Read Sangir YOSUA 6 Bible Online

YOSUA 6 - Sangir bible

YOSUA 6

¹Su soang Yerikho, manga tukadu soa e rẹ̌diagateng masěgadẹ̌ dingangu nitindụ pinakaěllị mẹ̌deạu tau Israel tawe makasuẹ̌. Tawẹ u sarang sěngkatau makasuẹ̌ arau makasěbangu soa ene.

²MAWU něhengetang si Yosua, ”Orasẹ̌ ini Iạ měnarakangu Yerikho ringangu ratune si kau ringangu kěbị sordadone wawahanie.

³I kau ringangu sordadonu e harusẹ̌ pẹ̌barisẹ̌ pangělikụ soa e sěnsul᷊e sehěllo karěngụeweng ěnnungu ěllo.

⁴Imang pitung katau, nahuntiạu slompretẹ̌ harusẹ̌ dumal᷊eng su těngom Petim Pẹ̌dariandi. Su ěllo kapitune, i kau ringangu manga sordadonu e harusẹ̌ mangělikụ soa ene pitu sul᷊e těntal᷊ang manga imang kạpẹ̌niụe slompretẹ̌.

⁵Bọu e manga imang e harusẹ̌ měmpěniụ slompreti sire kụ tingihe pakanandu. Sěngapang i kamene makaringihẹ̌ tingihu slompretẹ̌ ene, kěbị sordado e harusẹ̌ pěmpẹ̌gio pakaihạ-ihạ, tangu meselu soa e mahaka. Mase i kamene kěbị hinong apidu suẹ̌ su soa ene.”

⁶Tangu i Yosua nẹ̌kui manga imang ku nẹ̌bera, ”Hengkẹ e Petim Pẹ̌dariandi ene, kụ pitung katau wọu tal᷊oarang kamene harusẹ̌ dal᷊eng su horone kạpěngumpaede slompretẹ̌.”

⁷Mase i Yosua něngoro sordadone pinẹ̌barisẹ̌ pangělikụ soa ene, lẹ̌ahakengu wuntuangu měndal᷊ukadẹ̌ kụ mạngal᷊imona Petim Pẹ̌dariandiʼm MAWU e.

⁸Timuhụewe parentan Yosua tangú nẹ̌buạ e wuntuangu měndal᷊ukadu horone něngal᷊imona manga imang měnaniụ slompretẹ̌, tẹ̌tol᷊eěngu manga imang měmamasaěng Petim Pẹ̌dariandi, wọu ene niperone ringangu wuntuangu měndal᷊ukadu likude. Těntal᷊ang i sire kạdal᷊enge, slompretẹ̌ měngkai sěntiniạ ipạhěte.

¹⁰Kal᷊awọu sordado e seng nipaul᷊ikangu kumbahang měmpẹ̌gio ringangu kumbahang měmpěluang bawera manga sarang sěmpědi kamagengu i Yosua ren tawe něngẹ̌ngoro apa.

¹¹Kerene i Yosua něndolohu manga sordadone pẹ̌bẹ̌bawa Petim Pẹ̌dariandi pěngělikụ soa ene sěnsul᷊e, bọu ene pẹ̌sul᷊e kapia su pẹ̌darasengang kụ pětẹ̌tikị sene.

¹²Sěngkarịěllone reng mal᷊uka-l᷊ukadẹ̌, i Yosua nẹ̌bangung kụ su karua sul᷊ene manga imang dingangu sordado němpẹ̌barisẹ̌ nangělikụ soa ene timol᷊e uhụu barisang kere sěhěllo napaghohẹ̌: humotong tangú barisangu měndal᷊ukadẹ̌ horone, bọu ene i sire pitu manga imang měnaniụ slompretẹ̌, tol᷊eěngu manga imang měmamasaěng Petim Pẹ̌dariandi, mase pěngěnsueěnge barisangu měndal᷊ukadẹ̌ likude. Těntal᷊ang ene tangú slompretẹ̌ kạtatanạ apạhěte.

¹⁴Su ěllo karuane ene i sire nělikụ soa sěnsul᷊e mase němpẹ̌bal᷊ị sarang pẹ̌tatanakeng. Kerene nikoạ i sire ěllo-ěllo karěngụu ěnnungu ěllo.

¹⁵Su ěllo kapitune i sire němpẹ̌bangung deng mal᷊uka-l᷊ukadẹ̌ piạe matangěllo wuhụe su sěnnang, mase němpẹ̌barisẹ̌ pitun sul᷊e mangělikụ soang Yerikho ene ringangu kakakoạe mẹ̌sul᷊ung. Kětạeng su ěllo kapitune ene samatang, i sire nělikụ soa ene pitu sul᷊e.

¹⁶Su kapitun sul᷊ene, sěngapang manga imang něniụ slompretẹ̌ e, i Yosua něngoro su kal᷊awọu wuntuangu sordado e pẹ̌gẹ̌gio. I Yosua nẹ̌bera, ”MAWU seng něnarakang u soa ini si kamene!

¹⁷Kasěllahu soa ini ringangu kal᷊awọu lohone harusẹ̌ i pakaupu tawẹ lěmbene makoạ sasěmba su MAWU. Kětạeng i Rahab, bawine tahapẹ̌sundal᷊ẹ̌ ene ringangu manga anạ u sěngkataune botonge i wala wiahẹ̌, ual᷊ingu i sie seng nẹ̌tul᷊ungu mẹ̌papahimang i kitẹ.

¹⁸Kumbahang měngal᷊ạ apa-apa wọu kěbị apang kụ ipakawinasa. Kereu i kamene měngal᷊ạ tangú pẹ̌darasengangu Israel sarung masilakạ dingangu kahinoěngu hombang.

¹⁹Kal᷊awọu apal᷊iwụ sal᷊aka, wul᷊aeng, tambaga, ringangu uase harusẹ̌ i tani waugu MAWU, dingangu i resọ su tampạu pěndaresokangu arětạu MAWU.”

²⁰ Bọu ene manga imang němpěniụ slompreti sire. Kụ sarětạeng tau Israel nakaringihẹ̌ tingihu slompretẹ̌ e, i sire němpẹ̌giọe maihạ-ihạ, kụ bọu ene meselu soang Yerikho e nahaka. Kal᷊awọu sordadong Israel apidu naawị, mase němpẹ̌suẹ̌ su soa ene kụ nẹ̌kawasa.

²¹Patikụ apang su ral᷊ungu soa ene, maghurang arau mangudạ, esẹ bawine, nịpotọu peda. Kal᷊awọu binatang, sapi, domba ringangu kalide mal᷊aing nipate.

²²Kụ si rẹ̌dua apang nakoạ mẹ̌papahimang, angkuěng i Yosua, ”Dakọko sarang bal᷊en tau wawine tahapẹ̌sundal᷊ẹ̌ e paringangko i sie apasẹ̌bang dingangu ral᷊ohom bal᷊ene kerẹewe seng nikědong kamene si sie.”

²³Tangú i rẹ̌dua mẹ̌papahimang ene e natamai, kụ němaringang si Rahab niapasẹ̌bang dingangu i amange, i ninange, manga anạ u sěngkataune, ringangu walage lai wal᷊ine. Patikụ balagi Rahab ene ringangu manga ěllange niapasěbang sarang tampạ mal᷊enehẹ̌ maraning pẹ̌darasengangu Israel.

²⁴Bọu ene sordadong Israel němpanutung kěbị dal᷊ohong soa ene, ringangu patikụ apang su ral᷊unge, tabeạu katewe apal᷊iwụ bul᷊aeng, sal᷊aka, tambaga ringangu uase. Apal᷊iwụ tamai ene nial᷊ạ i sire kụ niwawa sarang tampạu pěndaresoěngu arětạu MAWU.

²⁵ Kai i Rahab bawine tahapẹ̌sundal᷊ẹ̌ ene ringangu patikụ balage niwala wiahẹ̌ kahiang Yosua, ual᷊ingu i sie seng nẹ̌tul᷊ung i rẹ̌dua mẹ̌papahimang kụ seng nirolohi Yosua sarang Yerikho. (Sarang orasẹ̌ ini hěnton Rahab bědang biahẹ̌ su Israel.)

²⁶ Su tempo ene i Yosua něsěding kere ini, ”Baewe i sai kụ mapulu mělanging soang Yerikho ini e sarung kahinoěngu laaneng MAWU. I saing maměllọu pondasine sarung kailangengu anạe i akang; dingangu i saing kụ měnangẹu manga tukadu soa ene sarung kailangengu anạe katuariange.”

²⁷MAWU e rụděndingang si Yosua, kụ arengi Yosua e měngkatewe timeleng su kasěllahu soa ene.