Read Sangir YOSUA 9 Bible Online

YOSUA 9 - Sangir bible

YOSUA 9

¹Habaru kal᷊auntungu tau Israel nakeke su kěbị datu su sěmběkam bahẹ bọu Sal᷊ụ u Yordan — su wawul᷊urange, su manga pentọu wul᷊ude, dingangu su wal᷊ane kanandung daruruhangu Laudu Tal᷊oara, sarang karaung Bul᷊udu Libanon su sěmběkan sawěnahẹ̌; kụ kai manga ratung Het, Amori, Kanaan, Feris, Hewi, ringangu Yebus.

²Kal᷊awọu manga ratu ene, sěngkanaung nasěmbaụ mẹ̌deạu sumekẹ si Yosua ringangu kawanuang Israel.

³Arawe tau Gibeon bọu wansan Hewi e seng nakaringihẹ̌ apan nịkakoạ i Yosua e su Yerikho, ringangu Ai.

⁴Mase i sire nẹ̌kakire mědeạu měngakal᷊ẹ̌ si Yosua ringangu nělěngkangu lurang su wowong kaliden sire: manga karong těbe, ringangu manga tatahoěngu anggorẹ̌ daral᷊aị nikoạ bọu pisị. Dingangu nakoạ kere sinasạ, nisadian sire borotẹ̌ mamara kụ seng piạ bungane.

⁵I sire něluheng pakeang i sire naghaghonaị dingangu sapatun sire seng tẹ̌be ringangu napenẹu tatampale.

⁶Dingangu kakakoạ i sire kerene, i sire tamai nẹ̌sombangi Yosua su katatanakeng su Gilgal bọu e nẹ̌bera si sie ringangu su tau Israel, ”I kami e narěnta wọu tampạ marau kụ mapulu mẹ̌koạ pẹ̌dariandi ringangu manga tuang.”

⁷ Arawe tau Israelẹ̌ e nẹ̌bera, ”Kai waugu apa i kami němato pẹ̌dariandi ringangi kamene? Aramanung katatanakeng i kamene e marani wue tamaị sini!”

⁸I sire nẹ̌bera, ”I kami e měngkai mal᷊uasẹ̌ walạewe měnsang mẹ̌koạ a kerẹewe parentan Tuang.” ”I sai tangu i kamene? Dingangu wọu wanua sude?” kakiwal᷊ong Yosua si sire.

⁹I sire simimbang, ”I kami e riměnta wọu wanua marau kahěngang Tuang!, batụu i kami nakaringihẹ̌ habaru mạanung MAWU Ruata i sẹ̌sěmbang manga tuang. I kami nakaringihẹ̌ kěbị apang kinoạʼE su Misirẹ̌,

¹⁰ dingangu apang kinoạʼE si rẹ̌dua ratung Amori su sěmběkan daki wọu Sal᷊ụ u Yordan, kụ i Sihon datung Hesybon ore lai i Og datung Basan kụ mạtanạ su Asytarot.

¹¹Apang pangahạ e ringangu patikụ tumanạu wanuang kami něngoro si kami pẹ̌děndiahi sinasạ baugu mẹ̌buạ sarang ini mẹ̌sombang u manga tuang, ringangu mělahẹu i kami e rụdaringihẹ̌ su manga tuang. Ual᷊ingu ene, i kami e mẹ̌gẹ̌gausẹ̌ karal᷊ondon naungu manga tuang měmato pẹ̌dariandi ringang i kami.

¹²Kěnangko i Tuang sire pěmanda, borotẹ̌, sinasạ i kami ini. Piạ i kami nẹ̌buạ, borotẹ̌ ini wẹ̌dang matětị. Arawe ini e pěmandạ e! Seng namara ringangu nẹ̌bunga.

¹³Ringangu manga kawihu anggorẹ̌ ini wẹ̌dang buhu su tempong nilohoěng i kami; arawe ini e kakěllạe! Seng naghaghonaị. Pakeang i kami ringangu sapatung kami selain naghagholang ual᷊ingu raral᷊eng kụ marau ini e.”

¹⁴Tangú tau Israel nakatarimạ kaěngu tau Gibeon ene kạdodọ, dingangu tawe nakiwal᷊o su MAWU mạanung hal᷊ẹ̌ ene.

¹⁵I Yosua němato rianding pẹ̌dal᷊ahapị dingangu tau Gibeon ene, ringangu kimire waugu tawe měmate si sire. Měngangahạ tau Israel mal᷊ain nẹ̌salu kụ tawe maněhụ pẹ̌dariandi ene.

¹⁶Kutẹu kawe nal᷊ahẹ, u su ěllo katěllune samurin pẹ̌dariandi ene kinoạ, tau Israel seng nakaratingu soang Gibeon, Kefira, Beerot, dingangu Kiryat-Yearim su wanuang sire ene. Tangu wuhụe kinasingkateng u tampạ katatanakeng i sire kai nạung maraning Gilgal.

¹⁸Arawe tau Israel tawe makapěmate si sire, batụu měngangahạu Israel seng němpẹ̌salu si sire su arengu MAWU Ruatang Israel. Patikụ umatu Israel sụsimbulungu hal᷊ẹ̌ ene su manga pangahạ i sire.

¹⁹Arawe patikụ pangahạ ene kawe němpẹ̌simbang, ”Kai mẹ̌koạ kere a! I kami e kawe seng bọu nẹ̌diandi si sire kạsalune su arengu MAWU Ruatang Israel. Orasẹ̌ ini e i kitẹ tawe wotonge mẹ̌koạ dal᷊akisẹ̌ si sire.

²⁰I kitẹ tawe wotonge měmate si sire batụu i kitẹ seng bọu nẹ̌diandi kụ kereu i kitẹ kawe mělanda kire ene ute Ruata e sarung měhukung i kitẹ.

²¹Kụ balạe i sire pẹ̌biahẹ̌, arawe i kitẹ kěbị mapakariadin sire kěbị e měmamengesẹ̌ kalu, měmamikul᷊ẹ̌ akẹ baugi kitẹ kěbị.” Kerene seng lẹ̌ansangengu apang měngangahạ e ene.

²²Mase tau Gibeon ene nikuiang pẹ̌těngon Yosua. I Yosua nẹ̌bera, ”Kawe unụe i kamene něngakal᷊ẹ̌ si kami kụ nẹ̌bera u wanuanu e marau kahěngang, sumbal᷊iau kětạemben sini?

²³Ual᷊ingu i kamene kawe nẹ̌koạ kerene, Duata e měhukung i kamene. Bansanu e měngkai hanesẹ̌ mạkoạ ěllang, měmamengesẹ̌ kalu, ringangu měmamikul᷊ẹ̌ akẹ u Wal᷊en Duataku.”

²⁴I sire simimbang, ”I kami nẹ̌koạ kerene ual᷊ingu i kami e nakaringihẹ̌u MAWU Ruata nạung sẹ̌sěmbaěng i Tuang ene e seng něndolohi Musa ěllangʼE ene, něngonggọu wanua ini kěbị si Tuang dingangu měmate kal᷊awọu tumanạ e su tempong i Tuang měngal᷊ạ banua ene. I kami e matakụ takụ kereu i kami e pateěng, u kai ual᷊ingu ene i kami e nẹ̌koạ kěbị ini e.

²⁵Orasẹ̌ ini e i kami kai su ral᷊ungu kawasan Tuang. Pẹ̌koạ e si kami e tuhụ kasingkạ i Tuang e mapia.”

²⁶Tangu ini e seng nikoạ i Yosua: i sie naněntanudẹ̌ si sire ringangu tawe napakawalan tau Israel měmate si sire.

²⁷Arawe i sire kinoạe ěllang — kụ měmamengesẹ̌ kalu, ringangu měmamikul᷊ẹ̌ akẹ baugu tau Israel, ringangu waugu pananěmbaěngu MAWU. Sarang orasẹ̌ ini e i sire wẹ̌dang mẹ̌kẹ̌koạ hal᷊ẹ̌ ene, su tampạ kụ nipilen MAWU nakoạ tampạ u pẹ̌kakal᷊iomanengang baugi sie.