Read Sangir KOLOSE 4 Bible Online

KOLOSE 4 - Sangir bible

KOLOSE 4

¹ Manga anạ u sěmbaụ apan nakoạ mawu e! Pakapapiako měmpẹ̌koạ manga mẹ̌tatangkiang si kamene tuhụewe katěngadẹ̌ dingangu kạadilẹ̌. Pětahěndung batụu i kamene kai piạ Mawu man sěmbaụ su sorga.

²Pakakakěhagẹ̌ko měmpẹ̌kal᷊iomaneng, pakasasạdia, apidu kapẹ̌tarimakasẹ e su Ruata.

³Pěmpẹ̌kal᷊iomaneng laing kami e tadeạu Mawu Ruata e mangonggọben loahe mapia si kami makapěngekeng habaru hengetange mạanung lělirungi Kristus. Ual᷊ingu hal᷊ẹ̌ ene e tangu iạ e orasẹ̌ ini kai mạtatahungkụ.

⁴Pěmpẹ̌kal᷊iomanengko tadeạu iạ e makatualagu lělirung ene e pakal᷊ahẹ-lahẹ kerẹewe hinone.

⁵ Su ral᷊ungu kal᷊ahěmpụ i kamene ringangu apan taumata ta měmpangangimang e ute i kamene pěmpẹ̌biahẹ̌be pakatatahuěnna, pěmpẹ̌dẹ̌deạbe loahe pakapapia-pia.

⁶Karimạko pal᷊ahumbisarang kamene e hinowen měngkai makạdal᷊uasẹ̌ dingangu makạbinsana. I kamene harusẹ̌be masingkạ u kere apa i kamene hinong sumimbang kakiwal᷊on sěngkatau-sěngkatau e.

⁷ I Tikhikus, hapị i kitẹ ikẹ̌kěndagẹ̌, sarungbe měhabarẹ̌ si kamene katataingu pẹ̌bawiahẹ̌ku e. I sie satia měmunara ringangi kami waụgu Mawu e.

⁸Iạ něndolohi sie sol᷊ong anung kamene, tadeạu i kamene makakasingkạ u kakakoạ u pẹ̌bawiahi kami e ringangu i kamene měngkahiborẹ̌.

⁹ I Onesimus sarung dumal᷊eng sěngkaral᷊eng dingangi Tikhikus; i sie anạ u sěmbaụ bọu tal᷊oarang kamene. I sie taumata satia, ringangu i kami kụkěndagi sie. I kanduang Tikhikus e kai sarung měhabarẹ̌ si kamene patikụ hal᷊ẹ̌ apan nariadi su tampạku ini.

¹⁰ I Aristarkhus mạtatahungkụ dingangku e, měndohong tabeạ si kamene. Kerene lai i Markus, anạ u tamahuari ringangi Barnabas. (I kamene semben nakatarimạ u tatanataku e paněnsomahẹ̌ si sie kereu i sie ruměnta su anung kamene.)

¹¹Tabeạko l᷊ai bọi Yesus kụ isẹ̌sẹ̌bạ l᷊ai si Yustus. Bọu tal᷊oaran tau Yahudi apan seng mạngimang su Mawu Yesus, kẹ̌tabeng i sire těllu hala kụ orasẹ̌ ini e mělẹ̌hal᷊ẹ̌ dingangku mědeạu měndal᷊eng munaram Mawu Ruata. I sire mamben těngadẹ̌ nẹ̌tul᷊ungu iạ.

¹²Tabeạ bọu anung Epafras. I sie mal᷊aing taumatang kamene. I sie kai mẹ̌tatangkiang si Kristus Yesus, kụ sịdutu mang mẹ̌kẹ̌kal᷊iomaneng maamumang baugi kamene. I sie ghụgahiorọ sěngapam botonge su Ruata tadeạu pěngangimang i kamene matoghasẹ̌ dingangu i kamene e kahěnga-hěngang mahuntimadẹ̌, tadeạu i kamene tinalungbe masatia su kapulun Duata.

¹³Iạ e makasahidi sẹ̌saku u i sie seng něhal᷊ẹ̌ masěgadẹ̌ baugi kamene ringangu waụgi sire su Laodikia ringangu Hierapolis.

¹⁴ I Dokter Lukas, ikẹ̌kěndagi kitẹ, dẹ̌duan Demas, něndohon tabeạ si kamene.

¹⁵Pěmpaul᷊ịkon tabeạ i kami su manga anạ u sěmbaụ Sahani su Laodikia; ringangu su Nimfa, ringangu su ral᷊ohon jamaatẹ̌ apang měmpẹ̌kẹ̌kal᷊iomaneng su wal᷊ene.

¹⁶Samurin suratẹ̌ ini e iwasa sutal᷊oarang kamene e, ute wasako l᷊ai su jamạatʼu Laodikia. Kerene lai i kamene hala harusẹ̌ mẹ̌basa suratẹ̌ sarung dingotang bọu Laodikia, si kamene.

¹⁷ Dingangu pěmpaul᷊ịko si Arkhipus, ”Pakasueweng koạe munara nionggọ si kamene gunang mẹ̌tangkiang Mawu.”

¹⁸Tabeạku, i Paulus. Iạ sẹ̌saku e němohẹ wahageang ini. Abe kiwul᷊ei iạ e wědang mạtatahungkụ! Karimạko Mawu e měngal᷊amatẹ̌ si kamene. Adatʼi kami, Paulus