Read Sangir YOSUA 3 Bible Online

YOSUA 3 - Sangir bible

YOSUA 3

¹Sěngkariěllone, i Yosua ringangu kal᷊awọu umatu Israel nẹ̌bangung deng mal᷊uka-l᷊ukadẹ̌, mase naněntangu tampạu pẹ̌darasengang i sire su Sitim, dingangu nakoạ sarang Sal᷊ụ u Yordan. Sene i sire nẹ̌daseng apidu kạpěngampal᷊e tempone waugu měmpẹ̌liu.

²Nal᷊iun těllu ěllo, manga pangahạe němpělikụ kasěllahu pẹ̌darasengang i sire,

³ringangu něhabaru parenta ini su manga umatu Israel, ”Kereu i kamene makasilo manga imang měmpamasaěng Petim Pẹ̌dariandim MAWU Ruatanu, tangu i kamene lai harusẹ̌ dal᷊eng paněntangu tampạu pẹ̌darasengang ini. Tol᷊ẹe Peti ene;

⁴kai rumal᷊eng abe kararaning Peti ene; tol᷊e wọu l᷊ikude ghěnnangu sěngkilometerẹ̌ karaune. Ual᷊ingu kerene ute i kamene sarung makakasingkạu ral᷊eng kụ hinong dal᷊engang i kamene, batụu i kamene ren tawe nịdatingu wanua ini.”

⁵I Yosua nẹ̌bera su manga umatu Israel, ”Pẹ̌mpanusiko watangeng i kamene, u rịělloe MAWU sarung mẹ̌koạ tanda makạdal᷊inaụ su tal᷊oarang kamene.”

⁶Mase i Yosua něngoro su manga imang tadeạu pěhengkẹ Petim Pẹ̌dariandi ene mase pěbuạ pěngal᷊imona kawanuang Israel. I sire mal᷊ain timuhụ laorong Yosua.

⁷MAWU e něhengetang si Yosua, ”Manětạ bọu sahěllo ini i kau sarung Takụ pakakoạ taumata masěllahẹ̌ hakịu kal᷊awọu umatu Israel měngadatẹ̌ si kau ringangu makahěngang u Iạ e rụděndingang si kau kerẹewe Iạ dụděndingang si Musa.

⁸Tangú ini e oroko manga imang apang měmpạmasaěng Petim Pẹ̌dariandi e tadeạu su kal᷊ahumpại sire su sal᷊ụ e, i sire olo su sal᷊ụ ene kụ darisị su wiwihe.”

⁹Mase i Yosua nẹ̌kui tau Israel ringangu nẹ̌bera, ”Ěndaịko raringihẹ̌ apan niorom MAWU Ruatanu e si kamene.

¹⁰Kereu i kamene rumal᷊eng mesekẹ, nal᷊ahẹu MAWU e sarung měnokol᷊u tau Kanaan, Het, Hewi, Feris, Girgasi, Amori, ringangu Yebus. Dingangu su tempom Petim Pẹ̌dariandim MAWU sěnduniaěnge limiu Yordan měngal᷊imona si kamene, i kamene sarung makasilo u Ruata wiahẹ̌ e ene su tal᷊oarang kamene.

¹²Eneʼi kamene pěmileko mapul᷊o dua su kataune — sěngkatau wọu apang hěnton Israel.

¹³Kamagengu manga imang kụ mạmasaěng Petim Pẹ̌dariandim MAWU e seng nangěnsạu laede su ral᷊ungu akẹ u Sal᷊ụ u Yordan ene, tangu enggesangu akẹ e sarung mapotọ, kụ akẹ lụelehẹ̌ bọu pungene sarung matampung su tampạ sěmbaụ.”

¹⁴Su tempo ene kai orasu pamaměnsạ dingangu kerẹewe tiasa akẹ u Sal᷊ụ u Yordan kawe mělěba. Su tempon nạung tau Israel naněntangu pẹ̌darasengang i sire mědeạu lumiu Sal᷊ụ u Yordan, manga imang němpẹ̌dal᷊eng kal᷊imona kạpẹ̌masaěnge Petim Pẹ̌dariandi. Kụ su tempong manga imang ene e nangěnsạu laedi sire su ral᷊ungu akẹ u sal᷊ụ,

¹⁶su tempo ene lai enggesangu akẹ ene napontodẹ̌. Arawe rala su ul᷊un sal᷊ụ, akene kawe natampung su Adam, soa sěmbaụ su sěmběkan soang Sartan. Akẹ su tol᷊en sal᷊ụ ku lụelehẹ̌ sarang Laudẹ̌ Nate napontodẹ̌ marasai, hakịu kawanuang Israel nakakal᷊iu su wowong ěntana mamara tụtatěngo soan Yerikho. Manga imang kụ mẹ̌masaěng Petim Pẹ̌dariandi ene tatapẹ̌ be rụdarisị su tal᷊oaran sal᷊ụ sarang kal᷊awọu kawanuang Israel nahumpạu paị sěmběka.