mawung kitẹ.

¹²Dingangu pangangimang si Kristus kụ ual᷊ingu nasěmbaụ dingangʼE, i kitẹ e nighělirangu loahe mẹ̌těngkasandigu Mawu Ruata ringangu kasěllahu pangangimang.

¹³Batụu ene, iạ e mědẹ̌dorong si kamene, kumbahangbe i kamene ghuměnggang u tatumbiagẹ̌ si siạ ual᷊ingu i kamene, batụu patikụ tamai ene kai waugu mapakapiang kamene.

¹⁴Ual᷊ingu ene ute iạ e němul᷊angengke su těngon Amang.

¹⁵Kai wọʼi Sie apan balagẹ̌ su sorga dingangu l᷊ai su dunia nakatarimạ u kakakoạ e nitani.

¹⁶Iạ e měkẹ̌kal᷊iomaneng mal᷊owọko Ruata limembong makěndagẹ̌ e mapakatoghasu pangangimang i kamene ual᷊ingu Rohkẹ̌ʼE.

¹⁷Mal᷊owọko ual᷊ingu i kamene mạngimang si Kristus, ute i Kristus mạtanạ su ral᷊ungu naung i kamene, dingangu pẹ̌bawiahʼi kamene matoghasẹ̌ ual᷊ingu kakěndagẹ̌ e seng nẹ̌banua.

¹⁸Iạ měkẹ̌kal᷊iomaneng mal᷊owọko ringangkeweng kěbị kawanuan Duata, i kamene makasěsui kai kerene karal᷊unge ringangu kanandụe ringangu karangẹ e ringangu kawěnahe kakěndagʼi Kristus,

¹⁹kụ dingangu akal᷊u taumata tawe makasěsui karal᷊unge. Karimạko i kamene makakiral᷊a kakěndagʼi Kristus e, takadeạu i kamene masukụ u kapapian Duata.

²⁰Dingangu kawasan Duata měngkai měkẹ̌karadiahang su ral᷊ungu watangeng i kitẹ, Duata e makakoạ limembong kakěpal᷊e wọu apang gẹ̌gausang arau tẹ̌tiněnnang i kitẹ.

²¹Karimạko Ruata e mang bẹ̌bantughang bọu hěnto sarang hěnto su ral᷊ungu jamaatẹ̌, ual᷊ingu i Kristus Yesus. Dalo su Ruata wọu kakal sarang kakalẹ̌! Aming.