Read Sangir YOSUA 12 Bible Online

YOSUA 12 - Sangir bible

YOSUA 12

¹ Banua su sěmběkan daki wọu Yordan, bọu wal᷊ang Sal᷊ụ u Arnon, natěpasu Wal᷊ang Yordan sarang karaung Bul᷊udu Hermon su sěmběkan sawěnahẹ̌, seng nipul᷊aho ringangu nikaianengu tau Israel. Piạ datu rarua nikawatạ i sire.

²Sěngkatau arenge i Sihon, datung Amori kal᷊aianenge su Hesybon. Banua paparentaěnge mạnahiangkung sěmběka wọu wanuang Gilead: kụ bọu Aroër (su Wal᷊ang Arnon) dingangu soa su tal᷊oarang bal᷊ane ene sarang karaung Sal᷊ụ u Yabok su pẹ̌saraěngu wanuan tau Amon;

³kụ mal᷊aing mạnahiangkung ěntana Wal᷊ang Yordan sěmběkan daki, bọu Ranong Galilea sarang batuhu sěmběkan timuhẹ̌ nịdatingu Bet-Yesimot (su sěmběkan daki wọu Laudẹ̌ Nate), matěpasu pentọu Wul᷊udu Pisga.

⁴Datu wal᷊ine kụ kinawatạ u tau Israel ute kai Ratu i Og bọu wanuang Basan, kal᷊aianenge su Asytarot dingangu Edrei. I sie kai sěngkatau lěmben tau Refaim.[3]

⁵Banua paparentaěnge mạnahiangkung Bul᷊udu Hermon, Salkha, dingangu kasěllahu Basan sarang karaung banuang Gesur dingangu Maakha; mal᷊aing mạnahiangkung sěmběka wọu wanuang Gilead sarang karaung banua paparentaěngu Ratu i Sihon, su soang Hesybon.

⁶ Seng ini e ratu rarua kinawatạ i Musa ringangu tau Israel. Ěntanang manga ratu ene nionggọ i Musa ěllangu MAWU ene, su hěnton Ruben, Gad dingangu sěmběka wọu hěnton Manasye makoạ ěntana tataghuaneng i sire.

⁷Manga ratu kụ kinawatạ i Yosua ringangu tau Israel ute kai patikụ datu su wanua su sěmběkam bahẹ bọu Sal᷊ụ u Yordan, bọu Baal-Gad su Wal᷊ang Libanon matěpasẹ̌ sarang Bawul᷊urangu Rol᷊ohẹ̌ su sěmběkan timuhẹ̌ masandigu Edom. Banua ene pinẹ̌papahiạ i Yosua su manga hěnton tau Israel makoạ ěntana tataghuaneng i sire.

⁸Banua ene mạnahiangkung banua wawul᷊urange, ěntana pentọu wul᷊ude su sěmběkam bahẹ, Bal᷊ang Yordan dingangu wanua pentọu wul᷊ude, banua manga wěntihe su sěmběkan daki, dingangu wanua l᷊inggi su sěmběkan timuhẹ̌. Banua tamai ene ute kai ěnnạu katatanakengu tau Het, Amori, Kanaan, Feris, Hewi, ringangu Yebus.

⁹Kal᷊awọu ratu apang kinawatạ, kěbị e těllum pul᷊o ěsa su kataune; kụ kai apan datu wọu apan soa tamai ini: Yerikho, Ai (maraning Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (su Karmel), Dor (su raruruhange), Goyim (su Galilea) ringangu Tirza.