Read Sangir YOSUA 8 Bible Online

YOSUA 8 - Sangir bible

YOSUA 8

¹MAWU něhengetang si Yosua, ”Komol᷊ẹ̌ko kěbị sordadonu, kụ dakọko tamai ringang i sire sarang Ai. Abe ghěnggang dingangu abe katakụ! Iạ sarung mapakariading kamene makauntu su ratung Ai. Kawanuane, soane, dingangu wanuane, sarung pẹ̌kawasaěng i kamene.

²Ai ringangu ratune harusẹ̌ koạu mẹ̌sul᷊ungu kere i kau nẹ̌koạ Yerikho ringangu ratune kal᷊amona. Kai sěnsul᷊e ini manga apal᷊iwụ e ringangu manga binatang e botonge al᷊ạ i kamene kụ koạ tataghuaneng i kamene. Pěmpẹ̌dariahị e pěngalo soa ene kụ likosẹe wọu l᷊ikude.”

³Tangu i Yosua nẹ̌dariahi mědeạu tamai sarang Ai ringangkeweng kal᷊awọu sordadone. I sie němile 30.000 su kataune mẹ̌sasekẹ mapapia, mase něndolohi sire su tempong hěbi,

⁴ringangu timanata kere ini si sire, ”Pěmpẹ̌kěmbuni su sěmběkan soa ene, kai abe tumanịu kararau, kụ pẹ̌dariahị e pẹ̌sekẹ.

⁵Tangu iạ e ringangu taumataku e měndani soa ene. Kereu taumatang Ai suměbang kụ dumokạ si kami ute i kami mẹ̌bal᷊ị tumal᷊ang kerẹewe kal᷊imona.

⁶I sire sarung měmpanahusu si kami turusẹ̌ sarang maraun soa ene, kụ mạngiral᷊ingu i kami kawe timal᷊angu watangeng i kami e kere kal᷊imona.

⁷Kụ su tempo ene i kamene harusẹ̌ pěmpẹ̌sěbang bọu tampạu pẹ̌kakěmbuniang i kamene, dingangu pěmul᷊aho soa ene. MAWU Ruatanu sarung manarakangu ene si kamene.

⁸Bọutem měmul᷊aho e tutungke soa ene, kere seng niorong MAWU. Ene kai hal᷊ẹ̌ i kamene.”

⁹Bọu ene i Yosua něndolohi sire, kụ i sire němpẹ̌kěmbuni su sěmběkam bahẹ bọu Ai su wěllạu Ai ringangu Betel, mase měngampal᷊ẹ̌ sene. Kaiso i Yosua e něhědang su pẹ̌darasengangu kawanuang Israel.

¹⁰Mal᷊uka-l᷊ukadẹ̌ i Yosua e nẹ̌pẹ̌tị dingangu nẹ̌parenta wuntuange niapẹ̌komol᷊ẹ̌. Mase i sie ringangu manga těmbonangu kawanuang Israel nẹ̌bawa wuntuang ene sarang Ai.

¹¹Wuntuang ene ringangkewen Yosua e rimal᷊eng nẹ̌timona tukadu pasěllangeng humotong su soang Ai, mase nẹ̌daseng su sěmběkan sawěnahẹ̌ suapang kẹ̌kaẹ̌bakeng bẹ̌dạe sěmbaụ su wěllại sire ringangu soa ene.

¹²Piạ u manga 5.000 su kataune seng nioro pẹ̌kẹ̌kěmbuni su sěmběkam bahẹ bọu soa ene, su wěllạu Ai ringangu Betel.

¹³Kụ hundugu wuntuangu mẹ̌sasekẹ ene niatorẹ̌ kere ini: tampạ pẹ̌kakomol᷊ang kahumotongange nipěllọ su sěmběkan sawěnahẹ̌ bọu soa ene ringangu wuntuange wal᷊ine ute su sěmběkam bahẹ, arawe i Yosua ute nakoạ sarang bẹ̌dạe sěhěbi ene.

¹⁴Ene ratung Ai nakasilo taumatang Yosua e, masahawụ-sahawụ i sie nẹ̌kakanoạ. I sie ringangu kal᷊awọu taumatane nahunsěbang sarang bal᷊ang Yordan mẹ̌deạu mẹ̌sekẹ u tau Israel su tampạ kal᷊imona. I sie wẹ̌ga wue u seng tạ kạděngụe lai i sie sarung likosang bọu l᷊ikude.

¹⁵I Yosua ringangu taumatane měllewe tabidạu kạsohọe, i sire mạhuntal᷊ang mẹ̌tẹ̌timona wanua něhangu.

¹⁶Kal᷊awọu manga esẹ su soang Ai nasueng bal᷊ongkange pěnẹ̌nahusu si Yosua ringangu wuntuange. Kai mangkeng i sire manahusu si Yosua e, mangkenglai kakạdaune i sire wọu soan sire.

¹⁷Kěbị taumata su Ai němpẹ̌sěbang mědeạu měnahusu tau Israel, hakịu soa ene niwala kawawualage kerene tawẹ apa měndal᷊ukade.

¹⁸Bọu e MAWU e něhengetang si Yosua, ”Tẹ̌dẹe těkingu kụ leangke pẹ̌timona Ai; kụ soa ene Takụ isarakang ini e si kau.” I Yosua e timuhụ parentang MAWU ene.

¹⁹Ene i Yosua něhengkẹen takiahe, kụ buntuange nạung měmpẹ̌kẹ̌kěmbuni e měngkate apa lighạ nẹ̌bangung dingangu něngalo su soa ene, kụ nakapul᷊aho soa. Apidu nitutung i sire soa ene.

²⁰Taumatang Ai nẹ̌bihu sarang likude, kụ nakasilo tipu tụtiowol᷊ẹ̌ sarang langị. I Yosua ringangu wuntuange lai nakasilo tipu ringangu nakahěngang u wuntuange lai wal᷊ine e seng nakapul᷊aho soa ene. Kụ nẹ̌sul᷊ẹe i Yosua ringangu wuntuange baugu měngalo ringangu měmate taumatang Ai. Taumatang Israel su soang Ai ene mal᷊aing diměnta ringangu simekẹ dingang, hakịu taumatang Ai nal᷊iwung kụ tawe makatal᷊ang. Tawẹ u sarang sěngkatau wọi sire nakatal᷊ang, kěbịe nasue nipaten tau Israel,

²³tabeạu katewe ratung Ai. I sie nisamẹ mase niwawa nipẹ̌těngon Yosua.

²⁴Sarạeng buntuangu Israel nakapate kal᷊awọu sordadon sekẹ apan němpěnahusu si sire su wanua něhangu, nẹ̌sul᷊ẹe i sire sarang Ai, dingangu němpěmate kěbị taumata paị sene.

²⁵I Yosua měngkate turusẹ̌ mạněde těkinge itẹ̌tarange sarang Ai dingangu tawe nipal᷊intụe sarang tau Ai e nasue něngkapate. Su ěllo ene lai tau Ai e nasue nate — kal᷊awọe 12.000 su kataune, esẹ dingangu wawine.

²⁷Binatang dingangu manga apal᷊iwụ nipul᷊aho su soa ene, nial᷊ạ i sire tau Israel nakoạ tataghuaneng i sire, natuhụ kerẹewe piněhengetangu MAWU e si Yosua.

²⁸I Yosua něnutung Ai, dingangu niwalane nakoạ lěmben tutung sarang orasẹ̌ ini e.

²⁹Datun soa ene niwiting su papasị kụ niwala sene sarang bawěllo. Ene sarangke matangěllo simědạe, i Yosua něngoro taumata pinělintụ maietẹ̌ ene ringangu piněnděmẹ maietẹ̌ ene su těngom pasěllangengu soa e. Bọu ene tampạ ene niambungangu watu mal᷊awọ-l᷊awọ. Kal᷊awọu watu ene wẹ̌dang ene sarang orasẹ̌ ini.

³⁰ Bọu e i Yosua němangung pananěmbaěng sěmbaụ su Wul᷊udu Ebal baugu MAWU, Ruatang Israel.

³¹ Pananěmbaěng ene e nikoạe timuhụ atore su ral᷊ungu Bukẹ̌ i Musa, ěllangu MAWU ene, su tau Israel: ”Pananěmbaěng sěmbaụ bọu manga watu kụ deng tawẹ běke nikoạu manga pakakasẹ̌ uase.” Su wowong pananěmbaěng ene tau Israel něnarakang su MAWU: sasěmba tẹ̌tutungang, dingangu l᷊ai sasěmbam pẹ̌daramen sire.

³²Su tampạ ene, kụ nisahidiangu tau Israel, i Yosua němohẹ̌ su manga watu pananěmbaěng ene salinangu manga titam MAWU kụ kẹ̌kaěbakeng su bukẹ̌ i Musa.

³³ Kawanuang Israel dingangu manga těmbonange, pěrwira, mělahukung, dingangu l᷊ai taumata raghị kụ mạtanạ su tal᷊oaran sire, mạhundarisị su ruam běka mạngiral᷊ung Petim Pẹ̌dariandim MAWU tụtatěngo manga imang u Lewi měmpạmasaěng Petim Pẹ̌dariandi ene. Sitenga wọi sire tụtatěngo Wul᷊udu Gerizim, ringangu sitenga lai tụtatěngo Wul᷊udu Ebal. I Musa ěllangu MAWU ene, seng nẹ̌parenta tadeạu i sire pẹ̌koạ hal᷊ẹ̌ ene kereu midating tempone waugi sire makatarimạ al᷊amatẹ̌ kụ seng niriandin MAWU.

³⁴Bọu e i Yosua nẹ̌basa pinakaihạ-ihạ patikụ tita mạbawohẹ su ral᷊ungu Bukẹ̌ u Tita, nasowa l᷊ai manga al᷊amatẹ̌ dingangu manga l᷊aane.

³⁵Apan titam Musa wẹ̌basaěng i Yosua su kal᷊awọu umatu Israel kụ mạtatampung sene, nasowa manga wawine, manga rariọ, taumata raghị kụ mạtanạ su tal᷊oaran sire.