Read Sangir 1 TIMOTIUS 2 Bible Online

1 TIMOTIUS 2 - Sangir bible

1 TIMOTIUS 2

¹Kahumotong-motongange, iạ e mědẹ̌dorong sěngapam botonge tadeạu rorong, kakal᷊iomaneng, dingangu kakal᷊iomaneng manandu, orelai tatarimakasẹ e darumatingko su Mawu Ruata e waugu patikụ taumata,

²baugu manga ratu ringangu kěbị taumata apang kụ měmpẹ̌ngumpaedẹ̌ kawasa. Pěmpẹ̌gause tadeạu i kitẹ makapẹ̌biahẹ̌be sukaral᷊enehẹ̌ dingangu marěmasẹ̌ baugu Ruata kerẹewe su adate.

³Kai ene mapia ringangu makạl᷊uasẹ̌ naungu Mawu Ruata e Mananal᷊amatẹ̌ si kitẹ e.

⁴I Sie mapulu ute tadeạu kěbị taumata iapakasal᷊amatẹ̌ dingangu masingkạu apan matul᷊idẹ̌.

⁵U Ruata e kai sěmbaụ dingangu kětạeng sěmbaụ lai mananal᷊oara wělạu Ruata ringangu taumata, kụ kai i Kristus Yesus.

⁶I Sie sěngkatau taumata kụ seng něnarakangu watangenge tadeạu mapakal᷊iwirʼu patikụ taumata e wọu kal᷊awọu rosan sire. Ual᷊ingu ene ute Mawu Ruata e nělahẹu tempone mapia, u i Sie mapulu tadeạu kěbị taumata masal᷊amatẹ̌.

⁷ Kụ kai ene hakịu iạ nirolohe sol᷊ong anun taumata, wal᷊inewe tau Yahudi e ipělẹ̌habarẹ̌ si sire habaru mạanun pangangimang tutune. Kụ takụ ipẹ̌paul᷊ị ini e kai mambeng kahěngang, kai iạ e tawe mẹ̌konti.

⁸Iạ e mapulu tadeạu walạewe su tampạ sude, manga esẹ měmpẹ̌kal᷊iomaneng dingangu naung burẹ̌si, tawẹ pẹ̌dune arau tawẹ bul᷊one.

⁹ Manga wawine e pěmpělěgahu watangenge su sarạe ringangu pẹ̌pakeang pakaudupẹ̌. Ariẹbe mẹ̌dal᷊ẹ̌gahu utạ mẹ̌sẹ̌sal᷊apidẹ̌ arau manga ral᷊ěgahẹ̌ bul᷊aeng, arau mutiara, arau pakeang maral᷊ěgadẹ̌.

¹⁰Su sěmběkane ute, manga wawine e kawe hinong mělěgahẹ̌ batangenge ringangu kakanoạ mapapia kerẹewe hinone su wawine měkẹ̌kal᷊iomaneng su Mawu Ruata.

¹¹Bawine harusẹ̌ měngěndung marěmasẹ̌ dingangu makěhagẹ̌.

¹²Iạ e tawe mapakawalan manga wawine měngkai maněntiro arau mạngawasa manga esẹ e, i sire harusẹ̌be marěmasẹ̌.

¹³ Batụu kai kakal᷊imonaěnge niriạdi ute kai i Adam bọu ene wuhụewe i Hawa.

¹⁴ Kụ bal᷊inewe i Adam, kaiso kawe wawine e kinaakal᷊eng, hakịu limawang titan Mawu.

¹⁵Maningbe kerene, wawine sarung maambangu pěmamantelẹ̌ anạ, asal᷊u i sie[1] ringangu kasasanạ u naung tatapẹ̌be mangimang si Kristus, dingangu tatapẹ̌ kụkěndagʼu taumata wal᷊ine kụ mẹ̌biahẹ̌ samatang baugu Mawu Ruata.