Read Sangir YOSUA 13 Bible Online

YOSUA 13 - Sangir bible

YOSUA 13

¹Ini e i Yosua kai seng maghurang-gurang. MAWU e něhengetang si Yosua, ”Kai seng maghurang, Yosua! Katewe kawe wẹ̌dang mal᷊awọ banua harusẹ̌ pul᷊ahong:

²kasariang banuang Pilistin dingangu Gesur,

³dingangu kasěllahu wanuang Awi sarang bahageang timuhẹ̌. (Wimbaengu Sal᷊ụ u Sikhor su pẹ̌saraěngu Misirẹ̌ sarang pẹ̌saraěngu Ekron su sěmběkan sawěnahẹ̌, patikụ ene narekeng bọu wanuan tau Kanaan; dingangu manga ratun Pilistin, mạtanạ su Gasa, Asdod, Askelon, Gat, dingangu Ekron.)

⁴Kerene lai wědang harusẹ̌ pul᷊ahoěng: kal᷊awọu wanuang Kanaan dingangu Meara (tataghuanengu tau Sidon), sarang Afek su pẹ̌saraěngu wanuan tau Amori;

⁵těpase wanuan tau Gebal, dingangu kasěllahu wanuang Libanon měndol᷊ong sěmběkan daki, bọu Baal-Gad, su sěmběkan timuhẹ̌ bọu Wul᷊udu Hermon, matěpasẹ̌ sarang dal᷊eng kụ mẹ̌timona Hamat.

⁶ Nasowa l᷊ai kạguwạu wanuan tau Sidon, kụ mạtanạ su wanua wawul᷊urange su wěllạu manga wul᷊udu Libanon dingangu Misrefot-Maim.” ”Kal᷊awọu manga wansa ene sarung Takụ tokol᷊ang, su tempong kawanuan tau Israel měnekẹ si sire,” angkuěngu MAWU tuhụe si Yosua. ”Ěntana ene harusẹ̌ pẹ̌papahiạu su kawanuang Israel mẹ̌deạu makoạ ěntanaʼn sire, kerẹewe nạung seng Takụ nioro si kau.

⁷Kụ ini e pẹ̌papahiạe ěntana ene su hěnton tau Israel i sire sio, ringangu su maloarang kal᷊awọe wọu hěnton Manasye, tadeạu ene makoạ ěntanan sire.”

⁸ Hěnton Ruben dẹ̌duang Gad dingangu sitenga wọu hěnton Manasye seng nakatarimạu wuạ u ěntana wọi Musa, ěllangu MAWU ene; kụ kai ěntana su sěmběkan daki wọu Sal᷊ụ u Yordan.

⁹Banuan sire mạnahiangkung Aroër (su wiwihu Wal᷊ang Sal᷊ụ u Arnon), dingangu soa kụ su tal᷊oaram bal᷊ane ene. Kerene lai kasěllahu wanua su wěntihe matene wọu Medeba sarang Dibon

¹⁰dingangu sarang pẹ̌saraěngu wanuang Amon, kụ nasowa kěbị soa nạung bọu niparentaěng i Sihon, datun tau Amori, kụ kal᷊aianenge su Hesybon.

¹¹Nasowa l᷊ai wanuang Gilead, banua mạngělikụ Gesur dingangu Maakha, ringangu patikụ Bul᷊udu Hermon, dingangu l᷊ai kasěllahu wanuang Basan sarang Salkha.

¹²Banuan sire mal᷊aing něnahiangkung banua paparentaěngu Ratu i Og, tau Refaim[4] pěngensueěnge kụ nẹ̌parenta su Asytarot dingangu Edrei. I Musa seng němatạ manga wansa ene ringangu něnokol᷊ẹ̌ si sire pinakasěbang bọu wanuan sire.

¹³Arawe tumanạu Gesur dingangu Maakha tawe nitokol᷊ẹ̌ hahian tau Israel; i sire wědang mạtanạ su Israel.

¹⁴ Hěnton Lewi tawe nakaěbạ bahageange ěntana wọi Musa, u MAWU e seng nẹ̌bera si Musa u wahageangu hěnton Lewi ute kai wọu manga sasěmba kụ nitutung su pananěmbaěng baugu MAWU Ruatang Israel.

¹⁵Sěmbahageang bọu ěntana kụ nirianding MAWU su kawanuang Israel ene, seng nionggọi Musa su manga walagẹ̌ su ral᷊ungu hěnton Ruben, baugu makoạ ěntanan sire.

¹⁶Banuan sire mạnahiangkung Aroër (su wiwihu Wal᷊an Sal᷊ụ u Arnon), dingangu soa kụ su tal᷊oarang bal᷊ane ene sarang kasěllahu tenene marangẹ mạngělikụ Medeba;

¹⁷kerene lai Hesybon dingangu kal᷊awọu soa su tenene marangẹ ene, kere: Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar, kaěbakeng su wowom bul᷊ude su wal᷊ane ene,

²⁰Bet-Peor, manga lengehu Wul᷊udu Pisga, ringangu Bet-Yesimot.

²¹Mase nasowa l᷊ai kal᷊awọu soa su tenene marangẹ ene, dingangu kasěllahu wanua su kawasan Sihon, datun tau Amori, nạung kal᷊imona kal᷊aianenge su Hesybon. I sie ringangu apang mangangawasang Midian lai, kere: i Ewi, i Rekem, i Zur, i Hur, dingangu i Reba, seng nikawatạ i Musa. Kal᷊awọu mangangawasa ene, wọu nẹ̌parenta wanua ene waugu Ratu i Sihon.

²²Su tal᷊oaran taumata kụ nipaten tau Israel piạko l᷊ai i Bileam anạ i Beor, i měnaněbal᷊ẹ̌.

²³Sal᷊ụ u Yordan nakoạ kere pẹ̌saraěngu sěmběkam bahẹ bọu wanuang hěnton Ruben. Kai ene kal᷊awọu soa ringangu manga weọe kụ nionggọ su manga walagẹ̌ su ral᷊ungu hěnton Ruben baugu makoạ ěntanan sire.

²⁴Sěmbahageang bọu ěntana kụ niriandin MAWU su kawanuang Israel ene lai seng nionggọ i Musa su manga walagẹ̌ su ral᷊ungu hěnton Gad, mědeạu makoạ tataghuaneng i sire.

²⁵Banuan sire mạnahiangkung Yaezer dingangu kal᷊awọu soa su Gilead, dingangu sěmběka wọu wanuang Amon sarang karaung Aroër su sěmběkan daki wọu Raba;

²⁶ěntana manětạ bọu Hesybon sarang Ramat-Mizpa ringangu Betonim, dingangu wanua wọu Mahanaim sarang pẹ̌saraěngu Lodebar, kěbị ene nasowa l᷊ai wanua waugu hěnton Gad.

²⁷Su Wal᷊ang Yordan, banuang hěnton Gad ene, něnahiangkung Bet-Haram, Bet-Nimra, Sukot, dingangu Zafon, kụ kai lěmbeng banua paparentaěng u Ratu i Sihon su Hesybon. Pẹ̌saraěng sěmběkam bahẹ bọu wanuang hěnton Gad, ene kai Sal᷊ụ u Yordan sarang karaung Danong Galilea su sěmběkan sawěnahẹ̌.

²⁸Ene ute kai manga soa ringangu kampong kụ nionggọ su manga walagẹ̌ su ral᷊ungu hěntong Gad baugu makoạ ěntana tataghuaneng i sire.

²⁹Sěmbahageang bọu ěntana kụ nikědong MAWU su manga umatu Israel ene mal᷊aing seng nionggọ i Musa su manga walagẹ̌ su ral᷊ungu sěngkapahiakeng darua wọu hěnton Manasye waugu makoạ tataghuaneng i sire.

³⁰Pẹ̌saraěngu wanuan sire sarang Mahanaim, nasowa l᷊ai kạguwạu Basan — kụ kai kasěllahu wanua paparentaěng u Ratu i Og, datung Basan, dingangu l᷊ai manga kampongu Yair su Basan kal᷊awọe ěnnung u pul᷊o su waụ e.

³¹Tuhụe nasowa l᷊ai sěmběka wọu wanuang Gilead, dingangu Asytarot dingangu Edrei, kụ kai niupunangu soa su wanua paparentaěng u Ratu i Og su Basan. Kạguwạu wanua ene nionggọ su sěngkapahiakeng darua wọu manga walagẹ̌ hěnton Makhir anạ i Manasye.

³²Kerene i Musa němahiạ ěntana su sěmběkan timuhẹ̌ bọu Yerikho, su sěmběkan Sal᷊ụ u Yordan, piạ i sie ene su wimbaengu Moab.

³³ Arawe hěnton Lewi tawe nakaěbạ ěntana sarang kadodọ bọi Musa. I Musa nẹ̌bera si sire u wahageang kụ nionggọ si sire ute kai wọu manga sasěmba kụ nisěmba su MAWU Ruatang Israel.