Read Sangir FILIPI 3 Bible Online

FILIPI 3 - Sangir bible

FILIPI 3

¹Pangěnsueěnge, manga anạ u sěmbaụku, mal᷊owọko i kamene mahul᷊uasẹ̌ ual᷊ingu i kamene seng nasěmbaụ dingangu Mawu. Iạ tawe nakapěndang mawěhạ baugu mělukạu apang kụ seng takụ niwohẹ si kamene kal᷊amona; baugu hal᷊ẹ̌ ene mapia waugu kasasal᷊amatʼi kamene.

²Pakatateghang bue su taumata apam mẹ̌kẹ̌koạ daral᷊akị, taumata kụ hinone isěbạ asu. I sire mạnihasa tadeạu taumata isunatẹ̌.

³Sěmbal᷊iau i kitẹ e taumata seng nanarimạ u sunatẹ̌ kahěngang, bal᷊inewe i sire. I kitẹ mạněmba Ruata e kai ual᷊ingu laahạ u Rohkẹ̌ u Ruata sẹ̌sane, dingangu i kitẹ makitarimakasẹ ual᷊ingu i kitẹ měbẹ̌biahẹ̌ nasěmbaụ dingangi Kristus Yesus. I kitẹ tawe gumaghal᷊ě su manga pẹ̌kakakomol᷊ẹ̌ kụ tụtuhụ gěsi.

⁴Su hinone iạ botonge gumaghal᷊ě su manga komol᷊ang ene. Kai kereu piạ pẹ̌sěngkatau makapěndangu i sie piạ aị e waugu ghumaghal᷊ě su komol᷊ang kụ tutuhụ gěsi, ute iạ něngalembọ e lai.

⁵ Iạ nisunatẹ̌ tempon umurẹ̌ku ual᷊u ěllo. Iạ kinawantelẹ̌ kere sěngkatau tau Israelẹ̌ bọu hiten Benyamin; iạ e tau Ibrani tutune. Su ral᷊ungu sumasuměllung su toratʼu agaman Yahudi, ute iạ kai nasowa sěngkatau ral᷊ohong komol᷊angu Farisi e.

⁶ Sal᷊a anune iạ e kai limembong giange hakịu iạ e nanumbiagẹ̌ jamaatẹ̌. Kereu tinganeng bọu kěhịu toratʼu agaman Yahudi ute iạ e taumatawe mapia, tawe kasěngkul᷊ang.

⁷Kai ual᷊ingu i Kristus, tangu kěbị apang nạung kal᷊amona takụ lẹ̌ěnnaěngu kai untung, ini e takụ nirekeng dugi.

⁸Bal᷊inewe kětạu manga hal᷊ẹ̌ tamai ene; kaiso patikụ sạbarang kụ takụ lẹ̌ěnaěnge kětạewen makạdugi. Kụ takụ tẹ̌taghuaneng tempo ini e kai něngalembong maarẹ̌ga: ute kai makakiral᷊a si Yesus Kristus, Mawuku. Ual᷊ingu i Kristus tangu iạ seng naměllọ u kěbị-kěbị e. Takụ lẹ̌ěnnaěng kěbị ene kai kětạeng kere onasẹ̌ tadeạu iạ botonge makahombang si Kristus,

⁹dingangu kahěnga-hěngang nasěmbaụ dingangi Sie. Pẹ̌kakauhẹ̌ mapia ringangu Ruata e bal᷊inewe ual᷊ingu kakanoạku hala su hal᷊ẹ̌ u tatuhụ toratʼu agama. Orasẹ̌ ini e iạ kai piạ pẹ̌kakauhẹ̌ ku mapia ringangu Ruata, ual᷊ingu iạ mạngimang su Mawu Yesus Kristus. Kụ pẹ̌kakauhẹ̌ mapia ene rarěntane kai wọu Ruata ringangu wọu pangangimang su Mawu Yesus Kristus.

¹⁰Kakěsạ-kěsạ e takụ ilẹ̌ěnning ute kai tadeạu iạ makakiral᷊a si Kristus, dingangu makahombang kawasam pẹ̌bawangungʼE wọu papatenʼE. Iạ mẹ̌měningu sěngkapẹ̌tatahang dingangʼE kụ makoạ mẹ̌sul᷊ungu i Sie su ral᷊ungu papatenʼE.

¹¹Kụ iạ e mělẹ̌harapẹ̌ u iạ sẹ̌saku sarung ipẹ̌biahẹ̌ kapia wọu papate.

¹²Iạ e tawe nẹ̌bera u iạ seng nakaringkau ene arau seng nasukụ. Kaiso iạ mangkewen mẹ̌tẹ̌tatětehẹ̌ sarang makaal᷊ạ laonggọ kụ nisadiang Kristus Yesus. Kai waugu ene i Sie seng nakaal᷊ạ siạ kụ nakoạ tataghuanengʼE.

¹³Nal᷊ahẹ manga anạ u sěmbaụ, iạ tumuhụ hinone tawe[5] nakapěndangu iạ kawe seng nakaal᷊ạ pěreisẹ̌ ene. Kaiso kai piạ sěmbaụ kụ hinon takụ koateng, mangal᷊ene iạ mẹ̌timbul᷊eng apang su l᷊ikudẹ̌ku, ringangu mětẹ̌tatẹ̌tehẹ̌ sěngapam botonge měndingkau apan su těngo.

¹⁴Kai ene hakịu iạ měngkai tụtal᷊ang mẹ̌tẹ̌timona timona pangěnsueěnge mědeạu makahombang kal᷊auntung, mangal᷊ene pẹ̌bawiahẹ̌ su ral᷊ungu sorga; kụ baugu ene e Ruata kimui si kitẹ limiung Kristus Yesus.

¹⁵I kitẹ kěbị kụ seng matěllang tuhụ marohkẹ̌, ute hinong piạ pěndangu naung kerene. Kai kereu sutal᷊oarang kamene kawe piạ pěndangu naung bal᷊ine, tangu Ruata e sarung lai mělahẹ si kamene.

¹⁶Kaiso hal᷊ẹ̌ ini karimạko nẹ̌naungang: i kitẹ e harusẹ̌ tatapẹ̌ měbẹ̌biahẹ̌ tumol᷊e atorẹ̌ kụ seng kinatol᷊eěng i kitẹ sarang orasẹ̌ ini.

¹⁷ Manga anạ u sěmbaụ kěbị! Pěmpẹ̌těnoko si siạ. I kami seng něgěllịu pẹ̌tatěnoěng kahěngang, ual᷊ingu ene pěmpẹ̌tatingangko pakapia i sai-saing kụ měmpẹ̌tẹ̌těno kakakoạ i kami e.

¹⁸Iạ e seng masau su sul᷊ene mạul᷊ị si kamene, dingangu ini e iạ saụ měndahisẹ̌ kapia ringangu sasangị, u kai lawọ taumata kụ pẹ̌bawiahe mẹ̌gěnggoghahẹ̌ mangal᷊en papateng Kristus su kuruisẹ̌.

¹⁹Pẹ̌bawiahu taumata kerene kasueěnge ute kawawinasa, batụu mahang duatan sire e kai kapulung gẹ̌sin sire hala. Manga hal᷊ẹ̌ makạmea e, sěmatangkewen ilẹ̌lansị i sire; batụu i sire měngkate tumbạu mětẹ̌tiněnnang kal᷊awọu apam mětẹ̌tatahinon dunia ini.

²⁰Arawe i kitẹ ute kai kawanuan sorga. Kụ kai wọu ene lai Datu Mananal᷊amatẹ̌ si kitẹ e, Mawu Yesus Kristus kụ sarung duměnta. I Sie ete sěntiniạ lẹ̌antiwang.

²¹Badang i kitẹ e lome ringangu mahenẹ ini e sarung iwal᷊ui kahiang Kristus makoạ mẹ̌sul᷊ungu wadange hala kụ mawantugẹ̌. I Sie makakoạ ene ual᷊ingu i Sie mạnaghuang kawasa waugu mapạsasuměllungu patikụ sạbarang.