Read Sangir EFESUS 5 Bible Online

EFESUS 5 - Sangir bible

EFESUS 5

¹I kamene e kai manga anạ u Mawu Ruata ikẹ̌kěndagʼE, ual᷊ingu ene ute i kamene harusẹ̌be pěmpẹ̌tawakal᷊i tumol᷊e kakakoạ u Mawu e.

² Pẹ̌bawiahʼi kamene ute mal᷊owọko lohoěngu pẹ̌kakakěndagẹ̌ kerẹewe i Kristus mal᷊aing kiměndagʼi kitẹ. I Sie nẹ̌těngkaonggọu watangengʼE waugʼi kitẹ nakoạ kere sěmbaụ sasěmba ral᷊urune mawěngi makạl᷊ahimpulu naungu Mawu Ruata e.

³I kamene kai taumatan Duata. Kụ pẹ̌sasundal᷊ẹ̌ dingangu kakanoạ tawe mẹ̌tatahino, arau anggange tawe hinong kaẹ̌bakeng sutal᷊oarang kamene. Kumbahangbe sarang taumata wal᷊ine piạ alasange mẹ̌berau i kamene měmpẹ̌kẹ̌koạ tamai ene.

⁴Tawe lai hinone i kamene mẹ̌bera manga wawera kotorẹ̌, beran pẹ̌sasundal᷊ẹ̌ arau bawera tạ mangal᷊ene. Kaiso mạpiangbe i kamene makitarimakasẹ su Mawu Ruata.

⁵Kakěllako pakapapia: taumata kụ měngkai mẹ̌sẹ̌sundal᷊ẹ̌ arau měngkai piạ kakanoạ e ta hinone, arau maanggang (piạ kakanoạ e mẹ̌sẹ̌sihing e ute měngkate lai mẹ̌sul᷊ung u mạněmba l᷊ai mahan duata), tangu i sie ene tawe makoạ laesu wadang i Kristus dingangu Mawu Ruata e.

⁶Kumbahangbe i kamene kaakal᷊eng u manga wawera tawẹ gěsine. Batụu kěbị-kěbị ene e makakoạ dal᷊angehʼu Mawu Ruata su taumata apan ta tumatuhụ si Sie.

⁷Kụ kumbahang měngkai mẹ̌dal᷊ahapị u taumata kerene.

⁸I kamene hala těngadẹ̌be nạung marěndung. Kai arawe orasẹ̌ ini i kamene semben nariadi umatu Mawu, kụ i kamene ene su ral᷊ungu tualagẹ̌. Ual᷊ingu ene ute i kamene harusẹ̌be pẹ̌biahẹ̌ su ral᷊ungu tualagẹ̌.

⁹U kai wọu tualagẹ̌[6] ene suměpụ patikụ kakanoạ mapapia, adilẹ̌ dingangu matěngadẹ̌ su kasingkạu Ruata.

¹⁰Pẹ̌tawakal᷊iko měnanẹ̌sui apa hinong makal᷊uasẹ̌ dal᷊ungu naungu Mawu kasěllahenge.

¹¹Kumbahangbe mẹ̌koạ kakanoạ tawẹ kěhase kẹ̌koatengu apan sukararěndung. Susěmběkane ute, i kamene kěbị e pěmpěluạko apang kakanoạ ene. (

¹²Batụu kěbị apang kẹ̌koateng i sire supěnise ute ipạhumbisara e mal᷊aing makạmamea.)

¹³Kěbị apang kẹ̌kahinoěngu tualagẹ̌ e sarung ikasilo mal᷊ahẹ.

¹⁴Batụu kěbị apang ikasilo mal᷊ahẹ e kai tualagẹ̌.[7] Hakịu ene kai piạ bawerau, ”Kapukọ e, ei kau mẹ̌tẹ̌tikị e, ringangu pẹ̌bangungke wọu tal᷊oaran taumata nate. I Kristus sarungbe suměnnang si kau.”

¹⁵Batụu ene pakapapia we kahěngang měluhudẹ̌ pẹ̌bawiahʼi kamene. Ariẹbe kere pẹ̌bawiahu taumata wodo; kaiso pẹ̌biahẹ̌ko kere taumata matatahuěnna.

¹⁶ Pakẹko tempo paka pia-pia suapam piạ loahi kamene, watụ u tempo ini e kai tempo ral᷊akisẹ̌.

¹⁷Abe pẹ̌těngkawodong batangeng kaiso pěnẹ̌něsuiko apang ikẹ̌kapulun Mawu.

¹⁸Kụ abe pẹ̌těngkiwukang u anggorẹ̌, batụu ene kai makasilakạ si kamene, kaiso kěngkapenẹkon Rohkẹ̌ u Ruata e i kamene.

¹⁹ Pěmpẹ̌sasahandaẹkon mazmurẹ̌ dingangu kakantarị daralo ringangu kantari marohkẹ̌ su ral᷊ungu pal᷊ahumbisarang kamene. Pakaral᷊uasẹ̌ko i kamene měmpẹ̌kantarịu kakantarị daralo su Mawu.

²⁰Pakasauko ringangu su hal᷊ẹ̌ewe lain manga apa-apa ute i kamene mang pakatatarimakasẹ su Ruata i Amang, su areng i Yesus Kristus Mawung kitẹ.

²¹Mědeạu makaadatẹ̌ si Kristus, ute pakasasuměllungko i kamene sěmbaụ dingangu wal᷊ine.

²² Manga wawine, pakasuměllungko su kawing i kamene kerẹewe su Mawu e.

²³Watụ u manga esẹ e kai těmbọu wawine e, kerẹewe lai i Kristus mal᷊aing nakoạ těmbọu jamaatẹ̌, kụ i Sie sẹ̌sane mal᷊aing Datun Sal᷊amatẹ̌ baugu jamaatẹ̌ kụ nakoạ badange.

²⁴Kerẹewe lai jamaatẹ̌e sụsasuměllung si Kristus kerene lai su patikụ munara e manga wawine e harusẹ̌be sụsasuměllung su kawinge.

²⁵ I kamene manga esẹ e, kẹ̌kěndagẹ̌beng kawing i kamene e, kerẹwe lai i Kristus kụkěndagu jamaatẹ̌ dingangu nẹ̌těngkaonggọu watangengʼE waugu jamaatẹ̌ e.

²⁶I Kristus nẹ̌koạ kerene e tadeạu i Sie makapamurẹ̌sing jamaatẹ̌ e ringangu těntironʼE bọu akẹ sahani e, tadeạu samurine i Sie makapěnarakangu patikụ ene su Ruata.

²⁷Ringangu ral᷊enge kerene i Kristus e niapararisị u jamaatẹ̌ mawantugẹ̌ dingangu tawẹ sangkural᷊ange su těngonʼE, tawẹ turạ e arau tawẹ sungkal᷊ene apa-apa.

²⁸Kerene wue lai manga esẹ e harusẹ̌ kuměndagu kawinge kerẹwe lai kuměndagu wadange sẹ̌sane. Manga esẹ kụ kụkěndagu kawinge mangal᷊ene i sie kụkěndagu watangenge hala e. (

²⁹Tawẹu sarang sěngkatau taumata měbẹ̌binsịu ghẹ̌sine sẹ̌sane. Kaiso i sie mẹ̌pẹ̌padul᷊i ringangu mẹ̌děndiagạ kerẹewe i Kristus mal᷊aing mẹ̌pẹ̌padul᷊i jamaatʼE.

³⁰I kitẹ masingkạu ene, ual᷊ingu i kitẹ e kai laesu wadang i Kristus.)

³¹ Su ral᷊ungu Winohẹ Susi e kạbawohẹ, ”Kai ene hakịu esẹ e kai měněntang i amange ringangu i ninange kụ mẹ̌těngkatakidẹ̌ dingangu kawinge kụ irẹ̌dua e makoạ sěmbaụ.”

³²Ayetẹ̌ ini e piạ mangal᷊ene maral᷊ung. Kụ pituaku e tangu al᷊ingkai mạanung kal᷊ahěmpukang i Kristus dingangu jamaatẹ̌.

³³Arawe ayetẹ̌ ene e mal᷊aing piạ kal᷊ahěmpukange ringang i kamene: Kụ i kamene manga esẹ sěngkatau-sěngkatau e pasịkěndagu kawinge kerẹewe lai i sie kuměndagu watangenge sẹ̌sane ringangu i kamene manga wawine sěngkatau-sěngkatau e kěnangko pẹ̌tawakal᷊i měngadatẹ̌ kawinge.