Read Sangir 1 TESALONIKA 2 Bible Online

1 TESALONIKA 2 - Sangir bible

1 TESALONIKA 2

¹Manga anạ u sěmbaụ! I kamene hala masingkạ u pẹ̌tatiwong kami si kamene e tawe makoạbe tawẹ gunane.

² I kamene masingkạ u kal᷊imonang kami e riměnta su anung kamene su Tesalonika, i kami seng nẹ̌tatahangu tatingkaị dingangu sasamedẹ̌ su Filipi. Kaiso maningbe lawọ taumata rụdokạ si kami e, Ruatang kitẹ e seng něgěllịu kawawahani baụgu pělẹ̌habarʼu Injilẹ̌ si kamene wọʼi Sie.

³Pěmamaringang i kami e si kamene wal᷊inewe ual᷊ingu ěnna nẹ̌sal᷊a; kerene lai wal᷊inewe ringangu těgal᷊ẹ̌ dal᷊aị arau manga ipạngakal᷊ẹ̌.

⁴Tala wue! I kami e wal᷊inewe mạhumbisara sěmatang ipạmia naungu taumata, kaiso kai ipạmia naungu Mawu Ruata, mạmanikạ dal᷊ungu naung i kami. U i kami e kai narekeng taumata wotonge mamal᷊awuhu Injilẹ̌ e.

⁵I kamene hala masingkạ u i kami e tawẹ sarang sěnsul᷊e měbẹ̌berang bawera papal᷊ano tul᷊i arau kai manga mẹ̌kẹ̌kal᷊irungu kai piạ ambinge maanggang. Mawu Ruata e sahidine!

⁶I kami e mal᷊aing bal᷊inewe mẹ̌gẹ̌gausʼu makịdarumalo su taumata — baẹ bọʼi kamene arau lai wọu wal᷊ine. U hinone kere sěngkatau rarolohang i Kristus, i kami e wotonge wue měnuntụ apa-apa wọʼi kamene.

⁷Kai i kami e měngkate mẹ̌tẹ̌těngkasikome su tempọen mạdal᷊aụ dingang i kamene, tabidạen sěngkatau ghaghurang bawine[1] měndiagạ anạ e.

⁸Ual᷊ingken kakěndagʼi kami, i kami e sạdia mangonggọ si kamene wal᷊inewe tumbạu Injilẹ̌ e, kaiso kawe lai pẹ̌bawiahʼi kami e. Batụu mạhěmpal᷊iu wue kakěndagʼi kami e si kamene.

⁹Tantu i kamene bẹ̌dawen makạtahěndung kereapa katoghase i kami mẹ̌tawakal᷊i ringangu mẹ̌dẹ̌dal᷊ahingidẹ̌. Kaělloěng kahẹ̌biang i kami e měmẹ̌munara tadeạu i kami e tawe mapakasigěsạu sarang sěngkatau wọu tal᷊oarang kamene su tempong i kami e mẹ̌lẹ̌habarʼu Injilẹ̌ si kamene.

¹⁰I kami e mẹ̌bẹ̌biahẹ̌ susi, matul᷊idẹ̌ dingangu tawẹ sěngkul᷊e nihino si kamene kụ seng němpangimang si Kristus. I kamene e kai mẹ̌sasahidi si kami, kerene lai Mawu Ruata e.

¹¹I kamene masingkạu i kami e němpẹ̌koạbe si kamene sěngkatau-sěngkatau kere sěngkatau i amang miẹ̌bạ anạ e.

¹²I kami e mẹ̌nẹ̌nasa si kamene, i kami mẹ̌gẹ̌gěllịu laansang si kamene ringangu i kami e měnẹ̌nahěsẹu tadeạu i kamene mẹ̌biahẹ̌ be sěngapam botonge kerene hakịu makạl᷊uasẹ̌be naungu Mawu Ruata. Batụu Mawu Ruata e seng nẹ̌kui si kamene, mědeạu makahombangbe wahageang i kamene su ral᷊ungu kararatuangu Mawu Ruata e, ringangu su ral᷊ungu kawawantuge.

¹³Piạbe hal᷊ẹ̌ sěmbaụ lai wal᷊ine; makạkoạ si kami měngkate masau makitarimakasẹ su Mawu Ruata. Kụ piạ e i kami mělẹ̌habarʼu hengetangu Mawu e si kamene kụ i kamene rimaẹ u hengetang ene wal᷊inewe kere waweran taumata kaiso kawe kere hengetangu Ruata! Mawu Ruata e kạpẹ̌munarane su ral᷊ungu watangeng i kamene apan mangimang si Kristus.

¹⁴ Manga anạ u sěmbaụ, apang kinahombangengi kamene mal᷊aing seng kinahombangengu manga jamạatʼu Mawu e su Yudea nakoạ tataghuanengʼi Kristus Yesus. I kamene e nẹ̌tatahangu tatumbiagʼu sěmbalagheng i kamene hala, kerẹewe semben nikahombangengu manga jamạatʼu Mawu su Yudea e wọu sěmbẹ̌kan sire tau Yahudi.

¹⁵ Tau Yahudi e seng němate Mawu Yesus, dingangu manga nabi e, apidewe lai mẹ̌nẹ̌numbiagẹ̌ si kami e. Kěbị taumata e seng nakoạ sědụ i sire, dingangu Ruata e měngkatewe tawẹ karal᷊uase si sire.

¹⁶Kutẹu i sire měngkatewe měmpẹ̌nẹ̌nahaghe si kami mạdiring i kami makapaul᷊ị (u hengetangu Mawu Ruata e) su wal᷊ine tau Yahudi habareng makasal᷊amatẹ̌ patikụ umatẹ̌ e. Ual᷊ingu ene ute taumatan Yahudi e sauneng mạhuntinambang kal᷊awọe rosan sire. Kụ ini e pěngěnsueěnge ute i sire kahombangengu hukumangu ral᷊angehẹ̌ e wọu Mawu Ruata!

¹⁷Arawe i kamene anạ u sěmbaụ, dokẹeweng i kami e naghea ghěnnangu sěngkatempo wọi kamene — naghea wọu mata e kaiso wal᷊inewe su naung — kụ i kami e měngkai mẹ̌kẹ̌kul᷊ěte mẹ̌deạu makasilo ghating kamene!

¹⁸I kami e mẹ̌kẹ̌karaki u mẹ̌tiwo si kamene e, kụ iạ e seng něnal᷊ukạ sěnsul᷊e ruan sul᷊e kai setange měngkai měnẹ̌nahaghe si kami e.

¹⁹Kụ těnga-těngadẹ̌be mang i kamene kapangumbalaěng dingangu makạl᷊uasẹ̌ si kami. U hẹ̌doweng kereu Mawu Yesus diměntạ e dingangu i kitẹ mẹ̌těngon Sie e, ute i kamene sarung makoạ dal᷊uasi kami!

²⁰Kụ mambeng i kamene makạl᷊uasẹ̌ dingangu makạl᷊iagẹ̌ kami!