Read Sangir FILIPI 2 Bible Online

FILIPI 2 - Sangir bible

FILIPI 2

¹I kamene matoghasẹ̌, ual᷊ingu i kamene nasěmbaụ dingang i Kristus. Dingangu i kamene mạhiborẹ̌ ual᷊ingu i Kristus kiměndagʼi kamene! I kamene niahạu Rohkẹ̌ u Ruata,[2] ringangu i kamene lai měkẹ̌kakěndagẹ̌ tapengu mětẹ̌tatal᷊ěntụ sěngkatau su wal᷊ine.

²Ho! kěnangko i kamene kahěnga-hěngang makal᷊uasẹ̌ naungku su manga hal᷊ẹ̌ ini: Pẹ̌biahẹ̌ko sěngkanaung dingangu l᷊awọ měkakěndagẹ̌ dingangu timona mẹ̌sul᷊ung.

³Abe pěmpẹ̌koạ manga apa ual᷊ingu sẹ̌sahěsekangu pandungangu watangeng hala, arau makapangobotu watangeng. Su sěmběkane karimạkọ i kamene sěngkatau-sěngkatau ringangu kasanạ u naung mangěnna u taumata wal᷊ine limembom mapia wọu watangeng.

⁴Kakěllako pandungangu taumata wal᷊ine; abe kětạeng pandungangu watangeng.

⁵Karimạko i kamene piạ kanaunge kere Mawu Yesus Kristus.

⁶Tumuhụ hinone i Sie mẹ̌sul᷊ungu Mawu Ruata, kai i Sie tawe nakapěndangu kakakoạ e marohkẹ̌ ene hinong tahutěndakengʼE.[3]

⁷Su sěmběkane, i Sie maměllọ u kěbị mase makoạ mẹ̌sul᷊ungu sěngkatau ěllang. I Sie nakoạ kere taumata kụ kěllaěng biahẹ̌ bue mẹ̌sul᷊ungu taumata.

⁸I Sie nẹ̌těngkasanạ u watangengʼE kụ mẹ̌bẹ̌biahẹ̌ satia su Mawu Ruata sarang napohong — su kalu kuruisẹ̌.

⁹Kai ual᷊ingu ene hakịu Ruata něhengkẹ i Sie niapakarangẹ-dangẹ, dingangkewen něgěllị u kawasa si Sie limembo wọu patikụ kawasa wal᷊ine.

¹⁰ Tangu waugu měngadatẹ̌ Mawu Yesus, kěbị diadikang su Sorga ringangu su dunia, dingangkewe lai su al᷊ungu dunia[4] sarung mẹ̌suba si Sie.

¹¹I sire kěbị sarung měngaku u Yesus Kristus e kai Mawu; kụ kamageng kerene Ruata i Amang niwantugang.

¹²Batụu ene, manga anạ u sěmbaụ kụ ikẹ̌kěndagẹ̌, kereapạewen i kamene hanesẹ̌ susasuměllung si siạ su tempon iạ ene sutal᷊oarang kamene, tangu limembọewe orasẹ̌ ini seng něgagheange, mal᷊owọko i kamene měngkai sumasuměllung si siạ. I kamene seng niapakasal᷊amatʼu Ruata, kụ pẹ̌tawakal᷊iko turusẹ̌ tadeạu karal᷊unsemahu e masukụ. Koạko ene ringangu adatẹ̌ ore lai tatuhụ su Ruata,

¹³ual᷊ingu Ruata sẹ̌sane nẹ̌karadiahang su ral᷊ungu watangeng i kamene mědeạu i kamene mapulu ringangu makal᷊uasẹ̌ naungu Ruata.

¹⁴Hal᷊ẹ̌keko kěbị sạbarang dingangu tawẹ karubụ e arau sitorine.

¹⁵ Pẹ̌kakoạ i kamene kerene ute měnẹ̌nodẹ u i kamene kai manga anạ u Ruata kụ tawe turạe, kụ měbẹ̌biahẹ̌ dingangu katul᷊idẹ̌ ore lai katěngadẹ̌ sutal᷊oaran taumata raral᷊aị dingangu mararosa. Kụ su tempong i kamene měhabarẹ̌ si sire habarẹ̌ makaonggọ u pẹ̌bawiahẹ̌, ute mal᷊owọko i kamene makoạ kere tualagẹ̌ si sire simẹ̌nnang nanualagẹ̌ dunia e. Kamageng i kamene mẹ̌biahẹ̌ kerene ute, hẹ̌dowe piạ banggile si siạ baugu makạpěndang lumuasi kamene su tempon Mawu Yesus Kristus duměnta kapia. Ene tiahane u munaraku e tawe magholọ kaiso piạbe kěhase.

¹⁷Aramanung iạ sarung pateěng kụ dahaku makoạ sasěmba su wowong apa nipaněmbang kamene su Ruata makoạ tatiala u i kamene mangimang si Sie. Kereu mang harusẹ̌ kerene, iạ e makitarimakasẹ su hal᷊ẹ̌ ene ringangu sěngkapahul᷊uasẹ̌ dingangi kamene.

¹⁸Kerene lai, mal᷊owọko i kamene mal᷊aing makitarimakasẹ dingangu sěngkapahul᷊uasẹ̌ dingangku.

¹⁹Iạ mangimang u kai ringangu tul᷊umangu Mawu Yesus, iạ e lighạ nakapěndolohʼi Timotius sol᷊ong anung kamene, tadeạu iạ e mahiborẹ̌ ual᷊ingu habarẹ̌ mạanung kamene.

²⁰Kětạeng i Timotius e kakěsạ e taumata sěngkanaungu iạ, dingangu těnga-těngadẹ̌ mẹ̌tẹ̌tiněnnang kapapiang kamene.

²¹Kěbị e lai wal᷊ine kětạeng měsẹ̌sěmpị hal᷊ẹ̌ u watangeng hala, wal᷊inewe waugu pandungangu Mawu Yesus Kristus.

²²I kamene seng nakasilo tialane u i Timotius mamben něbaraguna. I sie seng nẹ̌těngkasaghedẹ̌ dingangku baugu pělahabarʼu Injilu Mawu. I kandua e mẹ̌sul᷊ungu anạ dingangu iamange.

²³Batụu ene, lẹ̌paseweng iạ nakakasingkạ u kereapa ral᷊engu hal᷊ẹ̌ku e sarung maghanapẹ̌, ute iạ sarung měndolohʼi sie sol᷊ong anung kamene.

²⁴Iạ mangimang kai ringangu tul᷊umangu Mawu e, iạ sẹ̌saku e tawẹ kaděngụe lai sarung mẹ̌tiwo si kamene.

²⁵Mihino su anạ u sěmbaụ i kitẹ i Epafroditus kụ seng nirolohʼi kamene baugu iapẹ̌tul᷊ung siạ, iạ nẹ̌pěndangu mambeng hinone měndolohʼi sie pẹ̌bal᷊ị anung kamene. I sie seng timaking siạ su ral᷊ungu munara ringangu pẹ̌kakarạdiahangku e.

²⁶I sie rụdareạ i kamene manga anạ u sěmbaụ kěbị dingangu i sie měngkate su kaghaghěngganeng u i kamene seng nakahombang habarẹ̌ u i sie masakị.

²⁷Mang kahěngang i sie masakị hakịu marani mate. Kai Ruata e timal᷊ěntụ i sie; kụ bal᷊ine kětạ si sie, kaiso si siạ l᷊ai, tadeạu kumbahang iạ e tumanịu něngalembo masusa l᷊ai.

²⁸Kai ene hakịu mangkeng kakạsariane lai ěnningku mědeạu měndolohi sie pẹ̌bal᷊ị sol᷊ong anung kamene, tadeạu i kamene sarung lai mahul᷊uasẹ̌ kapia kereu i kamene mẹ̌sombang dingange, kụ naungku e mal᷊aing mal᷊enehẹ̌.

²⁹Tangú, pěmpanarimạkon sie ringangu karal᷊uasu naung kere sěngkatau anạ u sěmbaụ tamba pangangimang. Pěngarěgawen patikụ taumata kere i sie.

³⁰Baugu pandungangu munarang Kristus, i sie maraning lai mate; i sie něnarakangu niawane baugu mẹ̌tul᷊ungu iạ su arengi kamene.