Read Sangir YOSUA 18 Bible Online

YOSUA 18 - Sangir bible

YOSUA 18

¹Sarangke nakawatạ banua niriandiʼm MAWU e, kakěpal᷊u tau Israelẹ̌ e nẹ̌komol᷊ẹ̌ su Silo, mase i sire něnakẹ dasengu pẹ̌sasombangeng dingangu MAWU.

²Bẹ̌dang pitung kamonaěng kawanuang Israelẹ̌ e tawe nakaěbạ bahageangu ěntana.

³Ene, i Yosua e nẹ̌bera su tau Israel, ”Kai měngampal᷊ẹ̌ sarang kạděngụ e wuhụe i kamene tamai mẹ̌banua su wanua nionggọu MAWU e si kamene?

⁴Pěmileko tahạ těllung katau wọu apang ghal᷊ipoho. Iạ sarung měngoro si sire pẹ̌kakělla su kasěllahu wanua ini ringangu pěniala manga pẹ̌saraěngu wanua kụ sarung taghuaneng i sire. Wọu ene i sire pẹ̌sul᷊e su anuku.

⁵Ěntana ene harusẹ̌ pahiạ pitung kamonaěng. I Yehuda tatapẹ̌ su sěmbekan timuhẹ̌ dingangu i Yusup tẹ̌be su sěmběkan sawěnahẹ̌.

⁶Karẹ̌ u pẹ̌saraěngu ěntana pitung kamonaěng ene harusẹ̌be koạ dingangu sarakang si siạ. Iạ hědo mẹ̌taing lahurị[7] mẹ̌deạu makakasingkạu apang tinantun Mawu Ruata waugi kamene.

⁷Kětạeng hěnton Lewi tawe nakaěbạ bahageangu ěntana ringang i kamene, batụu wahageang i sire ute kai měngkakoạ manga imang waugu mẹ̌tangkiang MAWU. Ringangu ghal᷊ipohong Gad, Ruben, dingangu sěmbahageang bọu hěnton Manasye, i sire seng piạ bahageang i sire su sěmběkan timuhẹ̌ bọu Sal᷊ụ u Yordan. I Musa, ěllangu MAWU e nạung seng něngonggọu ěntana ene si sire.”

⁸Ene i Yosua e něngonggọen sasal᷊ěntihọ si sire ene, ”Dakọko tatingane kasěllahu wanua ini ringangu karẹ̌ko kěbị sarane; mase pẹ̌sul᷊e sarang anuku. Kụ iạ hědo měnawụ lotẹ̌ sini su Silo mẹ̌deạ u makakasingkạu apa tinantum MAWU e waugi kamene.” Wọuten nakatarimạu sasal᷊ěntihọ bọi Yosua ene, rimal᷊engke i sire němpẹ̌kakělla ěntana ene.

⁹Kasěllahu wanua ene niluhuang i sire wọu ene něngarẹ̌ pẹ̌saraěngu ěntana ene pitum bahageang dingangu něndaptaru lai apan soa kụ ene su ral᷊unge. Bọu ene i sire nẹ̌sul᷊e kapia su anun Yosua su pẹ̌darasengang su Silo.

¹⁰Mase i Yosua něnawụ lotẹ̌ tadeạu makakasingkạu apa nitantun MAWU waugi sire. Bọu e i Yosua nengonggọu ěntana wahageang i sire apang gal᷊ipohon tau Israel kụ bědang tawe kinapahiakengu ěntana.

¹¹Pẹ̌papahiạ humotong ute kai ěntana wọu manga walagi Benyamin. Bahageang i sire ene kaěbakeng su wěllạu ěntanang Yehuda ringangu ěntana wọu hěnton Yusup.

¹²Pẹ̌saraěng sěmběkan sawěnahẹ̌ nanětạ bọu Sal᷊ụ u Yordan, mase simaka wěntihu Yerikho sěmběkan sawěnahẹ̌, mase nẹ̌timona wawul᷊urange semběkam bahẹ karaụeweng banua l᷊inggin Bet-Awen.

¹³Běhịu pẹ̌saraěng ene tangu natěpasẹ̌ sarang lengehu Lus sěmběkan timuhẹ̌ (itẹ̌tiwạ kere Betel), bọu ene narẹ̌sung sarang Atarot-Adar su wul᷊udu Bet-Horon-Tol᷊ene sěmběkan timuhẹ̌.

¹⁴Bọu wul᷊ude ene sěmběkam bahẹ pẹ̌saraěngu wanua ene nělenga sarang sěmběkan timuhẹ̌ nẹ̌timona Kiryat-Baal (arau Kiryat-Yearim). Kiryat-Baal e kai tataghuanengu ghal᷊ipohong Yehuda. Kụ kai ene kěhịu pẹ̌saraěngu ěntana ene su sěmběkam bahẹ.

¹⁵Pẹ̌saraěng su sěmběkan timuhẹ̌ e nanětạ bọu wiwihu Kiryat-Yearim turusẹ̌ sarang kal᷊awọu simbul᷊u akẹ u Me-Neftoah,

¹⁶mase narěsung sarang pentọu wul᷊ude kụ tụtatěngo Wal᷊ang-Hinom su pondol᷊e sěmběkan sawěnahẹ̌ bọu Wal᷊ang-Refaim. Bọu ene kěhịu pẹ̌saraěng ene sarang sěmběkan timuhẹ̌ sumahem Bal᷊ang-Hinom sěmběkan timuhẹ̌ bọu manga wěntihu wul᷊ude su wanuang Yebus, turusẹ̌ sarang En-Rogel,

¹⁷mělenga sawěnahẹ̌ sarang En-Semes, mase sarang Gelilot su sěmběkan Sasakangu Adumim. Bọu ene kěhịu pẹ̌saraěng ene rumẹ̌sung sarang Batu Bohan (Bohan ute kai anạ i Ruben),

¹⁸bọu ene limiun sěmběkan sawěnahẹ̌ bọu manga wěntihu wul᷊ude kụ tụtatěngo Wal᷊ang Yordan, mase rumẹ̌sungu wal᷊ane ene,

¹⁹lumiu manga wěntihu wul᷊udu Bet-Hogla watuhu sawěnahẹ̌ bọu Laudẹ̌ Nate su mohongu Sal᷊ụ u Yordan. Kụ kai ene pẹ̌saraěngu sěmběkan timuhẹ̌.

²⁰Sal᷊ụ u Yordan nakoạ pẹ̌saraěngu sěmběkan daki. Kerene pẹ̌saraěngu ěntana kụ nighěllị su manga walagẹ̌ su hěntom Benyamin mědeạu makoạ tataghuanengi sire.

²¹Arawe manga soa ghaghuwạ tataghuanengu manga walagẹ̌ su ral᷊ungu hěntom Benyamin, kěbịe mapul᷊o dua su waụ e ringangu manga soa rarodọ mạngělikụe: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni, ringangu Geba.

²⁵Kerene lai soa mapul᷊o ěpạ tuhụe ringangu manga kampong mạngělikụe: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus, (kụ kai Yerusalem), Gibea, ringangu Kiryat-Yearim. Kụ kai ene kal᷊awọu ěntana nionggọ su manga walagẹ̌ su ral᷊ungu hěnton Benyamin baugu makoạ tataghuaneng i sire.