Read Sangir YOSUA 24 Bible Online

YOSUA 24 - Sangir bible

YOSUA 24

¹I Yosua něnampungu kal᷊awọu hěntong Israel su Sikem, mase nẹ̌kui manga těmbonange, pangahạ, mělahukung, dingangu manga pěrwira pạděnta pẹ̌těngo. Tangu riměntạe i sire nẹ̌těngon Mawu Ruata.

² Bọu ene i Yosua e nẹ̌bera si sire kěbị, ”Pẹ̌daringihẹ̌ko apa nipěhengetangu MAWU Ruatang Israelẹ̌ e si kamene, ’Nạung kạngerẹ i upung i kamene mạtanạ su sěmběkan Sal᷊ụ u Efrat, kụ měnẹ̌němba manga mahang duata. Sěngkatau wọu tal᷊oaran sire kụ i Terah i amang i Abraham, dingangu i Nahor.

³ Bọu e Iạ něngal᷊ạ si Abraham, i upung i kamene e, bọu wanua su sěmběkang Efrat ene, ringangu něngoro si sie apělẹ̌likụ kasěllahu wanuang Kanaan. Iạ něngonggọu pal᷊ahite mal᷊awọ si sie. Humotong i sie Takụ nionggotang i Ishak,

⁴ bọu ene waugi Ishak e Takụ nionggotangu anạ e rarua, kụ i Yakub dẹ̌duang Esau. Iạ něngonggọu wawul᷊urangu Edom si Esau nakoạ ěntana pusakạ e, arawe i Yakub, i amang i upungu e, pěngal᷊ing sarang Misirẹ̌, dingangu manga anạ e.

⁵ Mase Iạ něndolohi Musa rẹ̌duang Harun, dingangu napahombangu silakạ masaria waugu Misirẹ̌ e, wọu e Iạ mapasěbang i kamene wọu pai ene.

⁶ Iạ mẹ̌bawa si upung i kamene apasẹ̌bang bọu Misirẹ̌, bọu e tau Misirẹ̌ e měnahusu si sire ringangu karetan sekẹ dingangu sordado piạ kawal᷊one. Dingangu su tempong manga i upung i kamene e marěnta su Laudẹ̌ Lěntuwu,

⁷i sire kụkahiorọ si Siạ makịtul᷊ung. Tangu tampạ kụ su tal᷊oaran sire dingangu tau Misirẹ̌ e Takụ i pakarěndung dingangu tau Misirẹ̌ e Takụ hěpingangu l᷊audẹ̌ sarang i sire kěbị mawul᷊usẹ̌. I kamene seng masingkạ kěbị apan Takụ nikoạ su tau Misirẹ̌ e. Marěngụ kahěngang i kamene mạtanạ su wanua l᷊inggi.

⁸ Bọu ene Iạ nẹ̌bawa si kamene sarang banuan tau Amori kụ mạtanạ su sěmběkan daki wọu Sal᷊ụ u Yordan. I sire něnekẹ si kamene, kaiso Iạ e napakawatạ i sire e si kamene. I kamene e namul᷊aho wanuan sire, ringangu Iạ e napakaupun sire.

⁹ Mase ratung Moab kụ i Balak ahusi Zipor, limawang si kamene. I sie něndolohu taumata sarang anung Bileam anạ i Beor, dingangu nẹ̌dorong tadeạu i Bileam měngane si kamene.

¹⁰Kaiso Iạ e tawe timuhụ kapulum Bileam, tangu i sie něngal᷊amatẹ̌ si kamene. Tangu kerene Iạ e něngambang si kamene wọi Balak.

¹¹ Bọu ene i kamene limẹ̌bạ Sal᷊ụ u Yordan, kụ nahumpạ su Yerikho. Tau Yerikho e něnekẹ si kamene, kerene lai tau Amori, tau Feris, Kanaan, Het, Girgasi, Hewi ringangu tau Yebus. Arawe Iạ e nangonggọu kal᷊auntu si kamene namatạ si sire kěbị.

¹² Su tempong i kamene rimial᷊ẹ̌ něnekẹ si sire, Iạ e napakariadin sire nẹ̌bingọ dingangu něngkatakụ, hakịu ratun tau Amori ruang katau e němpẹ̌tal᷊ang i kamene. Bal᷊inewe pedang kamene ringangu lai papitị i kamene nakakauntu si kamene.

¹³ Ěntana Takụ nionggọ si kamene e, tarimạeng kamene tawahal᷊uasu mẹ̌těngkawěhạ. Dingangu manga soa kụ Takụ nionggọ si kamene wal᷊inewe i kamene namětị ene. Kai orasẹ̌ ini e i kamene mạtanạ sene, ringangu i kamene lai makateěng buang anggorẹ̌ e ringangu wuang zaitun, sumbal᷊iau wal᷊inewe i kamene mẹ̌sasuange.’ ”

¹⁴”Kụ orasẹ̌ ini,” angkuěng i Yosua wọu ene, ”pěngadatẹ̌ko MAWU e. Pěmunarako waugi Sie ringangu kasarian dal᷊ungu naungu ringangu kasasatia. Sekehẹ̌ko manga ruata wal᷊ine kụ sẹ̌sěmbaěngu manga i upung i kamene nạung kal᷊imona e su Mesopotamia ringangu Misirẹ̌. Pěmunarako tumbạeng baugu MAWU e.

¹⁵Manga andene i kamene mạdiri mẹ̌tangkiang MAWU e, ute pangal᷊ạ e putusang sahěllo ini waugi saing kụ mapulu mẹ̌tangkiang: su manga ruata wal᷊ine kụ sẹ̌sěmbaěngu manga i upung i kamene su Mesopotamia e nạung kạngerẹ, arau su manga ruatan tau Amori su wanuane kụ pẹ̌tẹ̌tanakeng i kamene orasẹ̌ ini. Arawe i kami — iạ dingangu walagẹ̌ku e — sarung měmunara samatang baugu MAWU e.”

¹⁶Tangu umatu Israelẹ̌ e simimbang, ”I kami e sarung mamben tawe maněntangu MAWU e mẹ̌deạu mẹ̌tangkiang baugu manga ruata wal᷊ine!

¹⁷Kai MAWU Ruatang kitẹ e seng napakal᷊iwiru manga i upung i kitẹ e ringangu i kitẹ hala e wọu pẹ̌tatahuěllang su Misirẹ̌ e. I kitẹ e seng nakasilo kal᷊awọu karal᷊inaụ kinoạ u MAWU e. Sěntiniạ MAWU e mạněntanudẹ̌ si kitẹ e su patikụ daral᷊eng i kitẹ e lumiu kal᷊awọu wanuan tau raghị.

¹⁸Ringangu su tempong i kitẹ e kạpahunsuẹ̌ e su wanua ene tangu, MAWU e nanokol᷊u kal᷊awọu tau Amori kụ měmpẹ̌tẹ̌tanạ sini. Kụ i kami e mapulu mẹ̌tangkiang baugu MAWU e batụu kai i Sie Ruatang kitẹ e!”

¹⁹Bọu ene i Yosua nẹ̌bera, ”Kai i kamene aramanung tawe makaumal᷊ẹ̌ měmunara waugu MAWU, batụu i Sie kai Ruata susi, Mang Sěmbaụ Tudẹ. I Sie mạdiri kụ piạ u měngal᷊ung. Kamagengu i kamene e maněntang i Sie ringangu mẹ̌sěmpị kal᷊awọu manga ruata wal᷊ine, i Sie sarung tawe mangampung dosanu e. Arawe samurine, katewe i Sie rumokạ dingangu měhukung i kamene e. I Sie sarung mapakawinasang kamene, maningbe i Sie nạungbe mapia si kamene.”

²¹Tangu tau Israel e simimbang, ”Tala! I kami e tawe mẹ̌tangkiang baugu kal᷊awọu manga ruata wal᷊ine. I kami sarung mẹ̌tangkiang samatang baugu MAWU!”

²²Mase i Yosua e nẹ̌bera, ”Ho, i kamene hala sahidine u i kamene seng němutusu tumbạeng mẹ̌tangkiang baugu MAWU e.” ”Kahěngang bue,” angkuěng i sire, ”i kami e hala sahidine.”

²³”Kamageng kerene, sekehẹ̌ko kal᷊awọu manga ruata wal᷊ine kụ ene su tal᷊oarang kamene,” angkuěng i Yosua e, ”ringangu pěmpẹ̌kẹ̌dọe u i kamene sarung mẹ̌těngkasatia su MAWU, Ruatang Israel.”

²⁴Mase i sire ene nẹ̌bera si Yosua, ”I kami sarung mẹ̌tangkiang tumbạeng baugu MAWU, Ruatang kitẹ. I kami e sarung tumuhụ kal᷊awọu tita-Ne.”

²⁵Tangu su ěllo ene su Sikem i Yosua nẹ̌diandi su manga umatu Israel; dingangu sene i sie něngonggọu kal᷊awọu tita ringangu manga pělatorang kụ hinong pakịtuhuke si sire.

²⁶Kal᷊awọu tita ringangu manga pělatorang ene, niwohẹ e su ral᷊ungu bukẹ̌ u Titang Mawu Ruata. Wọu ene i sie něngal᷊ạ batu ghẹ̌guwạ sěmbaụ, bọu e nipararisị e su al᷊ungu kalu ghẹ̌guwạ su tampạ nihae waugu MAWU.

²⁷Masene nẹ̌berạ e i Yosua e su kěbị taumata ene, ”Batu ini nakoạ sahiding kitẹ e. Patikụ hengetang kụ piněhengetangu MAWU e si kitẹ, seng nawera su těngong batu ini. Kụ batu ini e sarung makoạ sahidi waugi kamene, mapẹ̌tahěndung i kamene tadeạu tawe lumawang Duatang kamene.”

²⁸Pěngěnsueěnge i Yosua e něndolohi sire pinakapul᷊ẹ; mase i sire kěbị e nẹ̌sul᷊e sarang ěntanan sire sěngkatau-sěngkatau.

²⁹Bọu e i Yosua anạ i Nun ěllangu MAWU ene, nate umure mahasụ mapul᷊o su taunge.

³⁰ I sie nilěbing su ěntana pusakạ e hala su Timnat-Serah su wawul᷊urangu Efraim, su sěmběkan sawěnahẹ̌ bọu Wul᷊udu Gaas.

³¹Karěngụu i Yosua e wiahẹ̌, umatu Israel měmẹ̌munara waugu MAWU. Dingangu sarangke i sie nate tangu i sire měngkate tatapẹ̌ měmẹ̌munara waugu MAWU karěngụewen su tal᷊oaran sire e wědang piạ manga těmbonange kụ seng nakasahidi hala patikụewe kinoạu MAWU e waugu tau Israel.

³² Maieti Yusupẹ̌ kụ niwawan tau Israel wọu Misirẹ̌ e nilěbing su Sikem su ěntana kụ seng niwělliang i Yakub arěgang mahasụ su kal᷊ěpane roitẹ̌ sal᷊aka wọu manga anạ i Hemorẹ̌, i amangi Sikem. Ěntana ene nipal᷊oho su hiten Yusup.

³³Bọu e i Eleazar anạ i Harun mal᷊aing nate, kụ nilěbing su Gibea, kụ kai soa kaěbakeng su wawul᷊urangu Efraim. Soa ene seng nionggọ si Pinehas anạ i Eleazar.