Read Sangir 2 TESALONIKA 3 Bible Online

2 TESALONIKA 3 - Sangir bible

2 TESALONIKA 3

¹Pangěnsueěnge, manga anạ u sěmbaụ, pěmpẹ̌kal᷊iomaneng baụgʼi kami. Pěmpẹ̌kal᷊iomaneng tadeạu hengetangu Mawu e lighạbe mạsawuhẹ̌ dingangu matarimạbe mapia kerẹewe lai nạung seng nariadi si kamene.

²Pẹ̌mpẹ̌kal᷊iomaneng lai tadeạu Mawu e měngambang i kami e wọu taumata mal᷊ahěngị dingangu ral᷊akị. U wal᷊inewe kěbị taumata mạngimang hengetangu Mawu e.

³Kai Mawu e satia. I Sie kai sarung mapakatoghasʼi kamene ringangu maněntanudi kamene wọʼi Ral᷊akị.

⁴Mase i kami e mangimangbe masěgadẹ̌ su Mawu mạanung kamene, u i kamene e kai kapẹ̌kẹ̌koạ e ringangu měngkate měkẹ̌koạ apang pakịkoạ i kami e si kamene.

⁵Karimạko Mawu e měngahạ i kamene limembom makaěnna u Mawu Ruata e kụkěndagʼi kamene ringangʼi Kristus e mạngonggọu naung makẹ̌dang si kamene.

⁶Manga anạ u sěmbaụ, su ral᷊ungu kawasang Mawu Yesus Kristus, i kami e měngoro si kamene tadeạu pěmpěnggeako i kamene wọʼi sire apan manga anạ u sěmbaụ lụl᷊eohẹ̌ dingangu tawe tumatuhụ těntiro itěntirong kami e si sire.

⁷I kamene hala e masingkạu i kamene harusẹ̌be mẹ̌těno kakakoạ i kami e. I kami tawe měmamalasẹ̌ nạung i kami e ene sutal᷊oarang kamene.

⁸I kami e tawe kumakaěng kaěngu taumata kụ tawe měmamaehẹ̌. Kai ral᷊iune ěllo hẹ̌bi i kami e měmẹ̌munara mẹ̌bẹ̌bangung suagẹ̌ tadeạu i kami tawe mapakasusang i sai-sai wọu tal᷊oarang kamene.

⁹I kami měkẹ̌koạ ene wal᷊inewe ual᷊ingu i kami e tawe hinone měnuntụ tadeạu i kamene e kai mẹ̌tul᷊ung i kami, kaiso kawe ual᷊ingu i kami mapulu makoạ pẹ̌tatěnoěng si kamene.

¹⁰Su tempong i kami wẹ̌dang sutal᷊oarang kamene e, i kami e něngonggọ u atorang ini, ”I sai-sain tawe mapulu měmpěmunara ute tawe wotonge mahungkaěng.”

¹¹I kami mẹ̌bẹ̌bera kere ini watụ u i kami e makạdingihẹ̌ u piạ taumata sutal᷊oarang kamene e mẹ̌pẹ̌paral᷊eong. I sire tawẹ hal᷊ẹ̌ i sire tumbạu mẹ̌tẹ̌tasibung lụl᷊aụ urusangu taumata wal᷊ine.

¹²Su ral᷊ungu kawasan Mawu Yesus Kristus i kami e mạngoro si sire ringangu mạngonggọu tẹ̌gu, tadeạu i sire měhal᷊ẹ̌be matatapẹ̌ dingangu mědẹ̌deạbe wiahʼi sire hala.

¹³Kai i kamene kumbahangbe mawoehẹ̌ mẹ̌koạ mapia.

¹⁴Aramanung hẹ̌dowem piạu tawe tumuhụ apang iwẹ̌berang kami su ral᷊ungu suratẹ̌ ini. Pakaingatẹ̌ bue su taumata kerene ringangu abe pěhapị i sie, tadeạu i sie mamea wue.

¹⁵Kai kumbahangbe i sie koateng kere sědụ; kụ kětạeng panasa si sie kere su anạ u sěngkatau.

¹⁶Mawu e kai puěngu karal᷊unsemahʼi kitẹ. Karimạko i Sie měngkai hanesẹ̌ mangonggọ u karal᷊unsemahẹ̌ si kamene su ral᷊ungu patikụ sabarang. Karimạko Mawu e mahundingang i kamene kěbị.

¹⁷Tabeạku, wọʼu iạ i Paulus. Iạ sẹ̌saku namohẹ u wahageang ini. Kụ ini e kai takụ nipělọ tatiala su kěbị suratẹ̌ku.

¹⁸Mal᷊owọko Mawung kitẹ i Yesus Kristus měngal᷊amatẹ̌ si kamene kěbị. Adatʼi kami, Paulus