Read Sangir YOSUA 14 Bible Online

YOSUA 14 - Sangir bible

YOSUA 14

¹Inie kai wěke mạanung kereapa ěntanang Kanaan sěmběkam bahẹ bọu Sal᷊ụ u Yordan pinẹ̌papahiạ su tal᷊oarang kawanuang Israel. Němpẹ̌papahiạ u ěntana ene su tau Israelẹ̌ e kai Imang i Eleazar, i Yosua anạ i Nun, dingangu manga těmbonangu walagẹ̌ su ral᷊ungu manga hěntong kawanuang Israel.

² Tuhụewe laorong MAWU si Musa, ute manga wanua su sěmběkam bahẹ bọu Sal᷊ụ u Yordan e nipahiạ sio sitenga su hěntong kawanuang Israelẹ̌ e, harusẹ̌ ipẹ̌papahiạ bọu měnawụ u lotẹ̌.[5]

³ Ěntana su sěmběkan daki wọu Sal᷊ụ u Yordan seng nighěllị i Musa su ruang kamonaěng sitenga wọu kawanua wal᷊ine. (Hinong i wohẹ sini u hěnton Yusup e napahiạ duang kamonaěng: Hěnton Manasye ringangu hěntong Efraim.) Baugu hěnton Lewi ute tawẹ apa ěntana nighěllị i Musa si sire. I sire kětạeng kinaghěllikangu manga soa waugu tampạ pẹ̌tanakeng, dingangu manga wimbaenge waugu pěhikinang sapi ringangu domba sire.

⁵Kerene kakakoạu tau Israel nẹ̌papahiạu ěntana ene tuhụewe seng nititang MAWU e si Musa.

⁶ Piạ sěhěllo kal᷊awọu tau Yehuda riměnta nẹ̌sombang i Yosua su Gilgal. Sěngkatau wọu tal᷊oaran sire isẹ̌sěbạ si Kaleb anạ i Yefune tau Kenas e nẹ̌bera, ”Yosua! I kau e masingkạ u titam MAWU e si Musa, rarolohangu Ruata ene, su Kades-Barnea mạanung kạduạ.

⁷ Umurẹ̌ku e ěpạ u pul᷊o su taunge piạ i Musa ěllangu MAWU e něndolohu iạ bọu Kades-Barnea nakoạ měnanahimata waugu měmarikẹ̌sa wanua ini. Kụ iạ e nẹ̌sul᷊e anun sie nẹbawa habarẹ̌ su katěngade.

⁸Arawe taumata apan natamai ringangku e nakakatakụ tau Israel. Kai iạ e man tatapẹ̌ satia su MAWU Ruataku.

⁹ Ual᷊ingu ene i Musa e nẹ̌dianding ěntana apam bọu takụ niral᷊engang harusẹ̌ maghěllị si siạ dingangu pal᷊ahanạku makoạ pusakạ i kami sarang kạrěngụe.

¹⁰Orasẹ̌ ini seng ěpạ u pul᷊o l᷊ima su taunge rongkeng MAWU něhengetangu hal᷊ẹ̌ ene si Musa. Ene nariadi su tempong kawanuang Israelẹ̌ e mẹ̌pẹ̌palilị su kěhu l᷊inggi. Kụ kerẹewe seng niriandim MAWU e mal᷊aing MAWU měnẹ̌nirung si siạ hakịu iạ e tatapẹ̌ biahẹ̌ sarang orasẹ̌ ini. Kělạewe orasẹ̌ ini umurẹ̌ku e seng ual᷊um pul᷊o l᷊ima su taunge,

¹¹kaiso wẹ̌dangbe matoghasẹ̌ kere nạung piạ i Musa něndolohu iạ. Iạ e wědang piạ toghasẹ̌ku mẹ̌sekẹ arau walạewe apa takụ koateng.

¹²Ual᷊ingu ene onggọ e su tempo ini wanua wawul᷊urange nikědom MAWU e si siạ su tempong iạ dingangu taumata wal᷊ine sěngkapẹsul᷊e ringangku mẹ̌bawa habarẹ̌. Su tempo ene i kau hala nakaringihẹ̌ u paị sene piạ kawanuang ansuang i sẹ̌sẹ̌bạ tau Enak. I sire mạtanạ su manga soa ghaghuwạ piạ těndạ e meselẹ̌. Aramanung MAWU e nẹ̌tul᷊ungu iạ e sarang iạ nakal᷊iwuahẹ̌ si sire kerẹewe seng nipěhengetangu MAWU e.”

¹³Tangu i Yosua e kimire si Kaleb anạ i Yefune, bọu e něngonggọu soang Hebron nakoạ ěntana tataghuanenge.

¹⁴Kụ sarang orasẹ̌ ini soa ene wědang pusakạu hěntong Kaleb anạ i Yefune, tau Kenas ene, ual᷊ingu i sie satia ringangu mararingihẹ̌ su MAWU Ruatang Israel.

¹⁵Nạung kal᷊imona e Hebron isẹ̌sěbạ Arba. (Arba ute kai taumata kạguwakenge su tal᷊oaran tau Enak.) Tangu wanua ene mal᷊enehẹ̌, mal᷊unsemahẹ̌ ual᷊ingu seng tawẹ apa pẹ̌sasekẹ.