Read Sangir YOSUA 20 Bible Online

YOSUA 20 - Sangir bible

YOSUA 20

¹ Bọu e MAWU něngoro si Yosua

²pẹ̌bera su tau Israel kere ini, ”Iạ seng nẹ̌parenta si Musa tadeạu i sie pěhabarẹ̌ si kamene mạanung soa pẹ̌kakěllungang, ute kai soa suapan taumata makakatal᷊angu watangenge mẹ̌deạu makapẹ̌kěllung. Kụ ini e pěmilẹe wọu soa tamai ene.

³Taumata kụ měmate taumata wal᷊ine, kụ bal᷊ine pinẹ̌tatudẹ, botonge tumal᷊ang sarang soa ene mẹ̌deạu mal᷊iwirẹ̌ bọu taumata kụ měmal᷊isẹ̌ une si sie.

⁴I sie wotonge tumal᷊ang su soa sěmbaụ bọu tal᷊oaran soa tamai ene, kụ makoạ sarang tampạu mělahukung su tukadu pasěllangengu soa ene, mase měnualagu ene su manga pangahạ e sene apan seng nariadi. Kal᷊awọu pangahạ e ene sarung mapakawalan sie sumuẹ̌ su soa ene, ringangu měngonggọu tampạ u pẹ̌tanakeng si sie.

⁵Kereu taumata kụ mapulu měmal᷊isẹ̌ une e měnahusu si sie sarang tampạ ene, kụ tumanạ u soa ene tawe wotonge měnarakangu ene su tau ene. I sire harusẹ̌ maněntanudẹ̌ si sie, u i sie kai němate taumata wal᷊inewe pinẹ̌tatudẹ, dingangu wal᷊inewe ual᷊ingu mạběnsing.

⁶I sie wotonge matanạ su soa ene, sarang i sie seng i sidang su těngon lawọ, dingangu sarang taumata kụ piạ diabatange Imang Karangetange su tempo ene mate. Bọu ene wuhụ e tau ene wotonge mapul᷊ẹ sarang kamponge wọu tampạ kụ i sie timal᷊ang.”

⁷Tangu su sěmběkam bahẹ bọu Sal᷊ụ u Yordan kawanuang Israel něnantung manga soa ini pẹ̌kakěllungang i sire: Kedes su wawul᷊urangu Naftali, su Galilea, Sikem su wawul᷊urangu Efraim, dingangu Hebron su wawul᷊urangu Yehuda.

⁸Su sěmběkan daki wọu Sal᷊ụ u Yordan su tenene marangẹ su wanua l᷊inggi su sěmběkan daki wọu Yerikho, i sire něnantu manga soa ini kere soa pẹ̌kakěllungang: soang Bezer su wanuang Ruben, soang Ramot su Gilead, su wanuang Gad, dingangu soang Golan su Basan, banuang Manasye.

⁹Seng ene kěbị manga soa pẹ̌kakěllungang tinantu waugu patikụ kawanuang Israel dingangu waugu apan taumata raghị kụ mạtanạ su tal᷊oaran sire. Apan taumata kụ měmate taumata wal᷊ine kụ bal᷊ine pinẹ̌tatudẹ, ute wotonge těntanurang su manga soa ene wọu pěnanahusun taumata kụ mapulu měmal᷊isẹ̌ une si sie; i sie tawe wotonge pateěng kereu reng bědang tawe nịsidang su těngon lawọ.