Read Sangir KOLOSE 2 Bible Online

KOLOSE 2 - Sangir bible

KOLOSE 2

¹Iạ e mapulu tadeạu i kamene e masingkạ měnsang kereapa katoghase iạ měbẹ̌bangkuadẹ̌ baụgi kamene ringangu waugi sire su Laodikia ringangu patikụ apang běgang iạ.

²Kěbị e takụ kinoạ tadeạu naung i sire mawal᷊insahẹ̌ dingangu i sire mẹ̌kakakěndagẹ̌ hakịu ene i sire masěmbaụ kahěnga-hěngang. Ual᷊ingu ene i sire ute těnga-těngadẹ̌ makaěnna ringangu měngiaking ore lai makakasingkạ u rahasian Duata e, kai i Kristus sẹ̌sane.[3]

³I Kristus e kai nakawualagu patikụ sipirang mapia ringangu kasingkạ u Ruata nạung mạbawuni.

⁴Iạ maul᷊ịu ini e tadeạu i kamene kumbahangbe kaakal᷊eng i sai-saim biwihe mararěngang.

⁵U manịeng badangku e maraung kamene, kai koạ e kere iạ ene sutal᷊oarang kamene. Iạ e měngkai mal᷊uasẹ̌ makạsilọ e si kamene sěngkanaung dingangu matoghasẹ̌ su pěngangimang si Kristus.

⁶Manga anạ u sěmbaụ kụ sen dimaẹ si Kristus Yesus Mawu e. Batụu ene i kamene pěmpẹ̌biahẹ̌be mạkakauhẹ̌ dingangʼE,

⁷ringangu měhamụ su ral᷊ungi Sie. I kamene e pěmpamětịkom pẹ̌bawiahi kamene ringangi Kristus pěmamanggilange. Pakahuntinambangkom pěngangimang i kamene e si Kristus, tumuhụ apan seng nitěntirone si kamene. Kụ naung i kamene e pakatatompẹko ringangu waweran tatarimakasẹ.

⁸Pakatateghang bue i kamene, kumbahangbe sarang piạu měmitaugẹ̌ si kamene, wěmbingang u těntirong manga kapanden taumata tạ mangal᷊ene, kětạeng makapal᷊idẹ̌. Manga kapanden dunia ene e wal᷊inewe wọi Kristus, kaiso kai wọu kapanden taumata samatang, dingangu wọu manga rohkẹ̌ u kawasan dunia.

⁹Batụu patikụ kakakoạ u Ruata e nẹ̌banua si Kristus su pẹ̌bawadangʼE.

¹⁰Kụ ual᷊ingu mẹ̌biahẹ̌ nasěmbaụ dingangi Kristus, i kamene mal᷊aing nighělirangu pẹ̌bawiahẹ̌ masukụ. Batụu i Kristus e kai těmbọ u patikụ rohkẹ̌ mạngawasa ringangu mẹ̌paparenta.

¹¹Ual᷊ingu nasěmbaụ dingangi Kristus e ute i kamene seng nisunatẹ̌, bal᷊inewe ual᷊ingu sunatẹ̌ kinoạ u taumata, kaiso kawe ual᷊ingu sunati Kristus kụ seng něliung kamene wọu kawasang kakanoạ marosa.

¹² Batụu su tempong kamene nịsasahani, ute i kamene kai nilẹ̌bing dingangi Kristus; kụ mal᷊aing dingangu sasahani ene, i kamene nipẹ̌biahẹ̌ kapia ringangi Kristus ual᷊ingu i kamene mangimang kawasan Mawu Ruata seng napẹ̌biahi Kristus wọu papatene.

¹³ I kamene nạung nate tuhụ marohkẹ̌ ual᷊ingu i kamene warạdosa, ringangu i kamene tawe nisunatẹ̌ tuhụ gěsi. Arawe orasẹ̌ ini Mawu Ruata napẹ̌biahi kamene ringangi Kristus. Mawu Ruata seng něngampung kal᷊awọu rosang kitẹ,

¹⁴ dingangu něndẹ̌dasẹ̌ pẹ̌sasal᷊ang kitẹ kụ mẹmatakụ i kitẹ dingangu atorange mawawěhạ. Dingangu měnděkạ winohẹ ene su kalu piněnggantongan, Mawu Ruata e něndẹ̌dasem patikụ laěnsilẹ̌ si kitẹ.

¹⁵Su kalu kuruisẹ̌ ene e i Kristus namatạ kal᷊awọu haghin rohkẹ̌ u mananěmbonang dingangu mangangawasa e nasue něngkaěnsu.[4] I sire nakoạ bawialaěng u l᷊awọ su piạ i Kristus měngẹ̌ngahạ i sire tabidạen tau kinataweng mạbawol᷊eng sutal᷊oaran wuntuangu nakauntung.

¹⁶ Kụ kumbahang mapakawalan taumata e mapẹ̌sal᷊ang kamene su hal᷊ẹ̌ u kakaěng dingangu pěnganginung, arau su hal᷊ẹ̌ewelain manga haribasarẹ̌ u agama arau ral᷊uasu wul᷊ang sumendạ arau ěllon Sawadẹ̌.

¹⁷Kěbị tamai ene e kětạeweng kěngkaung apan sarung duměnta, arawe karal᷊ahẹu wọu kěbị ene ute kai i Kristus!

¹⁸Kumbahangbe i kamene mapakawalam batangeng makịakal᷊ẹ̌ su taumata apang mẹ̌měllewe mẹ̌tẹ̌těngkasanạu naung dingangu mẹ̌ngadatẹ̌ manga malaekatẹ̌. Taumata kerene ute kai měngẹ̌ngobotu manga tiněnnane mạdunia ringangu lụlansịu apan uade kinasilone hala,

¹⁹ hakịu semben tawe mapulu měngumbala si Kristus nakoạ těmbọe. Su l᷊imang kawasang Kristus e, kạguwạu wadange mạpadul᷊i ringangu mědẹ̌dalahěmpụ apan laese, tụtuwọen sasombọ u Mawu Ruata e.

²⁰I kamene seng nate ringangi Kristus, ringangu seng niliu wọu manga rohkẹ̌ u mangangawasa runia ini. Kụ, kawe unụe i kamene měbẹ̌biahẹ̌ kere taumata wẹ̌dang makịkawasa su dunia ini? Kawe unụe i kamene měngkai kụkakoho su manga atorang kerene,

²¹”Kumbahang mẹ̌temang ene”, ”Kumbahang měnenggẹhẹ̌ apa ini”?

²²Kěbị atorang ene kai mang mạul᷊ịu apang paketang tawẹ gunane. Ene kětạeweng kal᷊awọu atorang dingangu manga těntiro apan nịkakoạ u taumata.

²³Tamai ene těngadẹ̌be ikẹ̌kasilo e kai munarang katatahuěnna, piạ e laansange tadeạu taumata e pạněmba malaekatẹ̌, mẹ̌těngkasanạ u naung dingangu pamamanti wadang, kaiso kěbị e mamben tawẹ gunane waụgu ipěnal᷊udẹ̌ ěnningu ghẹ̌si.[5]