Read Sangir 1 TESALONIKA 5 Bible Online

1 TESALONIKA 5 - Sangir bible

1 TESALONIKA 5

¹Manga anạ u sěmbaụ, semben tawahal᷊uasu měnuratʼu kasasahẹ u tempong karariadin tamai ini.

² U i kamene hala seng masingkạ mal᷊ahẹ u ěllon darěntan Mawu e sarung marěnta kere tahatako ruděnta hẹ̌bi.

³Kai kereu piạ taumata mẹ̌bera: ”Patikụe su karalenehẹ̌ dingangu tạ konsang apa,” tangu sěngkal᷊ěndị u i sire kinahombangengu kawawinasa, kụ tawẹu sarang sěngkatau nal᷊iwirẹ̌. Kụ ene kai nariadi sěngkělěndịu, mẹ̌sul᷊ungu tau wawine piạ kapapia sěngkianu hombangengu kal᷊iki.

⁴Kai manga anạ u sěmbaụ e wal᷊inewe taumata mẹ̌bẹ̌biahẹ̌ su ral᷊ungu kararěndung, hakịbeng ěllo ene kai makạl᷊ahěkosẹ̌ si kamene kere rarěntan tahatako.

⁵I kamene kěbị kai taumatan tualagẹ̌; i kamene nasowa su ěllo matualagẹ̌. I kitẹ e wal᷊inewe taumata měbẹ̌biahẹ̌ su kararěndung arau nasowa ghal᷊ipohong hěbi marěndung.

⁶Ual᷊ingu ene ute i kitẹ tawe wotonge kahuntikilang kere i sire wal᷊ine. I kitẹ e kai hinong maral᷊ukadẹ̌ dingangu tiněnnang kitẹ e kawe hinong matualagẹ̌.

⁷Su tempong hẹ̌bi e taumata měmpẹ̌tẹ̌tikị, dingangu su tempong hẹ̌bi e lai taumata mẹ̌tẹ̌těngkiwukang.

⁸ Arawe i kitẹ ini e kai taumata nasowa su ěllo matualagẹ̌; ual᷊ingu ene ute tiněnnang kitẹ e harusẹ̌be matualagẹ̌. I kitẹ harusẹ̌ mangimang su Mawu ringangu kuměndagu taumata wal᷊ine ringangkeweng mělěharapẹ̌ matinalung u Mawu Ruata e sarung makasal᷊amatẹ̌ si kitẹ. Kai ene e aghidẹ̌ kụ makaěllung si kitẹ su ral᷊ungu pẹ̌sasekẹ mẹ̌sekẹ u kararěndung.

⁹Mawu Ruata e němile si kitẹ bal᷊inewe tadeạu ihukung, kaiso tadeạu i kitẹ makahombang kasasal᷊amatẹ̌ bọʼu Mawung kitẹ i Yesus Kristus.

¹⁰I Sie napohong baụgi kitẹ, tadeạu su tempong i Sie ruměnta kapia — měnsangbe i kitẹ bẹ̌dang biahẹ̌, arau kai seng nate — kai i kitẹ e makapẹ̌biahẹ̌be ringangʼE.

¹¹Ual᷊ingu ene, pěmpẹ̌dal᷊ahiborẹ̌ dingangu pěmpẹ̌tatoghasẹ̌, mẹ̌sul᷊ungkewen i kamene seng měkẹ̌koạ ene orasẹ̌ ini.

¹²Manga anạ u sěmbaụ, i kami e mẹ̌dẹ̌dorong sěngapam botonge tadeạu i kamene pěmpangadatẹ̌ su taumata apan měmpěmẹ̌munara sutal᷊oarang kamene; mangal᷊ene si sire ewe apan nipilen Mawu e mědeạu měngahạ dingangu měnasa si kamene.

¹³Kụ pěmpěngarẹ̌gangben sire pakapia-pia ringangu kakěndagẹ̌ u mẹ̌tahěndungkewelai apa kinoạ i sire. Pěmpẹ̌biahẹ̌ko pakaghaghighilẹ̌ sěntiniạ i kamene.

¹⁴I kami e mal᷊aing mẹ̌dẹ̌dorong, manga anạ u sěmbaụ, uriheko pakasikome i sain mạdiri měmpehal᷊ẹ̌; toghaseko naung u apang měngkạtakụ; pẹ̌tul᷊ungkon taumata hinong itul᷊ung dingangu pakakakědang mẹ̌těngong kěbị taumata.

¹⁵Pakapapia wue tadeạu mạdirin piạu mẹ̌mal᷊isʼu ral᷊akị, ipěmal᷊isẹ̌ dal᷊akị e kaiso sěntiniạ měngkai pěmpẹ̌tatumẹ̌gal᷊ẹ̌ měmpẹ̌koạ mapia sěngkatau su sěngkatau l᷊awọ i kamene ringangu su kěbị.

¹⁶Měngkai pahul᷊uasẹ̌ sěntiniạ,

¹⁷dingangu pěmpẹ̌kal᷊iomaneng sidutu.

¹⁸Su patikụ kakakoạ u pẹ̌bawiahẹ̌ e měngkai pakịtarimakasẹ sidutu su Mawu Ruata e, u kai ene kẹ̌kapulune wọʼi kamene kere sěngkatau měbẹ̌biahẹ̌ nasěmbaụ su ral᷊ungi Kristus Yesus.

¹⁹Kumbahangbe měnguhung Rohkẹ̌ u Ruata e.

²⁰Kumbahangbe tawe měngarěgang kal᷊awọu habarẹ̌ ilẹ̌onggọ u Rohkẹ̌ u Ruata e.

²¹Patikụ sạbarange měngkai pakạbanikate, ringangu apan mapapia e harusẹ̌ tẹ̌tol᷊ei.

²²Pẹ̌těngkagheangkom patikụ haghin kararal᷊akisẹ̌.

²³Karimạko Mawu Ruata sẹ̌sane e měngonggọ si kitẹ e karal᷊unsemahẹ̌, mạpakariadin taumata e kahěnga-hěngang mẹ̌biahẹ̌ sěmatang baụgu Mawu Kasěllahenge. Mal᷊owọko Mawu e měngkai mělẹ̌lukadẹ̌ si kamene sidutu baẹ su rohkẹ̌, himukudẹ̌ ore lai su wadang i kamene, sarangkewen tawẹ turạe su tempọen Mawung kitẹ i Yesus Kristus e ruměnta kapia.

²⁴Mawu Ruata e, kụ seng nẹ̌kui si kamene, sarung mapakariadin ene e watụ u i Sie kai masatia.

²⁵Doa i wue i kami e manga anạ u sěmbaụ!

²⁶Pěmpẹ̌papangadatẹ̌be kěbị pakasasuměllung lawọ anạ u sěmbaụ tau Sahani.

²⁷Ual᷊ingu kawasan Mawu e, iạ mẹ̌dẹ̌dorong sěngapam botonge tadeạu i kamene mapẹ̌basan suratẹ̌ ini e su patikụ anạ u sěmbaụ tamba pangangimang.

²⁸Mal᷊owọko Mawung kitẹ i Yesus Kristus e, měngal᷊amatẹ̌ si kamene. Adatʼi kami, Paulus