Read Sangir YOSUA 15 Bible Online

YOSUA 15 - Sangir bible

YOSUA 15

¹Manga walagẹ̌ bọu hěnton Yehuda kinapahiakengu ěntana kụ pẹ̌saraěnge ute kere ini: Su sěmběkan timuhẹ̌ bọu wanua ene naěmpahẹ̌ sarang kapondol᷊angu kěhu l᷊inggin Zin sěmběkan timuhẹ̌ su pẹ̌saraěngu Edom;

²nanětạ bọu pondol᷊u Laudẹ̌ Nate sěmběkan timuhẹ̌,

³turusẹ̌ sarang sěmběkan timuhẹ̌ lumiung landehu wul᷊udu Akrabim sarang Zin. Těpase lumiung Kades-Barnea sěmběkan timuhẹ̌, turusẹ̌ lumiung Hezron, sumakang Adar, bọu ene mělenga sarang Karka.

⁴Bọu ene turusẹ̌ u Azmon, kụ sumělle mẹ̌batụ tol᷊en songe su pẹ̌saraěngu Misirẹ̌, bọu ene mahěpusẹ̌ su L᷊audẹ̌ Tal᷊oara. Kerene kěhịu pẹ̌saraěngu wanua sěmběkan timuhẹ̌ baugu hěnton Yehuda. Dingangu kěhịu pẹ̌saraěng ene nakoạ lai kere kěhịu pẹ̌saraěngu kạguwạu wanuang Israel sěmběkan timuhẹ̌.

⁵Su Sěmběkan daki pẹ̌saraěnge ute Laudẹ̌ Nate, turusẹ̌ u sěmběkan sawěnahẹ̌ sarang mohongu Sal᷊ụ u Yordan. Su sěmběkan sawěnahẹ̌, pẹ̌saraěnge nanětạ bọu mohongu Sal᷊ụ u Yordan ene,

⁶simaka sarang Bet-Hogla, bọu ene naturusẹ̌ u pẹ̌saraěngu Wal᷊ang Yordan. Bọu tampạ ene pěsaraěngu sawěnahẹ̌ ene sumaka turusẹ̌ sarang sawěnahẹ̌ sarang Batum Bohan (Bohan ute kai anạ i Ruben),

⁷bọu ene turusẹ̌ u Wal᷊ang Kasasusa sarang Debir, bọu ene mělenga l᷊ai sarang sawěnahẹ̌ mẹ̌timona Gilgal su tampạ kụ tụtatěngo manga lengehu wul᷊ude su Adumim su sěmběkan timuhẹ̌ bọu wal᷊ane ene. Bọu ene lai turusẹ̌ sarang simbul᷊u akẹ En-Semes, bọu ene sarang En-Rogel,

⁸bọu ene sumaka wọu Wal᷊ang Hinom sarang běntihe su sěmběkan timuhẹ̌, su piạ Yerusalem soan tau Yebus. Bọu tampạ ene kěhịu pẹ̌saraěng ene mẹ̌timona pusungu wukide ene, su sěmběkam bahẹ bọu Wal᷊ang Hinom su pondol᷊u Wal᷊ang Refaim sěmběkan sawěnahẹ̌,

⁹bọu ene turusẹ̌ sarang simbul᷊u akẹ Me-Neftoah, sarang manga soa maranim Bul᷊udu Efron. Bọu tampạ ene kěhịu pẹ̌saraěngu wanua ene mělenga sarang Baala (kụ kai Kiryat-Yearim),

¹⁰kụ mělẹ̌likụ Baala sěmběkam bahẹ mětẹ̌timona Wawul᷊urangu Edom, mase turusẹ̌ sarang Bul᷊udu Yearim sěmběkan sawěnahẹ̌ (kụ kai Wul᷊udu Kesalon), mase ruměsungu Bet-Semes, bọu ene matěpasu Timna.

¹¹Bọu Timna, kěhịu pẹ̌saraěng ene těpase mẹ̌timona Wul᷊udu Ekron sěmběkan sawěnahẹ̌, mase mělenga sarang Sikron, sumahe Wul᷊udu Baala, matěpasu Yabneel, dingangu mahěpusẹ̌ su Laudẹ̌ Tal᷊oara,

¹²kụ nakoạ kere kěhịu pẹ̌saraěng sěmběkam bahẹ bọu wanuang hěnton Yehuda. Su ral᷊ungu wanua ene kate mạtanạ i sire apang balagẹ̌ bọu hěnton Yehuda.

¹³ Natuhụewe su titam MAWU si Yosua, sěmbahageang bọu wanuang Yehuda nighěllị si Kaleb anạ i Yefune wọu hěnton Yehuda. Baugi sie nionggotangu Hebron, nạung kai soa tataghuanengi Arba i amang i Enak.

¹⁴Hěntong Enak ute kai tau Sesai, Ahiman, dingangu Talmai. I Kaleb něnokol᷊i sire kěbị bọu Hebron.

¹⁵Bọu ene i sie tamai něngalo si sire apam mạtanạ su Debir. (Soa ene nạung kal᷊imona timeleng arenge Kiryat-Sefer.)

¹⁶Angkuěng i Kaleb, ”I saing kụ makapul᷊aho Kiryat-Sefer, i sie wotonge mẹ̌kawingu anạku wawine, i Akhsa.”

¹⁷I Otniel anạ i Kenas anạ u sěngkataung Kaleb němul᷊aho soa ene, tangu i Kaleb něngonggọ i Akhsa anạe nipẹ̌kawingi Otniel.

¹⁸Su ěllong pẹ̌kakakawing i rẹ̌dua e i Otniel měnẹ̌nihasa si Akhsa[6] tadeạu pẹ̌dẹ̌dorong ěntana sěngkamonaěng si amange. Tangu i Akhsa limintụ bọu kalidene, mase i Kaleb nakiwal᷊o si sie měnsang kai apa ilẹ̌ěningu e.

¹⁹I Akhsa simimbang, ”Iạ kai lụěnningu manga simbul᷊u akẹ, batụu ěntana nionggọ i amang si siạ e kai su wanua mamara.” Tangu i Kaleb něngonggọu simbul᷊u akẹ ene si sie su piạ ul᷊une ringangu simbul᷊u akẹ su piạ tol᷊ene.

²⁰Tuhụ e ini e kai ěntana nighěllị su manga walagẹ̌ su ral᷊ungu hěnton Yehuda waugu makoạ tataghuaneng i sire.

²¹Kal᷊awọu soa kararauange su sěmběkan timuhẹ̌, kụ nakoạ tataghuanengu Yehuda, kụ nạung nataho su pẹ̌saraěngu Edom, kěbị ene tangu soa ruam pul᷊o sio su waụ e, nasowa l᷊ai manga soa rarodọ mạngělikụ e. Manga soa ene tangu: Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hazor-Hadata, Keriot-Hezron (kụ kai Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain, dingangu Rimon.

³³Kal᷊awọu soa, nasowal᷊ai manga soa rarodọ mạngělikụ kụ kaěbakeng su manga pentọu wul᷊ude, kěbị e kai soa mapul᷊o ěpạ su waụ e, kụ kai: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera, ringangu Gederotaim.

³⁷Kerene lai soa mapul᷊o ěnnung tuhụe ringangu manga soa rarodọ mạngělikụe: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama, ringangu Makeda.

⁴²Kerene lai soa sio tuhụe ringangu manga soa rarodọ mạngělikụe: Libna, Eter, Asan, Yiftah, Asna, Nezib, Kehila, Akhzib dingangu Maresa.

⁴⁵Ekron lai ringangu manga soa rarodọ dingangu manga weọe,

⁴⁶ore lai kal᷊awọu soa ghaghuwạ dingangu soa rarodọ su rěduhu Asdod, bọu Ekron, sarang Laudẹ̌ Tal᷊oara.

⁴⁷Kerene lai Asdod dingangu Gasa ringangu manga soa rarodọ dingangu manga weọe nakeke sarang dẹ̌duhu songe su pẹ̌saraěngu Misirẹ̌ dingangu ruruhangu Laudẹ̌ Tal᷊oara.

⁴⁸Su wawul᷊urange piạ lai soa mapul᷊o ěsa ringangu manga soa rarodọ mạngělikụ: Samir, Yatir, Sokho, Dana, Kiryat-Sana (kụ kai Debir), Anab, Estemoa, Anim, Gosyen, Holon dingangu Gilo.

⁵²Piạ lai soa sio tuhụe ini narekeng lai manga soa rarodọ mạngělikụ: Arabẹ̌, Duma, Esan, Yaman, Bet-Tapuah, Afeka, Humta, Kiryat-Arba (kụ kai Hebron) dingangu Zior.

⁵⁵Piạ lai soa mapul᷊o tuhụe ringangu manga soa rarodọ mạngělikụe: Maon, Karmel, Zif, Yuta, Yisreel, Yokdeam, Zanoah, Kain, Gibea ringangu Timna.

⁵⁸Dingangu soa ěnnung tuhụe ini lai ringangu manga soa rarodọ mạngělikụ: Halhul, Bet-Zur, Gedor, Maarat, Bet-Anot, dingangu Eltekon.

⁶⁰Soa lai rarua ini tuhụe ringangu manga soa rarodọ mạngělikụ: Soang Kiryat-Baal (kụ kai Kiryat-Yearim) dingangu Soang Raba.

⁶¹Su wanua l᷊inggi, piạ soa ěnnung tuhụe ini ringangu manga soa rarodọ mạngělikụ: Bet-Araba, Midin, Sekhakha, Nibsan, Soa Garam dingangu En-Gedi.

⁶³ Soang Yerusalem nasowa lai tataghuaneng i Yehuda, arawe tau Yehuda tawe makatokol᷊u tau Yebus kụ mạtanạ sene. Sarang orasẹ̌ ini tau Yebus bẹ̌dang mạtanạ dingangu tau Yehuda su soa ene.