Read Sangir KOLOSE 1 Bible Online

KOLOSE 1 - Sangir bible

KOLOSE 1

¹Manga anạ u sěmbaụ dal᷊ohon jamạatʼu Mawu su Kolose kụ satia su pẹ̌kakauhẹ̌ dingangi Kristus! Kere sěngkatau rarolohang i Kristus Yesus, — kahiang kapulun Mawu Ruata e — iạ nihengkẹ sěngkakahengkẹ dingangu anạ u sěmbaụ i kitẹ i Timotius, mělẹ̌harapu mal᷊umbạko Ruata i Amang kitẹ e měngonggọu al᷊amatẹ̌ dingangu karal᷊unsemahẹ̌ si kitẹ kěbị.

³I kami seng nakaringihẹ̌ u i kamene mạngimang su Mawu Yesus Kristus dingangu i kamene kuměndagu patikụ dal᷊ohon jamaatẹ̌. Kai ene hakịu su tempong i kami měkẹ̌kal᷊iomaneng baụgi kamene, i kandua e měngkate hanesẹ̌ makịtarimakasẹ su Ruata, i Amang u Mawung kitẹ i Yesus Kristus.

⁵I kamene mangimang dingangu i kamene kụkěndagẹ̌, u i kamene mělẹ̌harapẹ̌ apang kụ seng nisadia su sorga kahian Duata e waugi kau. I kamene seng nakaringihẹ̌ mạanung hal᷊ẹ̌ ene, piạ e Wal᷊o Mapia kụ kahěngang nihabarẹ̌ si kau.

⁶Habaru Mawu Ruata e nasawuhẹ̌ su kasěllahu dunia e mase pẹ̌bawiahu taumata e sěntiniạ lẹ̌al᷊amatengu habarẹ̌ ene, kerẹewe lai nạung pẹ̌bawiahu nial᷊amateng piạ i kamene nakaringihẹ̌ hal᷊ẹ̌ u tatal᷊ěntụ u Mawu Ruata e kụ kahěnga-hěngang nakaěnna.

⁷ Hal᷊ẹ̌ ene ipẹ̌paul᷊ị si kamene kinahian Epafras, dingang i kami e ikẹ̌kěndagẹ̌. I sie kai taumatam munarang Kristus satia měmẹ̌munara e waugu pandungang i kitẹ.[1]

⁸Kai wọi sie asal᷊e i kami e makadingihẹ̌ u kai kawasan Rohkẹ̌ u Ruata e i kamene makakoạ mẹ̌kakakěndagẹ̌.

⁹Kai ene hakịu i kandua měngkai hanesẹ̌ měkẹ̌kal᷊iomaneng baugi kamene nanětạewe rokeng bọu ěllo i kandua nakaringihẹ̌ habaru mạul᷊ị i kamene. I kandua měkẹ̌kal᷊iomaneng su Mawu Ruata e mal᷊owọko Rohkẹ̌ u Ruata e měngonggọu kasingkạ dingangu katatahuěnna masukụ si kamene kai apạ e kapulun Mawu Ruata.

¹⁰Ual᷊ingu ene ute i kamene makapẹ̌biahẹ̌ tumuhụ kapulun Duata, ringangu sěntiniạ makạl᷊uasẹ̌ naungʼE, hakịben su patikụ munara e i kamene kapạmurukangbe pul᷊ise mapapia. Dingangu kasingkạ i kamene mạanun Duata e mal᷊aing limembong kạpahuntinambane.

¹¹Karimạko ual᷊ingu kawasang Mawu Kasěllahenge, i kamene iapakatoghasẹ̌ hakịbeng i kamene makatahang dingangu makakẹ̌dang su patikụ sabarang, masasabarẹ̌ dingangu maral᷊uasẹ̌

¹²kụ dingangu makitarimakasẹ si[2] Amang. Batụu kai i Amange napakariading kamene wotonge makatarimạ u apan nisadian Duata e waugu taumatanʼE su kararatuangʼE matualagẹ̌.

¹³I Sie seng nělliung kitẹ bọu kawasang kararěndung kụ seng napěngal᷊ing i kitẹ su ral᷊ungu kararatuangu Ahuse ikẹ̌kěndagẹ̌.

¹⁴ Ual᷊ingu AhusʼE ene e i kitẹ niapakal᷊iu; mangal᷊ene ute kal᷊awọu rosang kitẹ e seng niampungang.

¹⁵I Kristus e kai gambarẹ̌ mal᷊ahẹ bọu awẹ u Ruata kụ tawe i kasasilo; i Kristus e kai Ahuse kaiakanenge, něngalembong kapiange wọu patikụ apan niriadi.

¹⁶U kai wọi Sie Mawu Ruata e napakariadin patikụ su sorga ringangu su dunia, patikụ sạbarang ikẹ̌kasilo ringangu tawe ikasasilo, nasowa l᷊ai su ral᷊unge kerẹewe patikụ rohkẹ̌ makawasa ringangu měpẹ̌parenta. Kasěllahu dunia ini e niriadi ual᷊ingu i Kristus dingangu waugi Kristus.

¹⁷Kal᷊amonan patikụ sabarang nariadi e, i Kristus semben těbe ene. Dingangu ual᷊ingu i Sie lai hakịu patikụ sạbarange seng su tampạ e sěmbaụ-sěmbaụ.

¹⁸ I Sie e těmbọu wadangʼE, kụ kai jamaatẹ̌, batụu kai i Sie simbul᷊u patikụ laidopu jamaatẹ̌ e. I Sie kai anạ kaiakanenge, kahumotong-motongange niapẹ̌biahẹ̌ kapiạ wọu kapapohongʼE, tadeạu sěmatangbe i Sie sẹ̌sane nakoạ kasěllahengu patikụ.

¹⁹Kai Mawu Ruata sẹ̌sane piạ kapulune tadeạu patikụ sạbarang kụ kaěbakeng su Mawu Ruata e, kaẹ̌bakengbe lai masukụ su AhusʼE.

²⁰ Kụ su ral᷊ungu Ahusẹ̌ ene lai Mawu Ruatae mapakariadin patikụ sabarang piạ pẹ̌dal᷊ahěmpukange kapia ringangʼi Sie — baẹbe patikụ apan su dunia, arau lai su sorga. Mawu Ruata e nẹ̌koạ kerene ual᷊ingu kapapohongu Ahuse su kalu kuruisẹ̌.

²¹Nạung kạngerẹ e i kamene marau wọu Mawu Ruata. I kamene rụdokạ ual᷊ingu lulu ringangu tiněnnang kamene raral᷊akisẹ̌.

²²Arawe ini ute, ual᷊ingu kapapohongu AhusʼE, Mawu Ruata e nẹ̌koạ pẹ̌sasěngkapiang kamene ringange nẹ̌saụ naul᷊ị. Ual᷊ingu kakakoạ kerene ute i kamene wotonge ipẹ̌těngon Duata e su ral᷊ungu kasasusi, matilang dingangu tawẹ turạe.

²³Semben tantu i kamene harusẹ̌be tatapẹ̌ satia su pěngangimang dingangu rumarisị matoghasẹ̌ su pěngangimang i kamene. Kumbahangbe sarang i kamene měměllọu pělaharapi kamene kụ seng nionggọ si kamene su tempon nakatarimạ Injilu Ruata. Habarẹ̌ ene e seng pinẹ̌dal᷊ahabarẹ̌ su apan taumata e su kasěllahu dunia e. Kụ ual᷊ingu lai ene watangengku, i Paulus hakịu seng nakoạ mẹ̌tatangkiang.

²⁴Orasẹ̌ ini e iạ mal᷊uasẹ̌ mẹ̌tatahangu sigěsạ baụgu pandungang i kamene. Batụu ual᷊ingu sunsarang badangku e, ute ipạnukụ e apang kụ bẹ̌dang ipẹ̌dararagi Kristus baụgu jamaatʼẸ̌, mangal᷊ene wadangʼE.

²⁵Duata e něndolohu iạ nakoạ mẹ̌tatangkiang jamaatʼẸ̌ baụgu mạpakạpiang kamene. Iạ e mambeng hinone maněpasu wal᷊on habarẹ̌ bọu Ruata e patikụ;

²⁶mangal᷊ene habarẹ̌ e seng dingangu hasụ e su taunge nal᷊iu ilẹ̌lirungu Ruata e su patikụ taumata kai orasẹ̌ ini e seng nilahẹ su manga umatʼE.

²⁷Mawu Ruata e mapulu mapakal᷊ahẹu kereapa kapiane ringangu kawawantuge ral᷊irunge waụgu patikụ taumata. Rahasia ene ute kai: I Kristus kai ene su ral᷊ungi kamene mangal᷊ene i kamene, sarungbe kapusakatengu kawawantugu Ruata.

²⁸I Kristus e kai sarung ipẹ̌dal᷊ahabari kami su kěbị taumata. I kami e kai měngonggọu ingate ringangu mạněntiro si sire kěbị e ringangu patikụ katatahuěnna. Timonang kami e ute kai tadeạu sěngkatau-sěngkatau e ahakeng sol᷊ong anun Mawu, tabidạen sěngkatau seng natěllang tuhụ marohkẹ̌, baụgu seng nasěmbaụ dingangi Kristus.

²⁹Tadeạu makakahumpạu ene ute iạ e měmunara kahěngang. Iạ e mẹ̌tawakal᷊i sěngapam botonge ringangu kạguwạu kuatẹ̌ kụ seng nionggọi Kristus si siạ dingangu nẹ̌karadiahang su watangengku e ringangu kasasukụ u kawasanʼE.