Read Sangir YOSUA 22 Bible Online

YOSUA 22 - Sangir bible

YOSUA 22

¹Bọu e i Yosua nẹ̌kui si sire wọu hěnton Ruben, Gad, dingangu sěmbahageang bọu hěnton Manasye kụ su sěmběkan daki wọu Sal᷊ụ u Yordan,

² mase nẹ̌bera si sire, ”I kamene seng němpẹ̌koạ patikụ apang niorom Musa ěllangu MAWU e si kamene. Kụ i kamene mal᷊ain timuhụ kal᷊awọu laoroku.

³Karěngụe ini i kamene tawe napakawalan manga anạ u sěngkataunu tau Israel bal᷊ine e, mẹ̌tawakal᷊i hala. I kamene seng timuhụ dingangu kạguwạu naung kal᷊awọu titam MAWU e.

⁴Tangu natuhụewe kere su riandi-Ne, MAWU Ruatanu e seng něngonggọu karal᷊enehẹ̌ su manga anạ u sěngkataunu, tau Israel bal᷊ine. Kụ ini e tangu pẹ̌bal᷊ịe sarang banuang kamene hala su sěmběkan daki wọu Sal᷊ụ u Yordan nạung seng nionggọ i Musa e kal᷊imona.

⁵Kụ pakasasatia wue i kamene tumuhụ tita kụ seng niparentam Musa e si kamene, kụ: Kěndagẹ̌ben MAWU Ruatanu e, tuhuke wue kapulu-Ne, tumuhụ kal᷊awọu tita-Ne, pakasatia wue si Sie, ringangu pẹ̌karadiahangbe waugi Sie ringangu kasarian naungu e ringangu kasěllahu himukudu e.”

⁶Bọu e i Yosua něnahutěngadẹ̌ kụ napakawalan sire nẹ̌bal᷊ị sarang banuan sire mase timanata kere ini, ”I kamene orasẹ̌ ini e kalạ batụu i kamene napul᷊ẹ nakawawa binatang i kamene lawọ, sal᷊aka, wul᷊aeng, tambaga, uase, ringangu pakeang. Pahiake wue manga anạ u sěngkataung kamene wal᷊ine e apam pul᷊ahọe.” Tangu hěnton Ruben, Gad, dingangu i Manasye, kụ su sěmběkan daki e wọu Yordan e naněntangu tau Israel bal᷊ine, bọu ene nẹ̌buạ bọu Silo su Kanaan sarang ěntanan sire hala su wanuang Gilead. I sire nẹ̌tanạ su ěntana ene tuhụewe titam MAWU e wọi Musa. (Sitenga wọu hěnton Manasye seng nakatarimạ u ěntana wọi Musa e su sěmběkan Sal᷊ụ u Yordan, dingangu sitenga wọu hěnton Manasye lai wal᷊ine tangu nakatarimạ u ěntana wọi Yosua su sěmběkam bahẹ bọu Sal᷊ụ u Yordan sěngkahindọ dingangu hěnto lai wal᷊ine.)

⁷

⁸

⁹

¹⁰Su tempong ghal᷊ipohong Ruben, Gad, dingangu hěnton Manasye su sěmběkan daki wọu Sal᷊ụ u Yordan ene e nahumpạ su Gelilot — kụ bědang su sěmběkam bahẹ bọu Sal᷊ụ u Yordan — i sire něndarisị u pananěmbaěng sěmbaụ gẹ̌guwạ dingangu mawantugẹ̌ maranin sal᷊ụ.

¹¹Tau Israel lai wal᷊ine nakaringihẹ̌ u sěndinganeng i sire lawọ bansa sěmbaụ e němpẹ̌bera, ”I sire hěnton Ruben, i Gad dingangu hěnton Manasye su sěmběkan daki wọu Yordan seng něndarisịu pananěmbaěng sěmbaụ su Gelilot, maranin Sal᷊ụ u Yordan kụ su weọ i kitẹ!” Tangu i sire kěbị nẹ̌tampung su Silo kụ sarung měnekẹ manga hěntong Israel apang su sěmběkan daki wọu Sal᷊ụ u Yordan ene.

¹²

¹³Mase i Pinehas anạ u Imang i Eleazar nirolohu kawanuang Israelẹ̌ e sarang anun sire ghal᷊ipohong Ruben, Gad, dingangu ghal᷊ipohong Manasye kụ su wanuang Gilead, su sěmběkan daki wọu Sal᷊ụ u Yordan.

¹⁴Tangu nedingangkelaim Pinehasẹ̌ ute nẹ̌buạ e lai pangahạu tau Israelẹ̌ e mapul᷊ong katau — sěngkatau wọu apang hěnto su sěmběkam bahẹ bọu Sal᷊ụ u Yordan, sěngkatau-sěngkatau e kai tuměllangu apam bal᷊e su ral᷊ungu ghal᷊ipohon sire.

¹⁵Tangu nahumpạ e i sire su tampạ u hěnton Ruben, Gad, dingangu i Manasye, su wanuang Gilead.

¹⁶ Mase ringangu arengu patikụ umatu MAWU e i sire nẹ̌bera su apan taumata wọu hěnton Ruben, Gad, dingangu i Manasye e, ”Unụ e i kamene nẹ̌koạ hal᷊ẹ̌ dal᷊akisẹ̌ ene su Mawu Ruatang Israelẹ̌? Kụ ual᷊ingu pamamětị pananěmbaěng i kamene hala e i kamene limawang MAWU! I kamene selain tawe timuhụ kal᷊awọu manga tita-Ne!

¹⁷ I kamene kai tawe nakatahěndung dosang kamene su Peor? Su tempo ene i kitẹ e nihukungu MAWU kụ nihombangengu sahindạ, maningbe lai i kitẹ ini e kawe umatʼE hala e! Sarang orasẹ̌ ini e i kitẹ bědang mẹ̌masaěng aị e. Kụ kai wědang tawe nạsukụ tangu?

¹⁸Kụ ini e, i kamene relaing mapulu tumal᷊ikudẹ̌ MAWU e tangu? Kereu sahěllo ini i kamene lumawang MAWU e, rịěllo l᷊ai i Sie lumangehẹ̌ su patikụ umatu Israel.

¹⁹Kereu wanuang kamene seng nal᷊amuhụ dingangu seng tawe kapẹ̌koateng tampạu pẹ̌kal᷊iomanengang su MAWU e pěngal᷊ingke ramahi sarang banuang MAWU e su piạ Tentam MAWU. Pẹ̌dorongke sěmbahageang bọu wanuang kami e, kaiso kumbahangbe lumawang MAWU arau lumawang si kami ringangu měnamba lai pananěmbaěng bal᷊ine sěmbaụ, sěmbal᷊iau sembem piạ pananěmbaěng su MAWUNG kitẹ e.

²⁰ Pẹ̌tahěndung, i Akhan anạ i Zerah mạdiri tumuhụ hengetangu MAWU mạanung apal᷊iwụ kụ hinong apakagholọ, dingangu kai apa aị e ngae? Kal᷊awọu umatu Israelẹ̌ e i hukung! Nẹ̌dosa e kětạeng i Akhan, kaiso nate e wal᷊inewe tumbạu i sie sẹ̌sane!”

²¹Mase ghal᷊ipohong Ruben, Gad, dingangu i Manasye su sěmběkan daki e simimbang,

²²”Limembong kawasa e kai MAWU! Limembong kawasa e kai MAWU! I Sie masingkạ, unụe i kami e nẹ̌koạ hal᷊ẹ̌ ini, ringangu i kami e mapulu tadeạu i kamene mal᷊aing masingkạ u ene! Manga andene i kami mẹ̌koạ hal᷊ẹ̌ ene kụ timonane kawe lumawang MAWU arau lai ual᷊ingu i kami e tawe mangimang si Sie, ute mapiawe lai i kami mate su sahěllo ini!

²³MAWU e hala měhukung i kami, kereu i kami piạ karaki lumawang MAWU ringangu měndarisị u pananěmbaěng i kami hala waugu mẹ̌gěllịu sasěmba tẹ̌tutungang arau ghaghěllị gandung arau ghaghěllị u pẹ̌dal᷊ahapị su wowone.

²⁴Bal᷊inewe ene timonang kami, manga anạ u sěngkatau! I kami e něndarisị u pananěmbaěng ene e, ual᷊ingu i kami e ghuměnggang su tempo ramahi e hěntong kamene e sarung mẹ̌bera su manga hěntong kami, ’I kamene e tawẹ apa kal᷊ahěmpukange apa ringangu MAWU, Ruatang Israel!

²⁵Kakělla, i Sie naměllọ u Sal᷊ụ u Yordan ini e su tal᷊oarang kitẹ e hatede waugu mapẹ̌dal᷊ahaeng kami ringang i kamene ghal᷊ipohong Ruben dingangu i Gad. Mamben těngadẹ̌ i kamene e tawẹ kal᷊ahěmpukange apa-apa ringangu MAWU.’ Tangu apạ e sarung mariadi e? Nal᷊ahẹu hěntong kamene e sarung mapěngirul᷊eng hěntong kami e mẹ̌kal᷊iomaneng su MAWU.

²⁶Kụ, i kami e měndarisị u pananěmbaěng bal᷊inewe waugu sasěmba tẹ̌tutungang arau waugu manga sasěmbang kami e,

²⁷kaiso kawe waugu makoạ tatiala si kitẹ bọu ruam běka, ringangu waugu hěntong kitẹ su tempo ramahi, u kahěngang bue i kami ini mẹ̌kẹ̌kal᷊iomaneng bue su MAWU su Tentan Darěntaěng-Nge kapẹ̌bawane sasěmba tẹ̌tutungang, manga sasěmba ringangu sasěmbang pẹ̌dal᷊ahapị. Ual᷊ingu kawe kerene tangu hiteng kamene tawe sarung mẹ̌bera u hiteng kami e tawẹ apa kal᷊ahěmpukange apa ringangu MAWU.

²⁸Kụ, timonang kami e kawe: manga andene hiteng kamene e mẹ̌bera kere ini, tangu hiteng kami e makawera, ’Kakěllạe pananěmbaěng ene! I upung i kami e něndarisịu pananěmbaěng sěmbaụ kụ mẹ̌sul᷊ungu pananěmbaěngu MAWU, bal᷊inewe waugu sasěmba tẹ̌tutungang arau waugu sasěmba, kaiso kawe waugu makoạ tatiala waugi kitẹ duam běka.’

²⁹Pangimangke, i kami e madiri lumawang MAWU, arau měngědo měmunara waugi Sie ringangu měnamba pananěmbaěng bal᷊ine waugu sasěmba tẹ̌tutungang arau sasěmba gandung arau waugu sasěmba, arawe pananěmbaěngu MAWU Ruatang kitẹ e seng ene su těngon Tenta Rarěntaěngu MAWU e.”

³⁰Kěbị apan nilahẹu hěnton Ruben, Gad, dingangu hěnton Manasye su sěmběkan daki e niraringihangu Imang i Pinehas dingangu těmbonangu kawanuang Israel i sire mapul᷊ong katau wọu wahageang sěmběkam bahẹ bọu Sal᷊ụ u Yordan. Tangu i sire mal᷊aing něngkawiul᷊u tatualagi sire.

³¹Mase angkuěng i Pinehas, anạ u Imang i Eleazar, si sire hěnton Ruben, Gad, dingangi Manasye wọu sěmběkan daki e, ”Ini e i kami nasingkạ u MAWU e mạněntanudẹ̌ si kitẹ e, ual᷊ingu i kamene tawe limawang si Sie. I kamene seng něngambang umatu Israel bọu hukumang u MAWU.”

³²Samuring ene tangu nẹ̌buạ e i Pinehas dingangu manga těmbonangu Israelẹ̌ e. I sire naněntangu ghal᷊ipohong Ruben, dingangu i Gad, su Gilead, bọu ene nẹ̌bal᷊ị sarang Kanaan, kụ naul᷊ịu hal᷊ẹ̌ ene su umatu Israel.

³³Tangu kawanuang Israelẹ̌ e mal᷊aing nawul᷊ugu hal᷊ẹ̌ ene, hakịu i sire měmpẹ̌dẹ̌dalo Mawu Ruata. I sire seng tawe lai nahumbisarang karakin sire waugu měnekẹ ghal᷊ipohong Ruben dingangi Gad, dingangu waugu mapakagholọu wanuan sire.

³⁴Pěngěnsueěnge hěnton Ruben dingangi Gad, ene e němpẹ̌bera, ”Panananěmbaěng ini e makoạ sahidi waugi kitẹ kěbị e waugu MAWU e kai Ruata.” Tangu i sire nẹ̌sẹ̌bạu pananěmbaěng ene e ”Sahidi”.