Read Sangir KOLOSE 3 Bible Online

KOLOSE 3 - Sangir bible

KOLOSE 3

¹ I kamene e seng niapẹ̌bangung kapia ringangi Kristus. Ual᷊ingu ene i kamene kai harusẹ̌be pěmpẹ̌gausẹ̌ apan dasị su sorga, su piạ i Kristus měpẹ̌parenta ringangu Mawu Ruata.

²Pěmpěnẹ̌naungbe apan dasị sene e wal᷊inewe apan su dunia.

³Batụu i kamene seng nate, kụ pẹ̌bawiahi kamene e mạdal᷊irung dingangi Kristus su ral᷊ungu Mawu Ruata e.

⁴Kụ simbul᷊u pẹ̌bawiahẹ̌ tutune e ute kai i Kristus kụ mạeng i Sie sarung ikasilo e ute i kamene e mal᷊aing sarung ipakal᷊ahẹ dingangi Sie su ral᷊ungu kasasěllahʼE!

⁵Ual᷊ingu ene, pakasueko pate kal᷊awọu kapulun dunia e mẹ̌nẹ̌naghal᷊i watangengue; kere pẹ̌sasundal᷊ẹ̌, karal᷊amuhụ, abul᷊i, ěnning dal᷊akisẹ̌ dingangu anggang (batụu anggang e kai mẹ̌sul᷊ungu pal᷊ahamawu mahan duata).

⁶Manga hal᷊ẹ̌ kerene e kai makạsongkahẹ̌ dal᷊angehu Ruata su apan taumata ta tumatuhụ si Sie.[6]

⁷Nạung humotong i kamene hala e tụtuhụ be lai haghing kapulu kerene, su tempong i kamene su ral᷊ungu kawasane.

⁸Arawe ini e ute i kamene pěmpěnděmmẹ u haghing kararal᷊akisẹ̌ bọu watangengu: kumbahang měngkai mẹ̌pědu, arau měndongka, arau piạ pěndangu inụ su taumata wal᷊ine. Kumbahang mẹ̌dohang arau mẹ̌beram bawera kotorẹ̌.

⁹ Kumbahang měmpẹ̌konti sěmbaụ suwal᷊ine, u pẹ̌bawiahẹ̌ těbe e ringangu patikụ kakakoạ e sen nirěmmẹ i kamene.

¹⁰ Kụ i kamene ini e kai sen taumata nionggotangu pẹ̌bawiahẹ̌ buhu tẹ̌tal᷊ěmbuhuang hanesẹ̌ itẹ̌tuhụ awẹ u Měndariadine kụ kai Ruata. Timonane ute tadeạu i kamene makakiral᷊a Ruata ringangu kasasukụ e.

¹¹Makoạ kere pul᷊ise wọu ene ute nasuẹ e něngkailang pẹ̌dal᷊ahaedangu tau Yahudi ringangu wal᷊ine Yahudi; nisunatẹ̌ dingangu tawe nisunatẹ̌; semben tawẹ apa pẹ̌dal᷊ahaedangu tau raghị dingangu taumata ral᷊akisẹ̌; arau ěllang dingangu wal᷊ine ěllang; batụu i Kristus kai mạnahiangkung patikụ sạbarang dingangu i Sie nasěmbaụ dingang i sire kěbị e.

¹² I kamene e kai taumatan Mawu. Ruata e kiměndagi kamene mase němile si kamene makoạ tataghuanengʼE tani. Ual᷊ingu ene i kamene harusẹ̌ pěmpělahẹu pẹ̌kakakěndagẹ̌, mẹ̌sěngkapiang anạ u sěmbaụ, kasasanạ u naung, sikome naung, ringangu makẹ̌dang su sigẹ̌sạ.

¹³ I kamene harusẹ̌ mẹ̌sasabarẹ̌ sěmbaụ dingangu wal᷊ine, dingangu mẹ̌gaghěllị u ampung kereu piạ u měndesọ tunenaung su wal᷊ine. Mawu e mal᷊uasẹ̌ měngampung si kamene, kụ i kamene mal᷊aing hinom mẹ̌pẹ̌papangampung sěmbaụ dingangu wal᷊ine.

¹⁴Su wowon tamai ene, kěbị e ute: i kamene harusẹ̌be mẹ̌kakakěndagẹ̌ u kakěndagẹ̌ e mạpakasěmbaụ i kamene makoạ masukụ.

¹⁵Kariadiko apan sipirangu e měngkai mạtuntụ u pẹ̌darame nionggọ i Kristus su ral᷊ungu naungu. U i kamene kai nikuiangu Ruata e makoạ laesu wadang sěmbaụ, tadeạu i kamene mẹ̌biahẹ̌ su ral᷊ungu pẹ̌darame wọu anung Kristus e. Kụ i kamene měngkai pakịtarimakasẹ.

¹⁶ Karimạko hengetang i Kristus napenẹu al᷊amatẹ̌ e měngkai luměnạ su ral᷊ungu naung i kamene. Kụ i kamene e pěmpẹ̌tatěntiro wue sěmbaụ dingangu wal᷊ine ringangu pěmpẹ̌tatẹ̌gu wue sěngapang kaudupe. Pěmpẹ̌kantarikon Mazmurẹ̌ dingangu raralo arau kakantarị mararohkẹ̌; pẹ̌kantarịko waugu Ruata, ringangu pěndangu tatarimakasẹ su naung i kamene.

¹⁷Nimbụe, patikụ apang kinoạ i kamene, arau mạbera e, hinong i koạ dingangu iwera su ral᷊ungu arengu Mawu Yesus. Kụ i kamene e pěmpẹ̌kal᷊iomanengko su Mawu Ruata i Amang bọi Yesus.

¹⁸ I kamene manga wawine e! Pakasasuměllung bue su kawingi kamene, u kawe kerene hinone kakakoạ u taumatan Sahani.

¹⁹ I kamene manga esẹ! Kẹ̌kěndagẹ̌beng kawingi kamene. Abe ral᷊ahětu mẹ̌koạ si sire.

²⁰ I kamene manga rariọ e! Kai kerene mẹ̌koạ taumatan sahani e, harusẹ̌be pakararingihẹ̌ si amangu ringangu si ninangu, batụu kai ene makạl᷊uasẹ̌ naungu Mawu Ruata.

²¹ I kamene manga i amange! Ariẹbe mapal᷊angehu anạ i kamene mạdiring kumondọ naung i sire.

²² I kamene mẹ̌tatangkiang e! Pakatatuhụ su manga mawung kamene su dunia e su patikụ sabarang. Abe kawe kětạeng tụtuhụ su tempon i sire makạsilo si kamene, ual᷊ingu i kamene kawe kětạeng makiralo. Tuhukeko i sire ringangu naung matul᷊idẹ̌, batụu i kamene matakụ u Mawu.

²³Hal᷊ẹ̌be sude nionggọ si kamene ute, koạko ringangu kasěllahu naungu tabidạu i kamene měkẹ̌koạ baugu Mawu wal᷊inewe tumbạem baugu taumata.

²⁴Pẹ̌tahěndung u i kamene sarung makatarimạ bawal᷊ise wọu Mawu. Apan sen nisadiam Mawu e waụgu taumatanʼE, ute kai ene sarung gělirang si kamene. Batụu mawu tutune ute kai tẹ̌tangkianeng i kamene, i Sie kai i Kristus sẹ̌sane.

²⁵ Kụ isai-sai wue nẹ̌koạ pẹ̌sasal᷊a e, sarungbe manarimạ patikụ pẹ̌sasal᷊ane; batụu Mawu e tawe měmamile ghati.