Read Sangir YOSUA 17 Bible Online

YOSUA 17 - Sangir bible

YOSUA 17

¹Sěngkamonaěng bọu wanua su sěmběkam bahẹ bọu Sal᷊ụ u Yordan nionggọ su sěmbahageang bọu walagẹ̌ hěnton Manasye, anạ i Yusup kaiakanenge. I Makhir i amang i Gilead kai anạ i Manasye kaiakanenge. Ual᷊ingu i sie kawe taumata mẹ̌tatohạu pẹ̌seketang ute wanuang Gilead dingangu Basan kụ su sěmběkan daki wọu Sal᷊ụ u Yordan e nighěllị si sie.

²Banua su sěmběkam bahẹ bọu Sal᷊ụ u Yordan e nighěllị su manga walagẹ̌ bal᷊ine e wọu hěnton Manasye, kụ kai walagi: Abiezer, Helek, Asriel, Sekhem, Hefer, dingangu i Semida; kěbịe kai pal᷊ahěnto esẹ bọi Manasye anạ i Yusup. I sire e kai matatimadu walagẹ̌.

³I Zelafehad anạ i Hefer, pulung i Gilead (Gilead e kai anạ i Makhir, pulung i Manasye), tawẹ anạ e esẹ, kụ kětạeng anạ e wawine kụ kai: i Makhla, i Noa, Hogla, i Milka, i Tirza.

⁴ I sire nakoạ sarang anun Imang i Eleazar, i Yosua anạ i Nun dingangkewen manga měngangahạ e, kụ nẹ̌bera, ”MAWU e něhengetang si Musa u i kami e mal᷊aing hinong makaěbạ ěntana kerẹewe manga anạ u sěmbaụ i kami manga esẹ.” Ual᷊ingu ene, natuhụ kere si titaʼm MAWU, manga anạ i Zelafehad bawine ene nionggotangu ěntana sěngkaonggọ dingangu manga anạ u sěngkataung sire manga esẹ.

⁵Ene, wal᷊inewe kětạeng pulung i Manasye esẹ e makaěbạ bahageangu ěntana, kaiso kawe lai manga pulunge wawine. Ual᷊ingu ene unụe hěnton Manasye nighělirangu ěntana mapul᷊ong kamonaěng su l᷊ikudu ěntanang Gilead dingangu Basan su sěmběkan daki wọu Sal᷊ụ u Yordan. Ěntanang Gilead nighěllị su hěnton Manasye wal᷊ine.

⁷Manga wěhịu pẹ̌saraěngu wanuang Manasye nanětạ bọu Asyer sarang Mikhmetat su sěmběkan daki wọu Sikem. Bọu ene wěhịe ene rimẹ̌sung sarang sěmběkan timuhẹ̌ sarang pẹ̌bawanuaěngu ghal᷊ipohong En-Tapuah.

⁸Banuang Tapuah e kai tataghuanengu hěnton Manasye, arawe soan Tapuah, su pẹ̌saraěng e kai tataghuanengu hěntong Efraim.

⁹Masene pẹ̌saraěngu wanuang Manasye e rimẹ̌sung sarang lelangu Sal᷊ụ u Kana. Manga soa su sěmběkan timuhẹ̌ bọu songe ene ute kai tataghuaneng i Efraim, manilaing ene su ral᷊ungu wanuang Manasye. Běhịu pẹ̌saraěngu wanuang Manasye ene těpase timol᷊e ral᷊eng sarang sěmběkan sawěnahẹ̌ bọu songe ene, mase nẹ̌kětạ su L᷊audẹ̌ Tal᷊oara.

¹⁰Kerene katatainge i Efraim su sěmběkan timuhẹ̌, dingangu i Manasye su sěmběkan sawěnahẹ̌, dingangu Laudẹ̌ Tal᷊oara e kai pẹ̌saraěng i sire su sěmběkam bahẹ. Su sěmběkaʼm pol᷊oěng, beọ i Manasye mẹ̌sẹ̌sarang beọ i Asyer. Arawe su sěmběkam laesuikị e mẹ̌sẹ̌sarang beọ i Isakar e.

¹¹Su weọ i Isakar dẹ̌duang Asyer e piạ lai wanuang ghal᷊ipohong Manasye kụ kai: Bet-Sean dingangu Yibleam dingangu manga kampong su rẹ̌duhe. Kerene lai: Dor (soa su wiwihu apeng), En-Dor, Taanakh, Megido, ringangu manga kampong su rěduhe.

¹² Arawe hěnton Manasye tawe nakapěnokol᷊u taumata wọu ene e, ual᷊ingu tau Kanaan mang mạtanạ sene.

¹³Kerene lai su tempo ramahi e samurin tau Israel nahuntinambang katoghase, i sire tawe něnokol᷊u kal᷊awọu tau Kanaan; i sire tumbạeng něnihasa si sire ene pěmunara waugi sire.

¹⁴Hěntong Yusup e nẹ̌bera si Yosua angkuěng, ”Unụe kawe kětạeng sěmbahageang ěntana nighěllị si kami sumbal᷊iau i kami kawe mal᷊awọ-l᷊awọ, batụu MAWU e kawe seng něngal᷊amatẹ̌ si kami?”

¹⁵I Yosua simimbang, ”Ual᷊ingu i kamene kawe seng nahěmpal᷊iung kal᷊awọe, ringangu ěntanang bawul᷊urangu Efraim seng masěsẹ baugi kamene, ute rakọe sarang banuan tau Feris e ringangu Refaim. Pěmpělirị e pěmpẹ̌koạe pẹ̌bawiaheng buhu su manga undangeng i sire.”

¹⁶Hěnton Yusup e simimbang, ”Banua wawul᷊urange ene e mahepọ baugi kami e, arawe tau Kanaan apang mạtanạ su apam bal᷊ane piạ karetan sekẹ i sire bọu uase — waẹbe i sire mạtanạ su Bet-Sean dingangu manga kampong mạngělikụ e, arau lai i sire apang mẹ̌tẹ̌tanạ su Wal᷊ang Yisreel.”

¹⁷Tangu angkuěng i Yosua su hěntong Efraim dingangu i Manasye su wahageang sěmběkam bahẹ ene, ”Kahěngang bue i kamene lawọ dingangu matoghasẹ̌, dingangu hinone i kamene ghěllirangu ěntana limembo wọu sěmbahageang.

¹⁸Kụ pěngal᷊ạe wawul᷊urange watụ u tampạ ene wẹ̌dangbe kěhu, i kamene wědangbe wotonge makapěhěnsinuang sene ringangu makapěnaghuang kěbị. Dingangu waugi sire tau Kanaan ene maningbe i sire matoghasẹ̌ dingangu piạ karetan sekẹ i sire wọu uase kai i kamene wotongewe makatokol᷊i sire.”