Read Sangir YOSUA 7 Bible Online

YOSUA 7 - Sangir bible

YOSUA 7

¹MAWU e seng nẹ̌parenta su kawanuang Israel u wọu patikụ sabarang su soang Yerikho kụ hinong i pakawinasa, manilaing sarang sěmbaụ tawe wotonge al᷊akeng. Kaiso parenta ene tawe nituhukang. Sěngkatau esẹ arenge i Akhan limawang parenta ene, hakịu MAWU měngkate apa limangehẹ̌ su kawanuang Israel. (I amang i Akhan arenge i Karmi ringangu i upunge arenge i Zabdi wọu ghal᷊ipohong Zerah su ral᷊ungu hěnton Yehuda.)

²Su Tempo ene i Yosua něndolohu pirang katau wọu Yerikho sarang Ai, kụ kai soa sěmbaụ su sěmběkan daki wọu Betel, maraning Bet-Awen. I sire ene nirolohẹ̌ tadeạu apẹ̌kẹ̌koto wanua ene. Bọuten i sire nẹ̌koạ hal᷊ẹ̌ ene

³i sire němpẹ̌bal᷊ị kụ naul᷊ị si Yosua. I sire nẹ̌bera, ”Tawahal᷊uasu i kitẹ kěbị tamai měnekẹ Ai. Pěndoloheng manga rua hiwu arau těllu hiwu su kataune. Abe pěndingọu kěbị sordado tamai pẹ̌sekẹ, u soa ene kai kẹ̌tạeng soa kadodọ.”

⁴Kụ i sire tamai nẹ̌sekẹ su soa ene kětạeweng těllu hiwu su kataune, kaiso i sire kawe nikaansuhẹ̌ sarang němpẹ̌sohọ.

⁵Taumatang Ai němpěnahusu si sire wọu pasěllangengu soang Ai sarang ěntanang pěngangal᷊iang manga wul᷊aeng bọu ene němate manga těllum pul᷊o ěnnung su kataune wọu tal᷊oaran sire su wěntihe. Tangu tumatang Israel gimiantang dingangu něngkatakụ.

⁶I Yosua ringangu manga těmbonangu kawanuang Israel něngkasusa naung i sire hakịu němpěnggaghehẹ pakeang i sire, ringangu kanandung ěllo sarang hẹ̌bi i sire nẹ̌tumpěkuhẹ̌ su tengom Petim Pẹ̌dariandim MAWU kụ němpěnawuhu awul᷊e su těmbọ i sire tialang susanaung.

⁷I Yosua nẹ̌bera su MAWU, ”O Ruata MAWUku! Kai waugu apa i Kau něngahạ i kami sarang sěmběkang Yordan ini? Arau kai waugu měnarakang i kami su tau Amori? Tadeạu i kami mate? Mạpiangbe i kami matanạ sene, su sěmbẹ̌kan Sal᷊ụ u Yordan!

⁸O MAWU! sědụ seng něnekehẹ̌ pinakasohọu taumatang Israel. Kụ ini e apạe takụ ipẹ̌bera?

⁹Tau Kanaan dingangu patikụ taumata wal᷊ine su wanua ini sarung makaringihẹ̌ hal᷊ẹ̌ ene. I sire sarung měhěgạ dingangu měmate si kami kěbị! Mase kai apạe sarung koatengu waugu mẹ̌tahutěndạu kawawantugʼU tangu?”

¹⁰MAWU simimbang si Yosua, ”Pẹ̌bangungke! Tawẹ apa gunane i kau mẹ̌těngkasumagẹ̌ kerene su ěntana!

¹¹Tau Israel seng němpẹ̌dosa. Iạ seng bọu nẹ̌parenta tadeạu i sire pěngikịbe pẹ̌dariandi su tal᷊oaran sire ringang-Ku, kaiso i sire kawe limampa ene. Manga apal᷊iwụ kụ hinong ipakawinasa seng nial᷊ạ i sire. I sire němpẹ̌tako ringangu němpěmuni su tal᷊oarang apal᷊iwụ i sire tadeạu tawe kasingkateng.

¹²Kai ual᷊ingu ene hakịu i sire tamakatohạ tumatěngo sědụ i sire. I sire nisekehu sědụ ual᷊ingu i sire hala mal᷊aing seng niěnsakengu hukumang mẹ̌deạu ipakawinasa. Iạ e sen tawe saụ tumaking si kamene, kereu apal᷊iwụ kụ tawe wotonge al᷊akeng ene e tawe nilẹ̌upu.

¹³Kụ ini e pẹ̌bangungke Yosua! Susiko umatu Israel dingangu pěngoroko si sire pẹ̌sasadia pẹ̌těngong Iạ. Parentaiko i sire pẹ̌dariahi rịěllo, u Iạ e kai MAWU Ruatang Israel sarung měhabaru ini si sire: ’Ei tau Israel! Apal᷊iwụ kụ seng Takụ nioro si kamene pakirěmmẹ, sěnggạ e wẹ̌dang si kamene. Těntal᷊ang i kamene reng tawe něnděmmẹu apal᷊iwụ ene, i kamene ren tawe makatohạ dumokạ sekẹ!’

¹⁴Ual᷊ingu ene, Yosua, paul᷊ịko si sire u rịěllo mal᷊ukadẹ̌ i sire sarung parikẹ̌saěng hěnto lawọ hěnto. Kereu Iạ měněbọu hěnto sěmbaụ, ute kěbị gal᷊ipoho su ral᷊ungu hěnto ene harusẹ̌ tumol᷊ọ gal᷊ipoho lawọ gal᷊ipoho. Dingangu kereu Iạ měněbọu gal᷊ipoho sěmbaụ, ute kěbị balagẹ̌ su ral᷊ungu hěnto ene harusẹ̌ tumol᷊ọ balagẹ̌ lawọ balagẹ̌. Bọu ene kereu Iạ měněbọ u walagẹ̌ sěmbaụ, tangu sěngkatau-sěngkatau e su ral᷊ungu walagẹ̌ ene harusẹ̌ tumol᷊ọ sěngkatau-sěngkatau.

¹⁵Mase taumata kụ nitěbọ dingangu nal᷊ahẹu kawe něndesọu apal᷊iwụ isẹ̌sẹ̌ding ene hinong tutungang pakasue sěngkatutung dingangu walage ringangu kal᷊awọu sabarang tẹ̌taghuanenge; batụu kai seng i sie limampa pẹ̌dariandi ringangu nẹ̌koạ karal᷊akisẹ̌ masaria su tal᷊oaran tau Israel.”

¹⁶Sěngkariěllone mal᷊uka-l᷊ukadẹ̌, i Yosua něngoro umatu Israel apạtol᷊ọ sarang těngone, ghal᷊ipoho lawọ ghal᷊ipoho, tangu ghal᷊ipohong Yehuda e kinahinoěnge.

¹⁷Mase i Yosua něngoro hěnton Yehuda apạl᷊iu sarang horone gal᷊ipoho lawọ gal᷊ipoho, kụ gal᷊ipohong Zerah e kinahinoěnge. Bọu ene ghal᷊ipohon Zerah e nioro apạl᷊iu sarang horone, balagẹ̌ lawọ balagẹ̌, kụ balagi Zabdi e kinahinoěnge.

¹⁸Bọu ene i Yosua něngoro walagi Zabdi apạ kakoạ sarang horone, sěngkatau-sěngkatau, tangu i Akhan, anạ i Karmi, pulung i Zabdi e kinahinoěnge.

¹⁹I Yosua e nẹ̌bera si Akhan, ”Anạku, pěngakụ e ringangu pẹ̌bera pakal᷊ahẹ sini su těngon MAWU, Ruatang Israel, apan seng nikoạ u. Paul᷊ịko si siạ, abe wuni.”

²⁰”Těngadẹ̌,” angkuěng i Akhan, ”Iạ seng nẹ̌dosa su těngom MAWU, Ruatang Israel. Kai ini e takụ nịkakoạ:

²¹Sutal᷊oarang apal᷊iwụ kụ nipul᷊ahong kitẹ, iạ nakasilo kakingkaeng sěmbilang kụ mal᷊ěnggihẹ̌ kahěngang, koạu Babilonia, kerene lai sal᷊aka manga pirang duang kilo, ringangu wul᷊aeng sěmpědi něngalembo wọu sitengang kilo. Iạ e mambeng mẹ̌měnningu apal᷊iwụ ene, tangu iạ e něngal᷊ạ dingangu němuni su ral᷊ungu ěntana su katatanakengku; sal᷊akane kạpapěllọ su al᷊unge wawa kahěngang.”

²²Bọu e i Yosua masahawụ-sahawụ něndingọu taumata sarang tentang Akhan. Kutẹu nạung apal᷊iwụ ipẹ̌sẹ̌sasěding e, kěbị kawe ene paị sene, niwuni su ral᷊ungu ěntana, ringangu sal᷊akane ene wawa su wal᷊ahuange kahěngang.

²³I sire něngal᷊ạ kal᷊awọu apal᷊iwụ ene kụ niwawa su anung Yosua ringangu patikụ taumatang Israel. Mase apal᷊iwụ ene nipěllọ su těngom MAWU.

²⁴Bọu e i Yosua ringangu kal᷊awọu kawanuang Israel němpěnamẹ si Akhan, ringangu nẹ̌bawa si sie sarang Bal᷊ang Kasasusa sěngkawawa ringangu manga anạ e, sapi, kalide, domba, tenta, ringangu kěbị tẹ̌taghuanenge ore lai sal᷊aka, kakingkaeng dingangu wul᷊aeng nitakone.

²⁵Wọu e angkuěng i Yosua e si Akhan, ”Unụe i kau kawe napakahombangu susa si kitẹ? Orasẹ̌ ini e MAWU sarung maparěntan susa e si kau!” Tangu i Akhan dingangu ral᷊ohom bal᷊ene niwahungangu watu sarang nate kahiang kal᷊awọu taumatang Israel. Kal᷊awọu arětạ tataghuanenge, dingangu l᷊ai apal᷊iwụ tinakone e nasue natutung.

²⁶Bọu ene i sire něngambung tampạ ene ringangu watu mal᷊awọ-lawọ kụ sarang orasẹ̌ ini watu ene e wẹ̌dang ene paị sene. Ual᷊ingu ene tampạ ene wẹ̌dang isẹ̌sẹ̌bạ Bal᷊ang Kasasusa. Tangu nal᷊edạ e ral᷊angehu MAWU.