Read Sangir 2 TESALONIKA 1 Bible Online

2 TESALONIKA 1 - Sangir bible

2 TESALONIKA 1

¹ Manga anạ u sěmbaụ dal᷊ohon jamaatʼu Tesalonika, nakoạ dal᷊ohon jamaatu Mawu Ruata i Amang i kitẹ e ringangu Mawu Yesus Kristus! I kami těllu, i Paulus, Silas dingangi Timotius,

²ghụgahiorọu karimạko Ruata i Amang dingangu Mawu Yesus Kristus měngonggọu al᷊amatẹ̌ dingangu karal᷊unsemahẹ̌ si kamene.

³Manga anạ u sěmbaụ, i kami e mang hinong hanesẹ̌ makitarimakasẹ su Mawu Kasěllahenge ual᷊ingu i kamene. Kụ mambeng hinone i kami e mẹ̌koạ kerene, u i kamene mangkeng kạpahuntinambane mangimang si Kristus, ringangu i kamene mangkeng mẹ̌kakakěndagẹ̌ sěmbaụ dingangu wal᷊ine.

⁴Kai ene hakịu kawe unụe i kami e měngkai mạhumbisarang kamene sěntiniạ tempo, i kami mẹ̌tiwo manga jamaatʼu Mawu. Dingangu karal᷊uasẹ̌ i kami mẹ̌běkeng kamene u tatapẹ̌be makuatẹ̌ mangimang si Kristus su ral᷊ungu tatingkaị dingangu tatumbiagẹ̌ kẹ̌kahombangeng i kamene.

⁵Kụ seng sini e nal᷊ahẹ u apạ e kạadile pělahukung u Ruata: I kamene seng nasunsara ual᷊ingu Runian Duata Wuhu, kụ ual᷊ingu ene i kamene sarung i rekengbe makakasowa su ral᷊unge.

⁶Mawu Ruata e mẹ̌karadiahangu kạadilẹ̌. I Sie kai sarung měmal᷊isu susa su taumata apan napakasusang kamene.

⁷Dingangu si kamene kụ apang orasẹ̌ ini e lụlahunsusa — kerene lai si kami e — Ruata e kai sarung měngonggọu wawal᷊ise iapasindạ su tempon Mawu Yesus mẹ̌těngkatodẹ, lumintụ bọu sorga ringangu manga malaekate makawasa,

⁸ringangu putunge kạpahunděllị e. I Sie lumintụ měhukungu taumata tawe mapulu makakiral᷊a Mawu Kasěllahenge ringangu tawe tumuhụ habaru Injilẹ̌ mạanun Yesus Mawung kitẹ.

⁹ Manga umatẹ̌ ene sarung makatarimạ u hukumangu kawawinasa sarang marěngụ-děngụ, irěmmẹ sol᷊ong likude wọu ghal᷊ipohom Mawu e ringangu wọu kawasanʼE kụ mawantugẹ̌ e;

¹⁰patikụ ene sarung mariadi su ěllo i Sie marěnta kapia mẹ̌deạu raloěngu kěbị taumata mangimang. I kamene lai sarungbe ene sutal᷊oarang umatu Mawu e, u i kamene seng nangimang hengetang ilẹ̌habari kami e si kamene.

¹¹Kai ual᷊ingu ene hakịu i kami e měngkate hanesẹ̌ mẹ̌kẹ̌kal᷊iomaneng i kamene. I kami e mẹ̌kẹ̌kal᷊iomaneng tadeạu Mawu Ruata makakariading kamene e wotonge makapẹ̌biahẹ̌ tumuhụ kapulunʼE; kụ kai waugu ene e i Sie nẹ̌kui si kamene. Karimạko Mawu Ruata e, ringangu kawasanʼE makawatụ kapulunʼE waugu mẹ̌koạ mapia, ringangu měnukụ kěbị munara kinoạ i kamene ual᷊ingu mangimang si Kristus.

¹²Hakịu ene Mawung kitẹ i Yesus wẹ̌bantugang ual᷊ingu i kamene, dingangu i kamene mal᷊aing bẹ̌bantugang kahian Yesus něnggạeng kapian naungu Ruatang kitẹ dingangu Mawung[1] kitẹ i Yesus Kristus.