Read Sangir YOSUA 1 Bible Online

YOSUA 1 - Sangir bible

YOSUA 1

¹Samuring kapapaten Musa ěllangu MAWU ene, MAWU e něhengetang su tumatimbang i Musa kụ kai i Yosua anạ i Nun.

²MAWU e něhengetang, ”Ěllang-Ku i Musa e seng nate. Tangu orasẹ̌ ini i kau ringangu patikụ kawanuang Israel pěmpědariahịe lumiu Sal᷊ụ u Yordan mẹ̌timona tampạ sarung Takụ i onggọ si sire.

³ Iạ seng něhengetang si Musa u kěbị beọ e kahumpakeng i kamene Takụ i onggọ si kamene, Yosua ringangu patikụ kawanua-Ku.

⁴Beọ u ene sarung mawingkahe bọu ngara l᷊inggi su sěmběkan timuhẹ̌ sarang Bawul᷊urangu Libanon su sěmběkan sawěnahẹ̌ dingangu wọu Sal᷊ụ u Efrat gẹ̌guwạ ene su sěmběkan dakị e těpase nangělikụ banuang Het sarang Laudu Tal᷊oarane su sěmběkam bahẹ.

⁵ Tawẹu sarang sěngkatau makawatạ si kau Yosua kanandum pẹ̌bawiahu. Batụu Iạ sarung duměndingang si kau kerẹewe kal᷊imona Iạ diměndingang si Musa. Iạ tawe měněntang i kau.

⁶ Karimạko i kau e maiaking dingangu wahani, u i kau sarung měngahạ u wansa ini su tempong i sire kimaiang su wanua Takụ niriandi su manga i upung i sire.

⁷Kětạeweng, karimạko i kau e mamben těngadẹ̌ maiaking dingangu wahani. I kau harusẹ̌ pakarariagạ tadeạu i kau e tụtuhụbe kal᷊awọu tita nionggọ i Musa ěllang-Ku ene si kau, kụ kumbahangbe tawe sěmpikangu sarang kạdodọ, tangu i kau sarung mẹ̌barạuntu.

⁸Bukẹ̌ u Toratẹ̌ ene harusẹ̌ hanesẹ̌ bẹ̌basaěngu su manga umatẹ̌-Ku. Ěndungeko bukẹ̌ ene ěllo ringangu hěbi, tadeạu i kau mẹ̌koạ patikụ apang kạbawohẹ su ral᷊unge. Kereu i kau mẹ̌koạ patikụ ene, pẹ̌bawiahue masukụ dingangu mawarạuntu.

⁹Pẹ̌tahěndung, Iạ seng něhabarẹ̌ si kau tadeạu i kau mangiakingbe kahěngang dingangu wahani! I kau kumbahangbe matakụ arau kawe tawẹ igase, u Iạ e kai MAWU Ruatanu rụděndingang si kau walạewe i kau sarang apa.”

¹⁰Tangu i Yosua něngoro su manga pangahạ u kawanuang Israel,

¹¹tadeạu apělẹ̌likụ kasěllahu pẹ̌darasengangu umatu Israel dingangu něhabaru parenta ini, ”Pěnadiako sinasạ, batụu seng kate těllu ěllo l᷊ai i kamene harusẹ̌ lumiu Sal᷊ụ u Yordan mẹ̌deạu makakaiang su wanua kụ nionggọu MAWU Ruatanu e si kau.”

¹² Baugu hěnton Ruben, hěnton Gad, dingangu maloara wọu hěnton Manasye, i Yosua nẹ̌bera,

¹³”Pẹ̌tahěndung! I Musa ěllangu MAWU e seng nẹ̌bera si kamene u ěntana su sěmběkan daki wọu Sal᷊ụ u Yordan ini nionggọu MAWU Ruatanu si kau makoạ banuanu.

¹⁴Kěbị anạu ringangu kawingu ringangu binatangu botonge apakatanạ sini, arawe manga sordadong kamene harusẹ̌be sadia mẹ̌sekẹ kụ měngal᷊imona taumatang Israel bal᷊ine lumiu Sal᷊ụ u Yordan.

¹⁵I kamene harusẹ̌ pẹ̌sumbala si sire sarang i sire makakaiang su ěntana su sěmběkam bahẹ bọu Sal᷊ụ u Yordan ini, kụ nionggọu MAWU Ruatanu si sire. Samuring MAWU něngonggọu karal᷊enehẹ̌ su patikụ tau Israel, buhụe i kamene wotonge mẹ̌sul᷊e kapia sol᷊ong banuang kamene hala su sěmběkan daki wọu Yordan ini, kụ nionggọ i Musa ěllangu MAWU e si kau.”

¹⁶Tangu hěnton Ruben, Gad, dingangu maloara wọu hěnton Manasye ene simimbang, ”Walạewe měnsang apa nioronu si kami, sarungbe koateng i kami, ringangu walạewe měnsang irolohu sarang apa i kami e, mang tamaiang i kami.

¹⁷I kami e mang tumuhụ si kau, kerẹewe lai nạung i kami e mang matuhụ si Musa. Mal᷊owọko MAWU Ruatanu e ruměndingang si kau kerẹewe lai i Sie diměndingang si Musa!

¹⁸Apan taumata kụ mạdiri tumuhụ kawasanu, arau tawe tumuhụ parentanu e sarung i hukung pakapate. Karimạko i kau e maiaking dingangu wahani!”