Read Sangir YOSUA 23 Bible Online

YOSUA 23 - Sangir bible

YOSUA 23

¹Marěngụ samurin MAWU něngonggọu karal᷊enehẹ̌ su manga umatu Israel; i sire semben tawe nasaghen tatumbiagu sekẹ. Su tempo ene i Yosua seng maghurang-gurang.

²Tangu i sie nẹ̌kui kal᷊awọu umatu Israel, dingangu manga těmbonange, manga pangahạ e, manga mělahukung, dingangu manga pěrwira, kụ nẹ̌bera, ”Iạ seng maghurang.

³I kamene seng nakasilo patikụ kinoạ u MAWU Ruata waugu patikụ bansa sini baugʼi kamene kěbị. Apang nẹ̌tawakal᷊i waugi kamene, ute kai MAWU Ruatang kamene.

⁴Ěntanang manga wansa kụ bědang ene, kerene lai ěntanang patikụ bansa kụ takụ kinawatạ ute kai ěntana naěmpahẹ̌ bọu sěmběkan daki wọu Sal᷊ụ u Yordan turusẹ̌ sarang sěmběkam bahẹ sarang Laudẹ̌ Tal᷊oara, kěbị ene sen takụ nipahiạ si kamene waugu makoạ pusakạ i kamene.

⁵MAWU Ruatanu e sarung mapakariadim manga wansa e i sohọ e, kụ tumal᷊ang bọu anung kamene kereu i kamene tamai mẹ̌sekẹ i sire. Kamene sarung měnaghuang banuan sire, kerẹewe seng niriandim MAWU si kamene.

⁶Ual᷊ingu ene pakariagạko tadeạu i kamene matuhụ dingangu měndal᷊engu patikụ apang kạbawohẹ su ral᷊ungu Bukẹ̌ u Torati Musa. Kumbahangbe lumampa sarang sěmbaụ bọu manga tita ene.

⁷Ual᷊ingu kawe kerene tangu i kamene tawe sarung mẹ̌dal᷊aụu manga wansa kụ bẹ̌dang mạtanạ su tal᷊oarang kamene. I kamene sarungbe tawe mẹ̌sẹ̌bạu arengu manga mahang duatan sire arau mẹ̌salu su areng ene. Kerene lai i kamene sarung tawe mẹ̌kal᷊iomaneng arau mẹ̌suba su manga mahang duata ene.

⁸I kamene sarang lai hinong tatapẹ̌ satia su MAWU, kerẹewe seng kinoạ i kamene sarang orasẹ̌ ini.

⁹Kal᷊awọu wansa kụ masaria ringangu matoghasẹ̌ e seng nitokol᷊u MAWU waugi kamene; tawẹu sarang sěngkatau wọi sire kụ makararagẹ̌ dumokạ si kamene.

¹⁰ Sěngkatau-sěngkatau wọu tal᷊oarang kamene e makawatạ hiwune su kataune, ual᷊ingu MAWU Ruatanu e mẹ̌sẹ̌sekẹ baugi kamene, kerẹewe seng niriandi-Ne.

¹¹Ual᷊ingu ene, pẹ̌tahěndungko waugu kuměndagu MAWU Ruatanu.

¹²Kereu i kamene tawẹ satiane dingangu i kamene mẹ̌dal᷊aụu manga wansa kụ bẹ̌dang mạtanạ dingangi kamene, kụ i kamene mẹ̌kawing dingangi sire,

¹³pẹ̌tahěndung, nal᷊ahẹu MAWU Ruatang kamene e tawe měnokol᷊u kal᷊awọu wansa ene waugi kamene. Kaiso kamagengu i sire sarung makasilakạ si kamene marasai, watụ u i sire sarung makoạ kere sedẹ arau kere sasamẹ si kamene. I sire mal᷊aing sarung mapakasunsarang kamene matědụ-tědụ, batụu i sire sarung makoạ kere cambokẹ̌ su pěnadi kamene, arau kere pul᷊ing su ral᷊ungu matang kamene. I kamene sarung turusẹ̌ masunsara sarung tawẹ u sarang sěngkatau wọu tal᷊oarang kamene kụ kạtatanạ su wanua mapia ini kụ nionggọu MAWU Ruata e si kamene.

¹⁴Ini e seng tempone iạ mate. I kamene kěbị, sěngkatau-sěngkatau e masingkạ-singkạ u MAWU Ruatang kamene seng něngonggọu patikụ apang mapapia e si kamene apan niriandi-Ne si kamene. Apan diandi-Ne seng pinakasěhụʼE, kụ mamben tawẹu sarang sěmbaụ kụ tala e.

¹⁵Kụ kerẹewe seng pinakasěhụʼE apan diandi-Ne si kamene e kerene lai i Sie sarung maparal᷊engu tatumbiagʼE waugi kamene.

¹⁶Kereu i kamene lumampa pẹ̌dariandi kụ seng nitita-Ne si kamene kahiang MAWU Ruatang kamene mẹ̌deạu tuhukang, kụ i kamene kawe tamai mẹ̌kal᷊iomaneng su manga mahang duata e arau měněmba manga ruata ene, tangu MAWU e sarung lumangehẹ̌, dingangu měhukung i kamene. Tawẹ kararěngụ e i kamene kěbị sarung i pakailang bọu wanua mal᷊ěnggihẹ̌ ini, kụ nionggọu MAWU e si kamene.”