Read Sangir YOSUA 10 Bible Online

YOSUA 10 - Sangir bible

YOSUA 10

¹Adoni-Zedek, datun Yerusalem,[2] nakaringihẹ̌u i Yosua seng namul᷊aho ringangu něnggagholọ soang Ai marihutu, ringangkewe němate ratune kerẹwe seng nịkakoạ e su Yerikho, ringangu ratune. I sie mal᷊aing nakaringihě u tau Gibeon seng nẹ̌koạ dianding pẹ̌dal᷊ahapị dingangu tau Israel dingangu natanạ su tal᷊oaran sire.

²Tumanạu Yerusalem matakụ-takụ u Gibeon kai soa masěllahẹ̌; mẹ̌sul᷊ung kasariane ringangu apan soa kụ piạ datune, katewe lai limembong kasariane wọu Ai. Taumatane mal᷊aing tahapẹ̌sekẹ dingangu wawahani.

³Ual᷊ingu ene i Adoni-Zedek něndolohu taumata sarang anun Datu i Hoham su Hebron, Datu i Piream su Yarmut, Datu i Yafia su Lakhis, dingangu Ratu i Debir su Eglon, kụ něhabaru tatanata kere ini,

⁴”Mahiko pẹ̌sumbala si siạ pěnekẹ Gibeon, u taumatane kai seng němato pẹ̌darianding pẹ̌dal᷊ahapị dingangi Yosua ore lai tau Israel.”

⁵Tangu ratung Amori limang katau ene, kụ kai ratung Yerusalem, Hebron, Yarmut, Lakhis, dingangu Eglon němpẹ̌tatamba, mase ringangu kal᷊awọu sordadon sire, i sire němpěliwung dingangu něngalo Gibeon.

⁶Tau Gibeon něndingọu habarẹ̌ ini si Yosua su pẹ̌darasengang su Gilgal, ”Abe wala i kami hala, Tuang! Lighạbe rěnta pẹ̌sumbala si kami, u sordado wọu kěbị datung Amori su wawul᷊urange kěbị seng němpẹ̌tatamba rumokạ si kami!”

⁷Mase i Yosua ringangu patikụ sordadone, nasowa l᷊ai manga wuntuange kapapiaěnge, nẹ̌buạ bọu Gilgal mẹ̌deạu mẹ̌sekẹ.

⁸MAWU něhengetang si Yosua, ”Abe katakụ i sire. Kal᷊auntu seng Takụ nionggọ si kamene, ual᷊ingu ene tawẹu sarang sěngkatau wọi sire makararagẹ̌ dumokạ si kau.”

⁹Sěhěbi tiwatu i Yosua ringangu wuntuange němpẹ̌dal᷊eng bọu Gilgal sarang Gibeon, bọu e měngalo tau Amori makạl᷊ahěkosẹ̌.

¹⁰MAWU napakariadin tau Amori nẹ̌sal᷊iawuhẹ̌ su tempon nakasilo sordadon tau Israel. Mal᷊awọ tau Amori nipate su Gibeon, dingangu apam bědang biahẹ̌ sẹ̌sahusuang rụděsungu lengehu wul᷊ude su Bet-Horon sarang karaung Azeka ringangu Makeda su sěmběkan timuhẹ̌.

¹¹Su tempon tau Amori kạděsunge lengehu wul᷊ude ene ual᷊ingu tụtal᷊angu watangeng bọu sordadong Israel, MAWU e naparasehu tahiti watu ghaghaghuwạ bọu langị si sire kanandun dal᷊eng sarang Azeka. Apan nate kinahinoěngu tahiting eisẹ̌ e limembong kal᷊awọe wọu nipaten tau Israel.

¹²Su ěllo ene piạ e MAWU nangonggọu kal᷊auntu su tau Israel dimokạ tau Amori, i Yosua nẹ̌bisara su MAWU. Kụ su těngon tau Israel, i Yosua nẹ̌bisara, ”Ei matangěllo! Katanạ e su wowong Gibeon. Dingangu i kau e wul᷊ang! Kumbahangbe měngal᷊ing bọu wowong bal᷊ang Ayalon.”

¹³ Tangu matangěllo e nědungke ringangu wul᷊ang e tawe něngensọ sarang tau Israel nasue nakawatạ manga sekẹ e. Karariadi ini e kạbawohẹ su ral᷊ungu Bukẹ̌ u Yasar. Sěhěllo tiwatu matangěllo e nědung su tal᷊oarang langị, dingangu marěngụ kahěngang buhụ e simědạ.

¹⁴Tawẹ běke wọu nariadi ringangu mal᷊aing tawe sarung mariadi su ěllo sěmbaụ kerẹewe su ěllo ěndaị e, watụ u MAWU e kawe tụtol᷊e kapulun taumata. MAWU e nẹ̌sekẹ nanumběka tau Israel!

¹⁵Samuring pẹ̌sasekẹ ene, i Yosua ringangkewen sordadone nẹ̌sul᷊e sarang pẹ̌tatanakeng su Gilgal.

¹⁶Kai ratung Amori limang katau ene nakapěllọ dingangu nẹ̌kěmbuni su ral᷊ungu liang su Makeda.

¹⁷Piạu nakasilo si sire, kụ něhabaru tampạu pẹ̌kakěmbuniang i sire si Yosua.

¹⁸”Pělunggiko watu ghaghaghuwạ sarang mohongu liang ene, ringangu pělloingkon měndal᷊ukadẹ̌ sene,” angkuěng i Yosua,

¹⁹”arawe i kamene kumbahangbe měmpangirul᷊e sene. Sahusuẹ turusẹ̌, kụ pěngalo si sire wọu likude; abe pakawala i sire sumuẹ̌ su manga soan sire! MAWU Ruatanu něngonggọu kal᷊auntu si kamene waugʼi sire.”

²⁰I Yosua ringangu tau Israel němpamate tau Amori ene, kaiso piạ l᷊ai su tal᷊oaran sire kụ nakatal᷊ang sarang soan sire nẹ̌deạ pẹ̌kakěllunang, sarang tawe i kapate.

²¹Mase kal᷊awọu sordadong Yosua nẹ̌sul᷊e tạ kurange apa su anun Yosua su pẹ̌darasengang su Makeda. Tawẹu sarang sěngkatau su wanua ene wahani makapẹ̌berang apa rumokạ tau Israel.

²²Bọu e i Yosua nẹ̌bera, ”Ene wukạ e mohongu liang kụ ěntude ramahi ratu limang katau ene.”

²³Liang ene mal᷊aing nịbawuka, kụ bọu e manga ratung Yerusalem, Hebron, Yarmut, Lakhis, dingangu Eglon niapasěbang,

²⁴kụ niěntudẹ̌ si Yosua. Mase i Yosua kimui kěbị tau Israel niapẹ̌komol᷊ẹ̌, bọu e nẹ̌parenta tadeạu apang pěrwira kụ tumol᷊e mẹ̌sekẹ dingange paděnta kụ apẹ̌linda pol᷊ohu manga ratu ene. Manga pěrwira ene tangu riměnta kụ němpělinda pol᷊ohu manga ratu ene.

²⁵Bọu ene i Yosua nẹ̌bera su manga pěrwirane, ”Abe ghěnggang dingangu abe katakụ. Pěmpangiakingke ringangu pakawawahani, u kai seng kere ini kakakoạu MAWU sarung miěbạ sědụu.”

²⁶Mase i Yosua němate manga ratu ene kụ němiting i sire su papasị limam bua. Maieti sire niwala sene sarang nawawěllo.

²⁷Su tempong matangěllo simědạ, kahiang Yosua manga maietẹ̌ ene pinakilintụ bọu e pakirěmmẹ su ral᷊ungu liang kụ nạung nipakẹu manga ratu ene baugu pẹ̌kěmbuniang. Bọu e watu ghaghaghuwạ e nipěllọ su mohongu liang ene. Sarang orasẹ̌ ini watu tamai ene wẹ̌dang kạpapěllọ sene.

²⁸Su ěllo ene i Yosua simekẹ Makeda, ringangu němatạ soa ene ringangu ratune. Kal᷊awọu tumanạu soa ene, nipatene; tawẹu sarang sěngkatau niwala wiahẹ̌. I Yosua niěbạ datung Makeda mẹ̌sul᷊ungu i sie kere niěbạ datung Yerikho.

²⁹Bọu ene i Yosua ringangu sordadone nẹ̌kakanakadẹ̌ turusẹ̌ bọu Makeda sarang Libna kụ něngalo Libna.

³⁰MAWU něngonggọu l᷊ai kal᷊auntu su tau Israel baugu soa ini ringangu ratune. Tawẹ u sarang sěngkatau niwala wiahẹ̌; kal᷊awọu taumata su ral᷊ungu soa ene nipate. I Yosua niěbạ datun soa ene, mẹ̌sul᷊ungu i sie niěbạ datung Yerikho.

³¹Bọu ene i Yosua ringangu sordadone rimal᷊eng bọu Libna sarang Lakhis. I sire němpěliwung soa ene mase nialoěng.

³²MAWU nangonggọu kal᷊auntu su tau Israel dimokạ tau Lakhis su pẹ̌seketang ěllo karuane. Apang kinoạ i sire su Libna, kinoạ i sire lai su Lakhis; tawẹu lai sarang sěngkatau niwala wiahẹ̌, kěbị e nipate.

³³I Horam datung Gezer diměnta nẹ̌sumbala Lakhis, arawe i Yosua němatạ si sie ringangu sordadone; kụ tawẹu sarang sěngkatau nal᷊embe, kěbị e nasue nate.

³⁴Tuhụe, i Yosua ringangu sordadone rimal᷊eng bọu Lakhis sarang Eglon bọu ene němpěliwung dingangu něngalo soa ene.

³⁵Su ěllo ene lai i sire nempěmul᷊aho Eglon, dingangu němate kěbị taumata sene kere nikoạ i sire su Lakhis.

³⁶Bọu Eglon, i Yosua ringangu sordadone simaka wawul᷊urange ringangu nakoạ sarang soang Hebron, kụ něngalo

³⁷ringangu němul᷊aho soa ene. Datune ringangu apan taumata su soa ene ringangu su manga soa wal᷊ine nangělikụ sene, kěbịe nipate. I Yosua něnggagholang soa ene marihutu kere nịkakoạ e su soang Eglon. Tawẹ u sarang sěngkatau lai niwala wiahẹ̌ sene.

³⁸Bọu ene i Yosua ringangu sordadone nẹ̌sul᷊e ringangu něngaho Debir.

³⁹Soa ene ringangu ratune ringangu kěbị soa wal᷊ine mạngělikụ sene nipul᷊ahong Yosua. Kěbị taumata sene nipate. I Yosua niěbạ Debir dingangu ratune mẹ̌sul᷊ungu i sie niěbạ Hebron dingangu Libna, ringangu ratune.

⁴⁰Kasěllahu wanua ene nasue kinawatạ kinahian Yosua. I sie namatạ kal᷊awọu manga ratu su wawul᷊urange, su manga l᷊engehu wul᷊ude su sěmběkan daki, su manga pentọu wul᷊ude su sěmběkam bahẹ, dingangu su manga wimbaenge su sěmběkan timuhẹ̌. Tawẹ u sarang sěngkatau niwala wiahẹ̌; kěbị e pinate. Ene natuhụ kere su titam MAWU, Ruatang Israel.

⁴¹I Yosua namatạ manga wanua wọu Kades-Barnea su sěmběkan timuhẹ̌ sarang Gasa maraning daruruhange, nasowa kasěllahu wanuang Gosyen, turusẹ̌ sarang Gibeon su sěmběkan sawěnahẹ̌.

⁴²Kětạeng su ral᷊ungu sěnsul᷊ẹ̌ mẹ̌sekẹ, i Yosua seng makawatạ kal᷊awọu ratu ene ringangu makapul᷊aho manga wanua su kawasan sire, ual᷊ingu MAWU Ruatang Israel, nẹ̌sekẹ baugu tau Israel.

⁴³Bọu ene, i Yosua kapia ringangu sordadone nakoạ sarang pẹ̌darasengang su Gilgal.