Read Sangir FILIPI 1 Bible Online

FILIPI 1 - Sangir bible

FILIPI 1

¹ Manga anạ u sěmbaụ dal᷊ohon jamaatʼu Mawu patikụ mạtanạ su Filipi, kụ seng nasěmbaụ dingangi Kristus Yesus. Kerene lai manga anạ u sěmbaụ pangahạ dingangkewen mẹ̌tatangkiang jamaatẹ̌! Iạ i Paulus, dingangkewen i Timotius, manga ěllang i Kristus Yesus,

²mělẹ̌harapẹ̌ mal᷊owọko Ruata i Amang i kitẹ dingangu Mawu Yesus Kristus mangonggọu al᷊amatẹ̌ dingangu karal᷊unsemahẹ̌ si kamene.

³Kasaụewen iạ mẹ̌tẹ̌tahěndung si kamene, iạ makitarimakasẹ su Ruata.

⁴Dingangu masau su sul᷊ene iạ měkẹ̌kal᷊iomaneng baugʼi kamene kěbị, iạ měkẹ̌kal᷊iomaneng dingangu karal᷊uasu naung.

⁵Iạ makitarimakasẹ su Ruata ual᷊ingu reng dokeng bọu ěllo humotong sarang orasẹ̌ ini, i kamene seng nẹ̌tul᷊ungu iạ nangekeng Injilẹ̌ bọu Ruata.

⁶Duata sẹ̌sane nanětạu hal᷊ẹ̌ mapia ene si kamene, dingangu iạ mangiakingu i Sie sarung maněpasu hal᷊ẹ̌ ene sarạewen masue su Ěllon Kristus Yesus duměnta kapia.

⁷I kamene měngkate hanesẹ̌ ene su naungku. Mang kahěngang su tampạ e wue iạ piạ pěndangku kerene si kamene. Batụu i kamene kěbị seng sěngkapěnarimạ dingangku, laonggọ u Mawu Ruata kụ seng nionggọ siạ, baẹ su tempo ini iạ e ěndaung su ral᷊ungu tahungkụ baẹbe su tempon iạ su l᷊ikude waugu tumatawang dingangu mẹ̌tahutěndạu Injilẹ̌ ene.

⁸Duata e masingkạ, u iạ mambeng dụdareạ si kamene dingangu pěndangu kakěndagu Mawu Yesus Kristus sẹ̌sane.

⁹Kai ini e kakal᷊iomanengku waugʼi kamene: karimạko i kamene mahuntinamba kuměndagu Ruata ore lai kasandigangu ringangu měngkai mạtamba su ral᷊ungu kasingkạ kahěngang dingangu matatahuěnna.

¹⁰Dingangu kerene i kamene masingkạ měmile apang kapiaěnge, takadeạu i kamene sarung mawurẹ̌si wọu karal᷊aị arau haghin laěnsilẹ̌, su ěllong Kristus duměnta kapia.

¹¹Pẹ̌bawiahʼi kamene sarung mẹ̌dal᷊embong kakanoạ mapapia kahěngang kụ kětạeng niual᷊i wọi Yesus Kristus sẹ̌sane; tangu Ruata sarung iapakawantugẹ̌ dingangu rẹ̌daloěng.

¹²Iạ e mapulu i kamene masingkạ u apang kụ seng nariadi si siạ, kai nakakal᷊awọ taumata rimaringihẹ̌ dingangu nangimangu Injilẹ̌ ene.

¹³ Kasueěnge, kěbị měndariagạ istana ringangu taumata wal᷊ine su soa ene masingkạ u iạ nitahungkụ ual᷊ingu iạ e mětẹ̌tangkiang si Kristus.

¹⁴Dingangu pananahungkụ siạ e kai nakapangělembon pangangiakingu tau Sahani kal᷊awokange su soa ini su Mawu, nakapahuntinamban bahanine měhabaru titan Mawu[1] tawẹ goẹ̌ e.

¹⁵Těngadẹ̌ piạ pirang katau wọu tal᷊oaran sire kụ mělẹ̌habarʼi Kristus ual᷊ingu panananoi ringangu mapulu mẹ̌sitori, arawe sěnggạ e wue ute mělẹ̌habarẹ̌beng Kristus su katul᷊ide.

¹⁶I sire ini měkẹ̌koạ kerene ual᷊ingu i sire kụkěndagu Ruata ringangu iạ, batụu i sire masingkạ u Ruata seng něngonggọ u hal᷊ẹ̌ siạ baugu mělahẹ u Injilẹ̌ e kahěngang.

¹⁷Arawe sěnggạ e wue mělẹ̌habarʼi Kristus e piạ timonane ral᷊aị; i sire mělẹ̌habarẹ̌ e waugu pandungang i sire hala. Ual᷊ingu ene i sire mělẹ̌harapẹ̌ u makakoạ siạ limembong kasigěsạ e su ral᷊ungu tahungkụ.

¹⁸Kaiso tawe mẹ̌kapura! Batụu maning kereapa, baẹ ene nikoạ dingangu timonane mapia, baewe lai su timonane kụ nẹ̌sal᷊a, kaiso i Kristus mang ipẹ̌dal᷊ahabarẹ̌ l᷊ai; kụ iạ e mal᷊uasẹ̌. Dingangu iạ e tatapẹ̌ mẹ̌pẹ̌pěndang kerene,

¹⁹batụu iạ masingkạ u kahiạeweng kakal᷊iomaneng i kamene ringangkewel᷊ain ontol᷊u Rohkẹ̌ u Mawu Yesus Kristus e, iạ e iapakal᷊iwirẹ̌.

²⁰Něngalembọewe lai takụ ilẹ̌ěnning dingangu lẹ̌harapenge kai tadeakengu mambeng kumbahang iạ kawe tạ kěhase su munaraku e. Su sěmběkane iạ mělẹ̌harapẹ̌ tadeạu apan tempo e, něngalembọ e su orasẹ̌ ini, iạ mětẹ̌tumbahani ringangu kaguwạu kuatẹ̌ku — bae iạ biahẹ̌ arau iạ mate — i Kristus iapakawantugẹ̌.

²¹Ual᷊ingu si siạ, timonan biahẹ̌ku kětạeng i Kristus! Kụ papate kai untung.

²²Kai kereu ringangu pẹ̌bawiahẹ̌ su dunia ini, iạ makakoạ munara kụ l᷊imembon piạ mangal᷊ene, ute iạ běga wue sude hinon takụ pileěng.

²³Iạ wẹ̌bol᷊engang bọu ruam běka. Iạ mẹ̌měning kahěngang maněntangu dunia ini tadeạu tamai mẹ̌tanạ dingangi Kristus, kai ene e limembong kapiane;

²⁴kai waugu pandungangu ute kai limembom mapia kereu iạ tatapẹ̌ mạtanạ su dunia.

²⁵Iạ mangiaking u hal᷊ẹ̌ ene. Kai ene hakịu iạ masingkạ u iạ matatapẹ̌ matanạ dingangi kamene kěbị, tadeạu makapẹ̌tul᷊ung si kamene mariadi něngalembong kakuate ringangu mahuntinambang kal᷊uase su ral᷊ungu pangangimang su Mawu.

²⁶Ual᷊ingu ene, kereu iạ sarung mẹ̌sul᷊e su anung kamene, ute i kamene apan seng nasěmbaụ dingangi Kristus Yesus e sarung piạbe limembong kal᷊awọ e lai kakakoạku mědeạu l᷊umesạ u watangengku.

²⁷Ho! Kapiange orasẹ̌ ini e pẹ̌bawiahʼi kamene seng sěndal᷊engu kapulun Injilẹ̌ mạanun Yesus Kristus ene. Mageng kerene měnsang iạ makapẹ̌sombang dingangi kamene arau tala, iạ makaringihẹ̌ bue u i kamene matoghasẹ̌ su kasasěmbaụ dingangu sěngkapẹ̌tawakal᷊i sěmatang, baugu timona ringangu ěnning sěmbaụ baugu pangangimang mẹ̌takạewen dingangu Injilẹ̌ bọu Mawu Ruata.

²⁸Karimạkọ i kamene sěntiniạ mang bawahani kụ abe kěngkatakụ mẹ̌těngong kal᷊awọu rumarokạ si kamene. Ene kai kere ipělẹ̌lahẹ u i sire kai sarung ikawatạ, kụ i kamene sarung makauntung, ual᷊ingu kai Ruata sẹ̌sane mẹ̌gěllịu kal᷊auntung ene si kamene.

²⁹Batụu Ruata e seng nangonggọu tatal᷊ěntụe si kamene bal᷊ine kětạeng baugu mangimang si Kristus, kaiso lai waugu mẹ̌těngkasunsara waugʼi Kristus.

³⁰ Ini e i kamene lai tumol᷊e si siạ su ral᷊ungu pẹ̌sasekẹ mẹ̌sul᷊ung; mangal᷊ene ute kai pẹ̌sasekẹ nạung seng bọu nikasilong kamene takụ ipẹ̌sẹ̌sekẹ kal᷊imona, ringangu měngkai wědan takụ ipẹ̌sẹ̌sekẹ sarang orasẹ̌ ini, kerẹewe kinaringihʼi kamene orasẹ̌ ini.