Read Sangir YOSUA 21 Bible Online

YOSUA 21 - Sangir bible

YOSUA 21

¹ Piạ su sahěllo kal᷊awọu těmbonangu walagẹ̌ ghal᷊ipohong Lewi nakoạ sarang Silo su wanuang Kanaan, dingangu nẹ̌tengong Imang i Eleazar, i Yosua anạ i Nun, dingangu kal᷊awọu těmbonangu walagẹ̌ su patikụ hěnton tau Israel. I sire nẹ̌bera, ”Limiung Musa e, MAWU e seng nẹ̌parenta mẹ̌deạu waugi kami e tau Lewi onggotangu manga soa pẹ̌tanakeng i kami ringangu kal᷊awọu ěntana wimbaenge su rěduhu manga soa ene waugu binatang lahikinang i kami e.”

³Tangu tau Israel timuhụ laorom MAWU e. Bọu ěntana pusakạ i sire hala e, i sire něngonggọu manga soa nitantu su tau Lewi ringangu manga ěntana wimbaenge.

⁴Kahumotong-motongange nakatarimạu manga soane ute kai manga walagẹ̌ ghal᷊ipohong Kehat su ral᷊ungu hěnton Lewi. Kal᷊awọu walagẹ̌ hiteng imang kụ i Harun nionggotangu soa mapul᷊o těllu bọu wanuang hěnton Yehuda, i Simeon, dingangi Benyamin.

⁵Manga walagẹ̌ bal᷊ine wọu ghal᷊ipohong Kehat, nionggotangu soa mapul᷊o wọu wanuang hěntong Efraim, hěnton Dan, ore lai hěntong Manasye su sěmběkam bahẹ bọu Sal᷊ụ u Yordan.

⁶Ghal᷊ipohong Gerson nakaěbạ soa mapul᷊o těllu bọu wanua hěntong Isakar, i Asyer, i Naftali, ringangu hěntong Manasye kụ su sěmběkan daki wọu Sal᷊ụ u Yordan.

⁷Manga walagẹ̌ bọu ghal᷊ipohong Merari nakaěbạ soa mapul᷊o dua bọu wanuang hěnton Ruben, Gad, dingangu i Zebulon.

⁸Kerene tau Israel nẹ̌papahiạ u manga soa ene ringangu manga ěntana wimbaenge tẹtal᷊u pěnanawụ lotẹ̌[9] baugu tau Lewi, kerẹewe niorong MAWU e wọi Musa.

⁹Bọu ghal᷊ipohong Kehat, su ral᷊ungu hěnton Lewi, ute seng manga imang hěntong Harun nạung kahumoto-motongange nakatarimạ u manga soane, i sire nionggotangu soa mapul᷊o těllu ringangu manga ěntana wimbaenge. Bọu hěnton Yehuda ringangi Simeon, i sire nakatarimạu soa sio kụ: Libna, Yatir, Estemoa, Holon, Debir, Ain, Yuta, Bet-Semes, dingangu Arba, kụ nisẹ̌bạ tuhụ areng i amang i Enak. Soa ene, kụ orasẹ̌ ini isẹ̌sěbạ Hebron, ute kai soa sěmbaụ pẹ̌kakěllungang su wawul᷊urangu Yehuda. Manga kěhu ringangu kamponge su soa ini seng nionggọ si Kaleb anạ i Yefune waugu makoạ ěntana pusakạ e. Dingangu wọu hěntom Benyamin i sire nakatarimạ u soa ěpạ kụ: Gibeon, Geba, Anatot, dingangu Almon.

²⁰Manga walagẹ̌ bal᷊ine wọu hěntong Kehat, nionggotangu soa mapul᷊o ringangu manga ěntana wimbaenge. Bọu hěntong Efraim i sire nakatarimạ u soa ěpạ, kụ kai: Bet-Horon, Kibzaim, Gezer, dingangu Sikem, soa sěmbaụ pẹ̌kakěllungang su wawul᷊urangu Efraim. Bọu hěnton Dan i sire nakatarimạu soa ěpạ, kụ kai: Elteke, Gibeton, Ayalon, dingangu Gat-Rimon. Bọu hěntom Manasye kụ su sěmběkam bahẹ i sire nakatarimạu soa rarua kụ kai: Taanakh dingangu Gat-Rimon.

²⁷Ghal᷊ipoho wal᷊ine sěmbaụ su ral᷊ungu hěnton Lewi e ute kai ghal᷊ipohong Gerson e nionggotangu soa mapul᷊o těllu ringangu manga ěntana wimbaenge. Bọu hěntom Manasye kụ su sěmběkan daki e i sire nakatarimạu soa rarua, kụ kai: Beestera dingangu Golan, soa sěmbaụ pẹ̌kakěllungang su wanuang Basan. Bọu hěntong Isakar i sire nakatarimạ u soa ěpạ, kụ kai: Kisyon, Dobrat, Yarmut, dingangu En-Ganim. Dingangu wọu hěntong Asyer i sire nakatarimạ u soa ěpạ, kụ kai: Misal, Abdon, Helkat, dingangu Rehob. Bọu hěnton Naftali i sire nakatarimạ u soa tatěllu kụ kai: Hamat-Dor, Kartan, dingangu Kedes, soa sěmbaụ pẹ̌kakěllungang su Galilea.

³⁴Ghal᷊ipoho lěmbene su ral᷊ungu hěnton Lewi, ute kai ghal᷊ipohong Merari nionggotangu soa mapul᷊o dua ringangu manga ěntana wimbaenge. Bọu hěnton Zebulon i sire nakatarimạ u soa ěpạ kụ: Yokneam, Karta, Dimna, dingangu Nahalal. Bọu hěnton Ruben i sire nakatarimạu soa ěpạ tangu kai: Bezer, Yahas, Kedemot, dingangu Mefaat. Bọu hěnton Gad, i sire nakatarimạu soa ěpạ kụ kai: Mahanaim, Hesybon, Yaezer, dingangu Ramot, soa pẹ̌kakěllungang sěmbaụ su Gilead.

⁴¹Kụ bọu kal᷊awọu ěntanan tau Israel piạ soa ěpạ u pul᷊o ual᷊u su waụe ringangu manga ěntana wimbaenge mạngělikụe kụ nionggọ su tau Lewi.

⁴³Kerene MAWU e něngonggọu kal᷊awọu ěntana su tau Israel kụ seng nikědonʼE ringangu pẹ̌sasalu su manga i upung i sire. Bọuten nakakaiang su wanua ene, kawanuang Israelẹ̌ e naindunụ natanạ sene.

⁴⁴Tangu natuhụewe kere riandin MAWU su manga i upung i sire, banua ene mal᷊enehẹ̌ batụu kawe lẹ̌ěllungangu MAWU. Kal᷊awọu sědụ i sire tawẹu sarang sěngkatau makarokạ si sire, watụ u MAWU e nangonggọu kal᷊auntu su tau Israel waugu patikụ sědụ i sire.

⁴⁵MAWU e napakasěhụu apan diandi-Ne su tau Israel; kụ tawẹu sarang sěmbaụ tawe pinakasěhụʼE.