Read Sangir YOSUA 2 Bible Online

YOSUA 2 - Sangir bible

YOSUA 2

¹ Mase wọu pẹ̌darasengang su Sitim, i Yosua něndolohu ruang katau mẹ̌papahimang sol᷊ong Kanaan. I rẹ̌dua ene nioro pẹ̌pẹ̌pahimang banuang Kanaan pakapěnisẹ̌, kasariange soan Yerikho. Tangu rimal᷊engke i sire sol᷊ong soa ene, mase němpẹ̌tikị su wal᷊eng sěngkatau wawine taha pẹ̌sundal᷊ẹ̌, arenge i Rahab.

²Datung soan Yerikho nakaringihẹ̌ u su sěhěbi ene piạ tau Israel kụ diměnta němpẹ̌pahimang banuang Yerikho.

³Tangú ratu e něndolohu taumata sol᷊ong anun Rahab pělẹ̌habaru tita ini, ”Apasẹ̌bangko taumata apam makịkawal᷊e su wal᷊enu ene. I sire ene kai mẹ̌papahimang kụ diměnta waugu pěnẹ̌něsui kasěllahu wanuang Yerikho!”

⁴”Kahěngang bue piạ taumata riměnta su wal᷊eku,” angkuěng i Rahab, ”arawe iạ e wẹ̌gan sire měnsang bọu a. I sire seng napul᷊ẹ kanini nanětạ kakạhěbine kal᷊amonang pasěllangengu soa e nihěping. Kụ iạ e tawe nakiwal᷊o měnsang sarang apa i sire, kai manga i sire lighạ nisahusuang aramanung bědangbe kinasahusuang.” (Sěmbal᷊iau i Rahab seng němuni měnanangkạ duang katau ene su al᷊ungu niěndukangu rahami su lotengu wal᷊ene.)

⁷Tangu nahundal᷊engke manga rarolohangu ratu ene němpaněntangu soa e. Sarạeng i sire seng su l᷊ikudu, pasěllangengu soa e nihěping. I sire němpẹ̌deạe si rẹ̌dua mẹ̌papahimange sarang tampạu luměbạ Sal᷊ụ u Yordan.

⁸Su hěbi ene těntal᷊ang i rẹ̌dua mẹ̌papahimangu Israelẹ̌ e ren tawe nẹ̌tẹ̌tikị, i Rahab nakoạ sarang loteng,

⁹kụ nẹ̌bera si rẹ̌dua, ”Iạ masingkạ MAWU e seng něngonggọu wanua ini si kamene. Patikụ taumata sini mạtakụ i kamene.

¹⁰ I kami seng nakaringihẹ̌ habaru mạanung kereapa MAWU e napakamarang Laudẹ̌ Lěntuwu su těngong kamene, piạ i kamene naněntangu Misirẹ̌. I kami mal᷊aing seng nakaringihẹ̌ kakakoạ i kamene němate si Sihon dẹ̌duang Og, datun tau Amori rarua ene su sěmběkan daki wọu Sal᷊ụ u Yordan.

¹¹Eneʼi kami nakaringihe bẹ̌ke tamai ene, i kami e natakụ-takụ. Kal᷊awọu taumatang kami e nasue něngkailang kawahanine ual᷊ing i kamene. Duatanu e mamben Duata Limembong Kawasa su l᷊angị dingangu su dunia.

¹²Iạ mẹ̌lěharapẹ̌ u i kamene mapulu mẹ̌salu su arengʼE u i kamene sarung miěbạ balagẹ̌ku e mapia kerẹewe seng takụ kinoạ baugi kamene. Pẹ̌kědọe u i amangku, i ninangku, manga anạ u sěngkatauku, ringangu kal᷊awọu anạ u sěngkataun sire tawe pateěng i kamene, kaiso kawe těntanurang i kamene. Kụ baugu ene tangú gělirengkon sěmbaụ tatiala kere wawalaru i kamene ikapangimangengku!”

¹⁴Tangú sasimbahi rẹ̌duae, ”I kami e mẹ̌diandi u kereu MAWU e mẹ̌gěllịu wanua ini e si kami, i kami sarungbe mapia miěbạ si kamene, asal᷊u i kau tawe mẹ̌bẹ̌keng kami e si sai-sai. Balạete MAWU e pěngane si kami, kereu i kami e kawe mělanda kire ene.”

¹⁵Ual᷊ingu wal᷊eng Rahab nipětị su wowong meselu soa ute i Rahab něngul᷊uhi rẹ̌dua e ringangu tal᷊i wọu janela.

¹⁶”Dakọe sol᷊ong bawul᷊urange,” angkuěng i Rahab si rẹ̌dua, ”Tadeạu taumata apan nirolohu ratu e tawe makapěnamẹ si rua. Pẹ̌kěmbunịe sene těllu ěllo karěngụe sarang i sire mawal᷊ị, buhụewe i rua wotonge makapanurusẹ̌u raral᷊eng.”

¹⁷I rẹ̌dua mẹ̌papahimang ene e nẹ̌bera si Rahab, ”Kerenẹe ikandua e hědo maněhụ kědo nạung seng nighausangu wọi kandua.

¹⁸Kětạeng ini e hinong koatengu. Kereu i kami sarung makakasuẹ̌ su wanuang kamene, ute tal᷊i mahamụ ini e ikịko su janela ini tampạ u pěngul᷊uhangu si kandua. I amangu, i ninangu, manga anạ u sěmbaụu, patikụ anạ u sěmbaụ i amangu tampungko karạu su wal᷊e ini.

¹⁹Kereu piạ u sěngkatau wọi sire suměbang bọu wal᷊e ini kụ mate pateěng, ute papatene kai sal᷊ane hala, kụ i kami e tawe makatal᷊udẹ̌ hal᷊ẹ̌ ene. Kaiso kereu piạ u nakahombang silakạ su wal᷊e ini ute seng i kami e měnal᷊udẹ̌.

²⁰Su sěmběkane ute, kereu i kamene mẹ̌běkeng kami su pẹ̌sěngkatau e tangu i kami e sembelain tawe i kaikị su riandi kụ seng nirorongangu si kami.”

²¹I Rahab kimire hal᷊ẹ̌ ene, wọu ene namalan sire pinakapul᷊ẹ. Bọu ene i sie nangikị e tal᷊i mahamụ ene su janelane.

²²Tangu rimal᷊engke i rẹ̌dua mẹ̌papahimang ene sarang bawul᷊urange kụ nẹ̌kěmbuni paị sene. Těllu ěllo karěngụe manga rarolohangu ratu e němpẹ̌deạ si sire su apan tampạ su kạguwạu wanua ene, kaiso tawe nakaěbạ si sire. Kasueěnge manga rarolohang ene něngkapul᷊ẹ sarang Yerikho.

²³Bọu ene i rẹ̌dua mẹ̌papahimang bọu Israel ene němpẹ̌lintụ bọu wawul᷊urange kụ němpẹ̌liu sal᷊ụ, bọu e nẹ̌sul᷊e sarang anung Yosua. Patikụ ěbạ i sire, nipaul᷊ị i sire si sie.

²⁴Mase i sire nẹ̌bera, ”Nal᷊ahẹ u MAWU e měngonggọu kạguwạu wanua ene si kitẹ; kěbị taumata paị sene mạtakụ i kitẹ.”