Read Sangir YOSUA 11 Bible Online

YOSUA 11 - Sangir bible

YOSUA 11

¹Piạ e Ratu i Yabin bọu Hazor nakaringihẹ̌ pěmamatạu Israel, i sie něndolohu taumata sarang anun Datu i Yobab bọu soang Madon, sarang anung manga ratun soan Simron dingangu Akhsaf,

²baugu manga ratu su wawul᷊urange su sěmběkan sawěnahẹ̌, su Wal᷊ang Yordan sěmběkan timuhẹ̌ bọu Galilea, su pentọu ěntanang bawul᷊urange, ringangu su ěntanang daruruhange su rěduhu Dor.

³I sie lai něndolohu taumata sarang anun tau Kanaan su sěmběkam bahẹ dingangu sěmběkan daki wọu Yordan, su tau Amori, Het, Feris, dingangu tau Yebus, su ěntanam bawul᷊urange, ore lai tau Hewi su pentọu Wul᷊udu Hermon su ěntanang Mizpa.

⁴Tangu riměntạe manga ratu ene ringangu kěbị sordadon sire kụ mal᷊awọ-l᷊awọ kere ěnne su apeng. Kawal᷊o ringangu karetan sekẹ i sire mal᷊aing mal᷊awọ kahěngang.

⁵Patikụ datu ene němpẹ̌tatamba ringangu sěngkakarěnta sarang bal᷊oarị kụ maraning lelangu Sal᷊ụ u Merom mẹ̌deạu měnekẹ Israel.

⁶MAWU e něhengetang si Yosua, ”Kumbahang matakụ i sire. Su orasẹ̌ kere ini rịěllo, i sire kěbị e seng Takụ pateěng baugu Israel. Kawal᷊on sire harusẹ̌ apakapehonu, ringangu manga karetan sekẹ i sire harusẹ̌ tutungu.”

⁷Tangu i Yosua ringangu patikụ sordadone něnekẹ sědụ ene nakal᷊ahěkosẹ̌ maraning lelangu Sal᷊ụ u Merom.

⁸Dingangu MAWU e napakariading umatu Israel nakawatạ si sire. Tau Israel něnekẹ dingangu něnahusu si sire sarang karaung Misrefot-Maim dingangu Sidon su sěmběkan sawěnahẹ̌, dingangu karaung Bal᷊ang Mizpa su sěmběkan daki. Pẹ̌sasekẹ měngkate lụlětuhẹ̌ hakịu tawẹu lai sarang sěngkatau wọu sědụ kụ deng mal᷊ambe — kěbị e mang nate.

⁹I Yosua e nẹ̌koạ si sire kerẹewe niorong MAWU: i sie napakapehong kawal᷊on sire, ringangu něnutung manga karetan sekẹ i sire.

¹⁰Bọu ene i Yosua nẹ̌sul᷊e, mase něngaho Hazor kụ su tempo ene ute kai katoghasenge sutal᷊oarang kěbị kararatuang sene. Soa ene nitutung, dingangu ratu, ore lai kal᷊awọu tumanạ e nipate; tawẹu sarang sěngkatau pinakawala wiahẹ̌.

¹²Kěbị soa ene nipul᷊ahong Yosua, dingangu manga ratune nisamẹ sarang lai nipate natuhụewe kere su parentang Musa, ěllangu MAWU ene.

¹³Arawe kal᷊awọu soa kụ nirarisị su wowong manga wul᷊ude lěmbeng putung, tawẹu sarang sěmbaụ nitutung u tau Israel, tabeạu katewe Hazor kụ nitutung i Yosua sẹ̌sane.

¹⁴Patikụ tumanạu manga soa ene, nịpapate; kụ tawẹu sarang sěngkatau niwala wiahẹ̌. Arawe kal᷊awọu manga apal᷊iwụ mal᷊aarěga ringangu binatange nial᷊ạu tau Israel nakoạ tataghuaneng i sire.

¹⁵Patikụ apang niparentang MAWU si Musa, ěllangʼE, seng nipaul᷊ị i Musa e si Yosua, ringangu nikoạ i Yosua; kụ tawẹu sarang sěmbaụ kụ tawe nịkakoạ e.

¹⁶I Yosua němul᷊aho kěbị ěntana ene — banua wawul᷊urange, ěntana pentọu wul᷊ude, baewe su sěmběkan sawěnahẹ̌, baewe lai su sěmběkan timuhẹ̌; kerene lai kasěllahu ěntanang Gosyen, ore lai wanua něhangu su sěmběkan timuhẹ̌ bọu ěntanang Gosyen, ore lai Wal᷊ang Yordan.

¹⁷Kasariang banua ene nanětạ bọu Wawul᷊urange Nal᷊inggi su sěmběkan timuhẹ̌ masandigu Edom, sarang sawěnahẹ̌ karaung Baal-Gad su Wal᷊ang Libanon sěmběkan timuhẹ̌ bọu Wul᷊udu Hermon. Diọ mararěna i Yosua nẹ̌sekẹu manga ratung banua ene, kaiso pěngěnsueěnge i sie něnamẹ dingangu němate si sire kěbị.

¹⁹Bọu kěbị soa su kasěllahu wanua ene, tawẹu sarang soa sěmbaụ kụ němato pẹ̌darianding pẹ̌dal᷊ahpị dingangu Israelẹ̌, tabeạu katewe Gibeon, soan tau Hewi. Kěbị soa wal᷊ine kinawatạ su pẹ̌seketang.

²⁰ MAWU e napẹ̌tungkětịu naung i sire waugu mẹ̌sekẹu tau Israel, tadeạu i sire i pakawihua, ringangu pateěng kěbị tawẹ ampunge, natuhụ kere su parentan MAWU e si Musa.

²¹Su tempo ene lai i Yosua tamai něngupu tau Enak, kụ kai taumata ansuang kụ mạtanạ su wanua wawul᷊urange — su Hebron, Debir, Anab, dingangu su kạguwạu ěntana wawul᷊urangu Yehuda ringangu Israel. I sire kěbị nipaten Yosua, ringangu kal᷊awọu soa nigholọ i sire.

²²Tawẹu sarang sěngkatau wọu tau Enakẹ̌ ene kụ deng nal᷊embe su wanuang Israel, kětạembeng su Gasa, Gat, dingangu Asdod deng bědang ene.

²³Kasěllahu wanua ene nipul᷊ahong Yosua, natuhụ kere su parentang MAWU si Musa, wọu e nionggọ su tau Israel nakoạ tataghuaneng i sire. Banua ene pinẹ̌papahiạ, kụ apang hěnto makaěbạ pẹ̌sěmbahageang. Tau Israel mal᷊aing něngědo nẹ̌sekẹ kụ banuane mal᷊enehẹ̌ tạ konsang apa.