Read Sangir FILIPI 4 Bible Online

FILIPI 4 - Sangir bible

FILIPI 4

¹Batụu ene, manga anạ u sěmbaụ ku ikẹ̌kěndagẹ̌, kụ mal᷊owọko pẹ̌bawiahʼi kamene těnga-těngadẹ̌ mạngimang su Mawu. Naungku e rụdareạ i kamene! Kai seng i kamene ilẹ̌liagẹ̌ku ringangu makạl᷊uasẹ̌ si siạ.

²Baugu manga wawine i Euodia ringangu i Sintike! Iạ mẹ̌dẹ̌dorong sěngapam botonge tadeạu i rua sěngkanaung bue kere taumata tamba pangangimang.

³Su manga ringangku apan satia, iạ mẹ̌dorong lai tadeạu i kamene mẹ̌tul᷊ung i rẹ̌dua wawine ene. I rẹ̌dua seng němpěmunara masěgadẹ̌ baugu měhabarʼu Injilu Mawu Ruata; mẹ̌sul᷊ung i Klemen dingangu kal᷊awọu taumata wal᷊ine apang sěngkapěmunara ringangku. Manga areng i sire ene su ral᷊ungu Bukẹ̌ u Taumata Wiahẹ̌.

⁴Karimạko i kamene hanesẹ̌ mạhul᷊uasẹ̌ ual᷊ingu i kamene seng měbẹ̌biahẹ̌ nasěmbaụ dingangu Mawu. Sěnsul᷊eko l᷊ai iạ mẹ̌bera: Pahul᷊uasẹ̌ko!

⁵Karimạko kěbị taumata e makasilo kakanoạ i kamene apan naunge mapia. Batụu Mawu e tawẹ kaděngụe lai sarung duměnta.

⁶Abeko ghěnggangu apa. Su ral᷊ungu patikụ hal᷊ẹ̌, pěmpẹ̌kal᷊iomaneng dingangu pěhabarẹ̌kon dorong i kamene su Ruata. Apang gẹ̌gausang i kamene e měngkai pakasaung habare su Mawu Ruata apidu makitarimakasẹ.

⁷Tangu karal᷊unsemahẹ̌ bọu Ruata kụ tawe ikatiněnnan taumata e sarung maněntanudẹ̌ dal᷊ungu naung dingangu tiněnnang kamene apan seng nasěmbaụ dingangi Kristus Yesus.

⁸Kasueěnge, manga anạ u sěmbaụ nẹ̌naungengkong kamene kal᷊awọu hal᷊ẹ̌ mal᷊aarẹ̌ga kụ hinong daloěng, mangal᷊ene ute patikụ munarang katul᷊idẹ̌.

⁹Koạko apan seng niěndungang i kamene ringangu nikatarimạ bọu iạ; baẹ bọu manga wawera arau lai wọu manga kakanoạku. Mawu Ruata puěngu pẹ̌darame, sarung mahundingang i kamene.

¹⁰Su ral᷊ungu pẹ̌bawiahẹ̌ku kụ seng nasěmbaụ dingangu Mawu e, iạ e mal᷊uasẹ̌ kahěngang, batụu sarạeng seng kerẹeng karěnguẹ ini piạ e loahe kapia mẹ̌tẹ̌tiněnnam batangengku. Timonaku bal᷊inewe tadeạu i kamene seng niwul᷊eng iạ; i kamene mambeng měnẹ̌naung siạ, kaiso i kamene tawe makaẹ̌ba loahe waugu manodẹ u ene.

¹¹Iạ měbẹ̌berang ini bal᷊inewe ual᷊ingu iạ e kai kinakawusange, batụu iạ sěmben nangěndung měngkate mal᷊uasu apang sembeng piạ e.

¹²Iạ e sembeng bọu nihombangengu kasasusam biahẹ̌, dingangkewelain mědẹ̌dal᷊embo. Iạ seng masingkạ u rahasiane waugu tumatěngo kakakoạ e balạewe měnsang kerea; baẹ su tempom mědẹ̌dal᷊embo, arau kasiang, baẹ su tempom mạhěmpal᷊iu, kurai kẹ̌kawusange.

¹³Ual᷊ingkeng kawasa kụ seng nighěllị i Kristus si siạ, ute iạ e matoghasẹ̌ tumatěngo haghim patikụ.

¹⁴Arawe i kamene seng nẹ̌tul᷊ungu iạ su ral᷊ungu kasasusaku; kụ apang kẹ̌koateng i kamene e mambeng mapia.

¹⁵Manga anạ u sěmbaụ tau Filipi! I kamene hala masingkạ kahěngang u piạ iạ naněntangu Makedonia kal᷊amona, su tempon Injilẹ̌ ene takụ nihabarẹ̌ kahumotongange, i kamene kakěsạ-kěsạ e nakatemang untunge ringangu dugine ringangkewen iạ.

¹⁶ Piạ iạ su Tesalonika kụ měgẹ̌gausẹ̌ tatal᷊ung, seng limembo wọu sěnsul᷊e i kamene němpěndohong tatal᷊ung si siạ e.

¹⁷Ene wal᷊inewe mangal᷊ene iạ kětạu mapulu manarimạ laonggọ. Kapuluku e ute kai tadeạu iạ makasilo manga ual᷊ine kụ makakatambawe kal᷊auntung i kamene.

¹⁸ Iạ seng něnarimạ u kěbị e — sarang katewe limembo wọu kasasukụ e! Kěbị apan laonggọ kụ nirohon kamene si siạ, seng takụ kinatarimạ bọu i Epafroditus. Ini iạ seng nakaěbạ. Kěbị apạewen takụ gẹ̌gausang kal᷊awọu ghaghěllị bọi kamene ene kai kere dal᷊uru mawěngi wọu sasěmba kụ nisěmba su Ruata kụ nitarimạ u Ruata ringangu naung mal᷊uasẹ̌.

¹⁹Mawu Ruata kụ takụ sẹ̌sěmbaěng, ute kai mědẹ̌dal᷊embong kakalạ e su ral᷊ungi Kristus Yesus, sarung manukụ kěbị apang gẹ̌gausang i kamene.

²⁰Dalo su Ruata i Amangi kitẹ sarang marěngụ-děngụ. Aming.

²¹Bunạko adatẹ̌ku su kěbị apang kawanuan Duata kụ nasěmbaụ dingangi Kristus Yesus. Dingangu tarimạko l᷊ai adatẹ̌ bọu manga anạ u sěmbaụ kụ ěndaung dingangku sini.

²²Kěbị kawanuan Duata su soa ini, kahumotongange i sire su istanang Kaisarẹ̌, něndohong adatẹ̌ si kamene.

²³Karimạko Mawu Yesus Kristus mangal᷊amatẹ̌ si kamene kěbị. Adatʼi kami, Paulus dingangi Timotius