Read Sangir YOSUA 5 Bible Online

YOSUA 5 - Sangir bible

YOSUA 5

¹Kěbị datung Amori su sěmběkam bahẹ bọu Sal᷊ụ u Yordan, dingangu kěbị datung Kanaan su wiwihu L᷊audẹ̌ Tal᷊oara nakaringihẹ̌ u Sal᷊ụ Yordan seng nipakamarang MAWU karěngụeweng kawanuang Israelẹ̌ e lụl᷊iu Sal᷊ụ u Yordan ene. Tangu i sire něngkatakụ dingangu němpẹ̌kondọ ual᷊ingu tau Israel.

²Su tempo ene MAWU něhengetang si Yosua, ”Pẹ̌koạko pisọ bọu watu mase koạko l᷊ai pẹ̌sasunatẹ̌ baugu taumatan Israel.”

³Tangu i Yosua timuhụ parentam MAWU ringangu něnunatẹ̌ tau Israel su tampạ isẹ̌sẹ̌bạ Bul᷊udu Pẹ̌sasunatẹ̌.

⁴ Su tempon tau Israel siměbang bọu Misirẹ̌, kěbị manga esẹ sem bọu nisunatẹ̌. Kai piạ i sire mẹ̌pẹ̌papalilị su wanua l᷊inggi ěpạ u pul᷊o su taunge karěngụe, manga anạ i sire esẹ bědang tawe nịsẹ̌sunatẹ̌ sarang sěngkatau. Mạngěnsue tempo ěpạ u pul᷊o su taunge, manga esẹ su tempong siměbang bọu Misirẹ̌ kụ seng natimu umure hinon sumowa sordado, kěbịe seng něngkapate, ual᷊ingu tawe timuhụ titang MAWU. Tangú natuhụ kere su salung MAWU, i sire tawe nịbawala měmanda soa kụ tạ konsange apa ringangu matawa ene kụ nikẹ̌do-Ne su manga i upung i sire.

⁷Kai ual᷊ingu ene hakịu kěbị manga anạ i sire esẹ e tawe nịsẹ̌sunatẹ̌. Hěnto wuhu ini e kai seng bọu nisunati Yosua.

⁸Sarạeng i sire kěbị nasueng sunate, i sire němpẹ̌tanạ su raseng sarang lesẹ i sire něngkapia.

⁹MAWU něhengetang si Yosua, ”Ěllo ini e kal᷊ahinang kamene e nakoạ manga ěllang su Misirẹ̌ sen Takụ pinakaěmmụ.” Ual᷊ingu ene tampạ ene nisěbạ Gilgal[1] sarang orasẹ̌ ini.

¹⁰ Kạpẹ̌dẹ̌dasenge su Gilgal su wimbaenge maraning Yerikho, kawanuang Israel nẹ̌sal᷊iwang u Paskah su wawěllong tanggalẹ̌ 14 bul᷊ang ene.

¹¹Sěngkariěllone, kakěsạe i sire kimaěng kaěngu tau Kanaan kụ borotẹ̌ tawẹ kabọe ringangu gandung tinapa.

¹² Su ěllo ene lai manna seng tawe lai natěntung bọu langị, kụ tau Israel seng něngědo kimaěng manna. Nanětạ bọu ene i sire kụkaěng gěsing ěntanang tau Kanaan.

¹³Sěnsul᷊e tempo piạ i Yosua maraning Yerikho. Sěngkělěndịu i sie nakasilo sěngkatau esẹ su těngone piạ pedane wọu niasa. I Yosua himaung tau ene, kụ nakiwal᷊o, ”I kau ini hapị arau sědụ?”

¹⁴”Bal᷊inewe hapị dingangu wal᷊inewe lai sědụ,” angkuěngu tau ene. ”Iạ diměnta sini e kai mol᷊ensekẹ u MAWU.” Nakaringihẹ̌ ene i Yosua apidu nẹ̌těngkasumagẹ̌ nẹ̌suba tau ene. I Yosua nẹ̌bera, ”Iạ ini e kai ěllang Tuang. Kai apạe takụ i kakoạ baugi Tuang?”

¹⁵Molensekẹ u MAWU ene simimbang, ”Luạko sapatunu e; ěntana rẹ̌darisikangu ene kai ěntana susi.” Tangu i Yosua e něluạe sapatune.