Read Sangir YOSUA 4 Bible Online

YOSUA 4 - Sangir bible

YOSUA 4

¹Sarangke patikụ bansa e seng su sěmběkane pai, MAWU e něhengetang si Yosua,

²”Pěmileko mapul᷊o dua su kataune, pẹ̌sěngkatau wọu apang hěnto.

³Pěngoroko si sire pěngal᷊ạ batu mapul᷊o dua wọu tal᷊oaran Sal᷊ụ u Yordan, pakatumang su tampạ nirarisikangu manga imang. Oroko i sire apěmasaěng manga watu ene sarang tampạ i kamene mẹ̌dẹ̌daseng nạung su tempong hěbi.”

⁴Ene i Yosua e nẹ̌kuịe si sire mapul᷊o dua kụ napile ene,

⁵mase nẹ̌bera, ”Dakọko sarang tal᷊oarang Sal᷊ụ u Yordan, sarang těngom Petim Pẹ̌dariandin MAWU Ruatanu. Sěngkatau-sěngkatau e harusẹ̌ pẹ̌bawa watu sěmbaụ bọu tampạ ene — ene kal᷊awọe mapul᷊o dua su waụe kere kal᷊awọu hěnto su ral᷊ungu kawanuang Israel.

⁶Batu tamai ene makoạ tatahěndungang baugu wansa ini baugu apan seng nikoạ u MAWU. Su ěllo samuri kamagengu manga anạ i kamene makiwal᷊o kai apa mangal᷊ene watu tamai ini si kamene,

⁷i kamene paul᷊ịko si sire u akẹ u Sal᷊ụ u Yordan napontodẹ̌ su tempom Petim Pẹ̌dariandim MAWU e limiu sal᷊ụ ene. Manga watu tamai ene sarung sěntiniạ mapẹ̌tahěndungu tau Israel waugu apan seng nariadi sini.”

⁸I sire mapul᷊o dua ene mal᷊ain timuhụ laorom Yosua e. Natuhụ ewe kere su ahạu MAWU e si Yosua, i sire něngal᷊ạ batu mapul᷊o dua su waụe wọu tal᷊oaran Sal᷊ụ u Yordan — kal᷊awọe mẹ̌sul᷊ungu kal᷊awọu hěnto su kawanuang Israel — mase němpẹ̌bawa ene sarang tampạu pẹ̌darasengang i sire.

⁹Su tal᷊oaran Yordan ene lai, i Yosua naměllọu watu mapul᷊o dua ene nal᷊antehẹ̌ su tampạu rararisikangu manga imang měmpạmasaěng Petim Pẹ̌dariandi ene. (Batu tamai ene wẹ̌dang ene su tampạ ene sarang orasẹ̌ ini.)

¹⁰Manga imang tatapẹ̌ mạhundarisị su tal᷊oarang Sal᷊ụ u Yordan sarang i sire nasueng koạe apang niorong MAWU e si sire wọi Yosua. Ene natuhụ kere su laahạ i Musa si Yosua. Dingangu masahawụ tau Israel němpẹ̌liu Sal᷊ụ u Yordan.

¹¹Sarangke kěbị e nahumpạen sěmbẹ̌kane, manga imang kụ měmpạmasaěng Petim Pẹ̌dariandi ene dụdal᷊eng su těngon sire.

¹²Natuhụ kere niorong Musa, apan taha pẹ̌sekẹ bọu hěnton Ruben, Gad, dingangu maloara wọu hěnton Manasye, seng něngal᷊imona němpẹ̌liu sal᷊ụ.

¹³Kal᷊awọu manga esẹ piạ aghide kụ sadia mẹ̌sekẹ e 40.000 su kataune su těngon MAWU, i sire limiu sarang bimbaenge maranin Yerikho.

¹⁴Ěllo ene MAWU nẹ̌koạ kal᷊awọu hal᷊ẹ̌ makạdal᷊inaụ kụ nakariadin tau Israel měmpěngadatẹ̌ si Yosua kawe sěngkatau taumata masaria. Karěngụewen pẹ̌bawiahe i sire měmpạngadatẹ̌ si sie kere měngadatẹ̌ si Musa.

¹⁵Bọu e MAWU e rimolohi Yosua

¹⁶nẹ̌parenta manga imang apang měmpạmasaěng Petim Pẹ̌dariandi ene mẹ̌deạu suměbang bọu Yordan.

¹⁷I Yosua nẹkoạewe apan niorom MAWU e si sie.

¹⁸Kerene manga imang ene nahumpạ su wiwihu sal᷊ụ, akẹ u sal᷊ụ ene nanětạe nelehe kapia ringangu nělěba kere humotong.

¹⁹Kawanuang Israel nahumpạ su sěmběkang Yordan su tanggalẹ̌ mapul᷊o wul᷊ang humotong, kụ i sire nẹ̌daseng su Gilgal su sěmběkan daki wọu Yerikho.

²⁰Su tampạ ene i Yosua něhunsudẹ̌ batu mapul᷊o dua su waụ e kụ nial᷊ạ bọu ral᷊ungu Yordan.

²¹Mase i Yosua něbera su kawanuang Israel, ”Su ěllo ramahi kereu manga anạ i kamene měmpẹkibal᷊o mangal᷊en manga watu tamai e,

²²ute habarẹ̌ko si sire u kawanuang Israel limiu Sal᷊ụ u Yordan ini e kai su wowong ěntana mamara.

²³Pẹ̌běkeko si sire u MAWU Ruatanu e napakamarang akẹ u Sal᷊ụ u Yordan waugi kamene kěbị sarang i kamene kěbị e mahumpạu sěmběka, kerẹewe i Sie napakamarang Laudu Lěntuwu baugi kami,

²⁴mẹ̌deạu taumata su dunia e makasingkạu kai kereapa kasěllahe kawasang MAWU. Kụ ual᷊ingu ene i kamene mang měngadatẹ̌ MAWU Ruatanu e sarang karěngụ e.”